ށ.ފޭދޫ ބަނދަރު ތަރައްޤީކުރުމުގެ ޢަމަލީ މަސައްކަތް ފަށައިފިއެވެ.
ފޭދޫ ބަނދަރު ތަރައްޤީކުރުމުގެ މަސައްކަތް ކުރިއަށްގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީންނެވެ.
މަސައްކަތަށް ބޭނުންވާ މެޝިނަރީއާއި މުދާ މިހާރުވަނީ އެރަށަށް ގެންގޮސްފައެވެ.
ށ.ފޭދޫގައި ކުރިއަށްގެންދާ މި މަސައްކަތަކީ ރަށުގެ ބަނދަރަށް ޖާގަ އިތުރުކުރުމަށް ކުރިއަށްގެންދާ މަސައްކަތެކެވެ. މިމަސައްކަތުގެ ދަށުން އެރަށު ބަނދަރަށް 380 ފޫޓު އިތުރުކުރުމަށް ވަނީ ހަމަޖެހިފައެވެ. އަދި ނެރާއި، ބަނދަރު ފުންކުރުމުގެ މަސައްކަތަށް 27500 ކިއުބިކް މީޓަރުގެ ސަރަޙައްދު ފުންކުރުމަށް ވަނީ ހަމަޖެހިފައެވެ. މީގެއިތުރަށް 378 މިޓަރުގެ ބޭރު ތޮއްޓެއްލުމާއި 90 މީޓަރުގެ ސަރަޙައްދުގައި ރިވެޓްމަންޓް ޖެހުމަށްވަނީ ހިމަނާފައެވެ.
ށ. ފޭދޫ ބަނދަރު ތަރައްޤީ ކުރުމުގެ މަޝްރޫޢުގެ އަމަލީ މަސައްކަތް ފެށުމަށްޓަކައި، 05 ޖެނުއަރީ 2021 ވަނަ ދުވަހު، އަޅުގަނޑުމެންގެ ޓީމާއި މެޝިނަރީ ވަނީ ޕްރޮޖެކްޓް ސައިޓަށް މޮބިލައިޒްކޮށްފައި. މި މަޝްރޫޢަކީ 33.1 މިލިއަން ރުފިޔާގެ މަޝްރޫޢެއް. pic.twitter.com/USXOfhKqPB
— MTCC Plc (@MTCCPlc) January 5, 2021
ށ.ފޭދޫ ކައުންސިލްގެ ރައީސް މުޙައްމަދު ޝާމިރު ވިދާޅުވީ ބަނދަރު ތިލަވުމުގެ ސަބަބުން ރަށަށް މުދާ ގެންނަ ބޮޑެތި ބޯޓުފަހަރު ވަނުމުގައި ދަތިތަކާއި ކުރިމަތިވެފައިވާކަމަށެވެ. އަދި ރަށަކީ މަވެރިކަން ކުރާ ރަށަކަށްވެ، އޮޑިދޯނިފަހަރު ގިނަ ރަށަކަށްވާތީ ޖާގައިގެ ދަތިކަން މިހާރު ވަރަށް ބޮޑަށް އޮތްކަން އޭނާ ފާހަގަކުރެއްވިއެވެ.
"މިހާރު އޮޑިދޯނި ގިނަ. ނެރުމަތި ތިލަވުމުގެ ސަބަބުން ހިކި ދިޔައިގައި ބޯޓަށް ނުވަދެވޭ. ނެރުމައްޗަށް ބީހޭ ފަހަރުވެސްދޭ." ފޭދޫ ކައުންސިލްގެ ރައީސް ވިދާޅުވިއެވެ.
ފޭދޫ ބަނދަރު ހަދަނީ ޒަމާނީ ބަނދަރެއްގެ ގޮތުގައެވެ. ބަނދަރުގެ މަސައްކަތް ނިމޭއިރު ޕޭމަންޓް ލުމާއި، ނެރު ބައްތިއާއި އަދި ބަނދަރު ބައްތި ޖެހުމަށްވެސް ވަނީ ހަމަޖެހިފައެވެ.
މި މަޝްރޫޢުއަކީ ސަރުކާރުން 33.1 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ.