ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި މާލޭ ސަރައްދުގެ ބައެއް މަގުތަކާއި އާއްމު ތަންތަނުގައި މި ފަހަރު ވޯޓް ފޮށި ބަހައްޓާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ. އަންނަ މަހުގެ 10 ވަނަދުވަހު ބޭއްވުމަށް ތާވަލުކޮށްފައިވާ އިންތިޚާބަށް ކުރަންޖެހޭ މަސައްކަތްތައް އެ ކޮމިޝަނުން އަންނަނީ ކުރަމުންނެވެ.
ފަހުގެ ތާރީހުގައި ކޮންމެ އިންތިޚާބަކަށްވެސް ވޯޓްލާ މަރުކަޒުގެ ގޮތުގައި އިލެކްޝަންސް ކޮމިޝަނުން ކަނޑައަަޅަމުން އައީ ކޮންމެވެސް ސްކޫލެއް ނުވަތަ ސަރުކާރުގެ އޮފީހެކެވެ. އެހެންނަމަވެސް އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، އެޗްޕީއޭގެ ގައިޑްލައިނާއި އެއްގޮތަށް އިންތިޚާބު ކުރިޔަށް ގެންދަންޖެހޭތީ ވޮޓް ފޮށި ބަހައްޓަންޖެހޭ އަދަދަށް މަރުކަޒުތައް ލިބުމުގައި ދަތިތައް މިފަހަރު ކުރިމަތިވެފައިވާކަމަށެވެ. އެހެންކަމުން މި ފަހަރު ޓެންޓް ޖަހައިގެން މާލޭ ސަރަހައްދުގެ ބައެއް މަގުތަކާއި އާއްމު ތަންތަނުގައި ވޯޓްލުމަށް 40 މަރުކަޒެއް ޤާއިމުކުރަންޖެހޭކަމަށް ޝަރީފް ވިދާޅުވިއެވެ.
"ކޮމިއުނިޓީ ސްޕްރެޑް މިއޮތީ މާލެ ސަރަަހއްދުގަ ދެއްތޯ. އަޅުގަނޑުމެން ފޯކަސް މިކުރީ އެޗްޕީއޭގެ ގައިޑްލައިންގައި ބުނާ ޢަދަދުތައް މަދުކުރުމާ އެކަންކަމަށް ބާލާ މާލޭގައި އެކަށީގެންވާ ވަރަށް މަރުކަޒު ނުލިބޭތީ. މަރުކަޒުތައް މާލެއަށް އިތުރުކުރުމަށް. އެ އިތުރު 40 މަރުކަޒު އެކި ސަރަހައްދުތަކުގައި ޓެންޓް ޖަހައިގެން މި ޤާއިމްކުރަނީ." ޝަރީފް ވިދާޅުވިއެވެ.
އަންނަ ލޯކަލް ކައުންސިލް އިންތިޚާބު ބޭއްވުމަށް އިލެކްޝަންސް ކޮމިޝަނަށް މިއަހަރުގެ ބަޖެޓުން 51 މިލިއަން ރުފިޔާ ކަނޑައަޅާފައިވާއިރު، އިތުރަށް ބަޖެޓް ބޭނުންވާކަން އިލެކްޝަންސް ކޮމިޝަނުން ވަނީ ވިދާޅުވެފައެވެ. މިއާއެކީ މާލިއްޔަތު ކޮމިޓީން ވަނީ 29 މިލިއަން އިތުރުކޮށްދީފައެވެ. އެހެންކަމުން އަންނަ އިންތިޚާބަށް 80 މިލިއަން ރުފިޔާ އިލެކްޝަންސް ކޮމިޝަނަށް ވަނީ ކަނޑައަޅާފައެވެ. ޝަރީފުވަނީ ޓެންޓްތައް ޤާއިމްކުރުމަށްވެސް ބޮޑު ޚަރަދެއް ހިނގާނެކަމަށް ވިދާޅުވެފައެވެ. އަދި އެއީ ދުރާލާ ކުރަންޖެހޭ މަސައްކަތްތަކެއްކަމަށްވެސް ޝަރީފުވަނީ ކޮމިޓީގައި ފާހަގަކުރައްވާފައެވެ.
އިލެކްޝަންސް ކޮމިޝަނުން ވިދާޅުވީ، އެޗްޕީއޭގެ ގައިޑްލައިނާއި އެއްގޮތަށް އިންތިޚާބު ބާއްވާއިރު، ބަހައްޓާނެ ވޯޓް ފޮށީގެ ޢަދަދުވެސް އިތުރުވެފައިވާކަމަށެވެ. އެގޮތުން ކުރިން އިންތިޚާބުގައި ބަހައްޓަން ނިންމީ 532 ވޯޓް ފޮށްޓެވެ. ނަމަވެސް މިހާރު އެ ޢަދަދު އިތުރުވެ 735 ވޯޓު ފޮށި ބެހެއްޓުމަށް ނިންމާފައިވާ ކަމަށް އީސީން ވަނީ ވިދާޅުވެފައެވެ. އެ އިންތިޚާބުގައި އެއް ވޯޓް ފޮށްޓަށް އެންމެ ގިނަވެގެން ވޯޓްލާނީ 500 މީހުންނަށްކަމަށްވެސް އިލެކްޝްންސް ކޮމިޝަނުން ވަނީ ވިދާޅުވެފައެވެ.
ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ވާދަކުރާނީ ޖުމްލަ 3،934 ކެނޑިޑޭޓުންނެވެ.