ހުޅުމާލެ ދެވަނަ ފިޔަވަހީގެ ދަށުން ހިއްކާފައިވާ ސަރަޙައްދުގެ ގޮނޑުދޮށް ހިމާޔަތްކުރުމުގެ މަސައްކަތް ނިމިއްޖެއެވެ.
ދިވެހި ޒުވާނުންގެ އުއްމީދުތަކާއި، އަދި ރާއްޖޭގެ ތަރައްޤީއާވެސް ގުޅިފައިވާ ހުޅުމާލޭގެ ދެވަނަ ފިޔަވަހީގެ ދަށުން 240 ހެކްޓަރުގެ ބިން ސަރުކާރުން ވަނީ ހިއްކަވާފައެވެ.
ހުޅުމާލޭ ތަރައްޤީކުރެއްވުމުގެ މަޝްރޫޢަކީ ރާއްޖޭގައި ހިންގަމުންދާ ތަރައްޤީގެ މަޝްރޫޢުތަކުގެ ތެރެއިން، އެންމެ ފާހަގަކޮށްލެވޭ އަދި އެންމެ ބިޔަ އެއް މަޝްރޫޢެވެ. މި މަޝްރޫޢުގެ ދަށުން ފުރަތަމަ ފިޔަވަހިން ބައެއް ހިއްކައި، އެތަނުގައި މީހުން އާބާދުކުރެއްވުމުގެ މަސައްކަތް ސަރުކާރުން ކުރައްވަމުން ގެންދަވާއިރު، ދެވަނަ ފިޔަވަހީގެ ދަށުން ހުޅުމާލޭގެ ފަޅުން ހިއްކެވުމަށް ކަނޑައެޅި ސަރަޙައްދުގެ މަސައްކަތްވެސް ވަނީ ރެކޯޑް މުއްދަތެއްގެ ތެރޭގައި ނިންމަވާލައްވާފައެވެ. އެގޮތުން ފުރަތަމަ ފިޔަވަހީގައި ހިއްކި 188 ހެކްޓަރަށްވުރެ ދެގުނަ ބޮޑުކޮށް ދެވަނަ ފިޔަވަހީގެ ދަށުން 240 ހެކްޓަރުގެ ބިން ހިއްކަވާފައިވެއެވެ.
img:http://s4.psmnews.mv/images/660x400/14823120058766.jpg|ހުޅުމާލެ ދެވަނަ ފިޔަވަހީގެ ދަށުން ހިއްކާފައިވާ ސަރަހައްދު- ފޮޓޯ: އެޗްޑީސީ
ދެވަނަ ފިޔަވަހި ތަރައްޤީކުރެއްވުމަށް ޕްލޭން ކުރައްވައި، ޢަމަލީ މަސައްކަތްތައް 2015 ވަނަ އަހަރު ފަށްޓަވާފައިވާއިރު، އެ މަސައްކަތް ހަލުއި ސްޕީޑެއްގައި ކުރިއަށް ގެންދަވާކަން ފާހަގަކޮށްލަންޖެހެއެވެ. އެގޮތުން ހައުސިންގ މަޝްރޫޢުތަކުގެ ތެރެއިން 15 ހާހަށްވުރެ ގިނަ ހައުސިންގ ޔުނިޓްގެ މަސައްކަތްތައް މިހާރު ވަނީ ކުންފުނިތަކާ ޙަވާލުކުރައްވާފައެވެ. އަދި، އެ ހައުސިންގ ޔުނިޓްތަކުގެ ތެރެއިން 7000 ހައުސިންގ ޔުނިޓްގެ މޮބިލައިޒޭޝަންގެ މަސައްކަތް މިހާރު ފަށާފައިވާއިރު، ޢަމަލީ މަސައްކަތްވެސް ކައިރި މުސްތަޤުބަލެއްގައި ފެށޭނެ ކަމަށް ހައުސިންގ ޑިވެލޮޕްމެންޓް ކޯޕޮރޭޝަނުން ހާމަކުރެއެވެ.
ހުޅުމާލޭ ފުރަތަމަ ފިޔަވަށްސާ ޚިލާފަށް ދެވަނަ ފިޔަވަހީގައި އެޗްޑީސީން މަސައްކަތް ކުރަމުންދަނީ، ހައުސިންގ ޔުނިޓްތަކުގެ މަސައްކަތް ކުރިއަށްދާއިރު، އެއް ވަގުތެއްގައި، އެކުއެކީގައި ހިންގަންޖެހޭ ތަރައްޤީގެ އެހެން މަޝްރޫޢުތައް ހިންގުމަށެވެ. އެގޮތުން މަގު ހެދުމާއި އެކުއެކީގައި ކަރަންޓާއި، ފެނުގެ ނިޒާމު ޤާއިމްކުރުމުގެ މަސައްކަތް ކުރިއަށް ގެންދިއުމަށް ކަމާބެހޭ ކުންފުނިތަކާ ގުޅިގެން މަސައްކަތް ކުރަމުންދާކަމަށް އެޗް.ޑީ.ސީއިން ބުނެއެވެ.
ދެވަނަ ފިޔަވަހީގައި މިވަގުތު ކުރަމުންދާ މަސައްކަތްތަކަށް ބަލާއިރު، ދެވަނަ ފިޔަވަހީގެ ދަށުން ހިއްކާފައިވާ ސަރަޙައްދުގެ ޝޯވ ޕްރޮޑެކްޝަންގެ މަސައްކަތް މިހާރު ވަނީ މުޅިން ނިންމާލާފައެވެ. އަދި ޒޯން އެކެއް، ދޭއް އަދި ތިނެއްގެ ފަސް އެއްގަނޑު އެއްވަރުކުރުމާއި، މަގުހެދުމަށް ބޭނުންވާ ލޭޔަރތައް އެޅުމުގެ މަސައްކަތްވެސް ނިމިފައިވާކަމަށާއި، އެޗް.ޑީ.ސީއިން ހާމަކުރެއެވެ.
ސަތޭކަހާސް މީހުންގެ އާބާދީއަކަށް އަމާޒުކޮށްގެން ތަރައްޤީކުރައްވަމުން ގެންދަވާ ހުޅުމާލޭ ދެވަނަ ފިޔަވަހީގެ ދަށުން، ރިއަލް-އެސްޓޭޓް އުޞޫލުން ހައުސިންގ ޔުނިޓްތައް ތަރައްޤީކުރެއްވުމުގެ އިތުރުންވެސް، ބޮޑެތި ގިނަ ޕްރޮޖެކްޓްތަކެއް ހިންގެވުމަށް ސަރުކާރުން ވަނީ ނިންމަވާފައެވެ. މީގެތެރޭގައި ޔޮޓް މެރީނާއާއި ކްރޫޒް ޓަރމިނަލް ތަރައްޤީކުރެއްވުން، ފަތުރުވެރިކަމަށް ޚާއްޞަ ޒޯނެއް ތަރައްޤީކުރެއްވުން އަދި އިންޓަރނޭޝަނަލް ފައިނޭންސް ސެންޓަރެއް ތަރައްޤީކުރެއްވުން ހިމެނެއެވެ.