އުފެއްދުންތެރިކަމުގެ މަޢުރަޒާ ގުޅޭ "ރެޑީ ސެޓް މަޢުރަޒު 26" މިއަދު ހަވީރު

ކުރިއަށް އޮތް ދިވެހީންގެ އުފެއްދުންތެރިކަމުގެ މަޢުރަޒު 2026 އަށް ތައްޔާރުވުމުގެ ގޮތުންނާއި، އެ މައުރަޒުގައި ހިމެނޭ ކަންކަމުގެ މަޢުލޫމާތު އާންމުންނަށް ދިނުމުގެގޮތުން 'ރެޑީ ސެޓް މަޢުރަޒު 26' ގެ ނަމުގައި ބާއްވާ ޚާއްސަ ހަރަކާތެއް މިއަދު ހުޅުމާލޭގައި ބޭއްވުމަށް ބިޒްނަސް ސެންޓަރ ކޯޕަރޭޝަން، ބީސީސީއިން ނިންމައިފިއެވެ.

މި ހަރަކާތް އޮންނާނީ މިއަދު ހަވީރު 4:00 އިން ރޭގަނޑު 11:00 އަށް، ހުޅުމާލެ ފޭސް 1 ގެ ދިރާގު ފަހަތުން އޮންނަ ބީޗް ސަރަހައްދުގައެވެ. މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑާއި، ބީސީސީ ގުޅިގެން ކުރިއަށްގެންދާ މި ހަރަކާތަކީ އާއިލާތަކަށާއި ކުޑަކުދިންނަށް އަދި އާންމު ފަރާތްތަކަށް ޚާއްސަކޮށްގެން ގިނަ ކަންތައްތަކަކާ އެކު ކުރިއަށްގެންދާ ޙަރަކާތެކެވެ.

މި ޙަރަކާތުގެ ތެރެއިން މިއަދު ހަވީރު ބީޗް ސަރަހައްދުގައި ކުޑަކުދިންނަށް ޚާއްސަ ކުޅިވަރުތަކާއި ބައުންސީ ކާސަލް ފަދަ މަޖާ ހަރަކާތްތައް ކުރިއަށްދާނެއެވެ. މީގެ އިތުރުން ރޭގަނޑުގެ ވަގުތުތަކުގައި ބޮޑުބެރުގެ ހުށަހެޅުންތަކާއި އެހެނިހެން މުނިފޫހިފިލުވުމުގެ ހަރަކާތްތައް ކުރިއަށްދާނެ ކަމަށް ބީސީސީން ބުނެއެވެ. މި ހަރަކާތުގައި މައުރަޒުގެ ސްޕޮންސަރުންނާއި ޕާޓްނަރުން ވެސް ބައިވެރި ވުމަށް ވަނީ ހަމަޖެހިފައެވެ.

"ދިވެހީންގެ އުފެއްދުންތެރިކަމުގެ މައުރަޒު 2026" ކުރިއަށްދާނީ އަންނަ އޮކްޓޯބަރު 25 އިން ނޮވެމްބަރު 2 ގެ ނިޔަލަށް، ހުޅުމާލޭ ސެންޓްރަލް ޕާކުގައެވެ. މި މައުރަޒަށް އާންމުންނާއި ވިޔަފާރިތަކުގެ ބޮޑު ތަރުހީބެއް ލިބެމުންދާއިރު، ބައިވެރިވުމަށް އެދި މިހާތަނަށް 800 އަށް ވުރެ ގިނަ ފޯމު ވަނީ ހުށަހަޅާފައެވެ. މި މަޢުރަޒުގައި 16 ދާއިރާއަކުން 73 ގިންތިއެއްގެ އުފެއްދުންތަކާއި ހިދުމަތްތައް ދައްކާލުމަށް ހަމަޖެހިފައިވާއިރު، މުބާރާތުގެ ބައިގައި ވާދަކުރުމަށް 6،000 އަށް ވުރެ ގިނަ ދިވެހި އުފެއްދުން ވަނީ ރަޖިސްޓަރީ ކޮށްފައެވެ.

ދިވެހި ވިޔަފާރިތަކަށް އިތުރު ފުރުސަތުތައް ހޯދައިދިނުމަށް ބާއްވާ މި އެކްސްޕޯގެ ކުރިން ބާއްވާ 'ރެޑީ ސެޓް މަޢުރަޒު 26' ހަރަކާތަކީ މުޅި އެކްސްޕޯއަށް އާންމުން ހޭލުންތެރިކުރުވައި، އެކަމުގެ މައުލޫމާތާއި ފޯރި އާންމުންނާ ހަމައަށް ގެނެސްދިނުމަށް ބާއްވާ ހަރަކާތެކެވެ.