އެކުވެރި އަރަބި އިމާރާތުގެ ޝާރުޖާ ޔުނިވަރސިޓީންގ ކުރިއަށްގެންދާ ޘަޤާފީ ތަރިކައިގެ ހަފްތާގައި، ދިވެހި ރާއްޖެ ތަމްސީލްކުރުމަށް ޔޫއޭއީއަށް ދިވެހި ފަންނުންވެރިންގެ ޓީމެއް ފުރައިފިއެވެ.
ދުނިޔޭގެ ޘަޤާފީ ތަރިކައިގެ ހަފްތާ ނުވަތަ "ވޯލްޑް ހެރިޓޭޖް ވީކް" ފާހަގަކުރުމަށް ކުރިއަށްގެންދާ މި ޙަރަކާތުގައި އެކި ހަފްތާ ޚާއްޞަކޮށްފައިވަނީ އެކި ޤައުމުތަކުގެ ސަޤާފީ ހަރަކާތްތައް ދައްކާލުމަށެވެ. ރާއްޖޭގެ ހަރަކާތްތައް ކުރިއަށްދާނީ މިމަހުގެ 24 އިން 28 އަށެވެ.
ދުނިޔޭގެ އެކި ޤައުމުތަކުގެ ސަޤާފަތާއި ތާރީޚީ ކަންކަން ދައްކާލުމަށް ކުރިއަށްގެންދާ މި ޙަރަކާތުގައި ބައިވެރިވުމަށް ރާއްޖޭގެ 16 ފަންނުވެރިންވަނީ ޔޫއޭއީއަށް ދަތުރުކޮށްފައެވެ.
ނެޝަނަލް ސެންޓަރ ފޯރ ދި އަރޓްސްއިން ވިދާޅުވީ މި ޙަރަކާތް ކުރިއަށްދާއިރު ބޮޑުބެރުގެ ހަރަކާތްތަކާއި ކުރެހުމާއި ދިވެހި ކެއުންތައް ދައްކާލުމަށް ވެސް ހަމަޖެހިފައިވާކަމަށް ނެޝަނަލް ސެންޓަރ ފޯރ ދި އަރޓްސްއިން ވިދާޅުވެއެވެ. އަދި ދިވެހި ހިރިގަލު ވަޑާމުގެ މަސައްކަތްތަކާއި ލިޔެލާޖެހުމާއި ކަސަބު ވިޔުންފަދަ، ދިވެހިންގެ ފަންނުވެރިކަން ފެންނަ ޘަޤާފީ މަސައްކަތްތައް ދައްކާލުމަށް ހަމަޖެހިފައިވާކަމަށްވެސް އެ ސެންޓަރުން ވިދާޅުވެއެވެ.
މި ފުރުޞަތު ދިވެހިރާއްޖެއަށް ހޯދައިދީފައިވަނީ މޯލްޑިވްސް އަރޓިސްޓްސް ކޮމިއުނިޓީ އާއި ޔޫއޭއީގެ ޝާރުޖާ ޔުނިވަރސިޓީ ގުޅިގެންނެވެ. މި ޙަރަކާތްތަކަށްފަހު ފަންނާނުން ރާއްޖެ އައުމަށް ހަމަޖެހިފައިވަނީ މިމަހުގެ 29ވަނަ ދުވަހުއެވެ.