ޤަވާއިދާ ޚިލާފުވާ މީހުން ޖޫރިމަނާކުރަން "ޑިޖިޓަލް ފައިން" ނިޒާމެއް ގާއިމްކުރަނީ
-
ނުރައްކާތެރިކޮށް އުޅަނދު ދުއްވާ ފަރާތްތައް ދެނެގަނެ، ޕްރޮފައިލްކުރާނެ
-
ޖޫރިމަނާގެ އިތުރުން އިތުރު އިންޒާރަކާ ނުލައި ޖިނާއީ ތަހުގީގު ހިންގާނެ
ޑިޖިޓަލް ފައިން ނިޒާމެއް ގާއިމްކުރުމުގެ މަސައްކަތްތައް ކުރިއަށްދާ ކަމަށް އެސިސްޓެންޓް ކޮމިޝަނަރ އޮފް ޕޮލިސް އާސިމް ޢަބްދުﷲ ވިދާޅުވެއްޖެއެވެ.
އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް މަގުމަތީގައި ނުރައްކާތެރިކޮށް އުޅަނދު ދުއްވުން ތަކުރާރުކުރާ ފަރާތްތައް ހުއްޓުވައި، އެ ފަރާތްތަކާމެދު ހަރުކަށި ފިޔަވަޅު އެޅުމަށް ދިވެހި ފުލުހުންގެ ޚިދުމަތުން ޚާއްސަ މަސައްކަތްތަކެއް ވަނީ ފަށާފައެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެސިސްޓެންޓް ކޮމިޝަނަރ އޮފް ޕޮލިސް އަދި ހެޑް އޮފް ހުޅުމާލެ ޕޮލިސް އާސިމް ޢަބްދުﷲ ވިދާޅުވީ، މަގުމަތީގެ ރައްކާތެރިކަން ކަށަވަރުކުރުމަށް މުހިންމު މަސައްކަތްތަކެއް ކުރަމުންދާ ކަމަށެވެ.
"އަބަދުވެސް އެކި ކަންކަމަށް އާންމު ރައްޔިތުން ހޭލުންތެރިކުރުވުމުގެ ހަރަކާތްތައް އަޅުގަނޑުމެން ކުރިއަށްގެންދަން. އަދި ކުރިއަށްއިތްތަނުގައިވެސް އަޅުގަނޑުމެން އެ މަސައްކަތް ދަމަހައްޓާނަން. އެއާއެކީގައި އަޅުގަނޑުމެން ކުރިއަށްއޮތްތަނުގައި ތައާރަފްކުރުމަށް އެބައޮތް ޑިޖިޓަލް ފައިން. އޭރުން އުޅަނދުތައް ޓޯވ ކުރަން ނުޖެހި ފައިން ކުރެވޭނެ ނިޒާމު ގާއިމްކުރެވިގެންދާނެ. އިރާދަކުރެއްވިއްޔާ ލަސްތަކެއްނުވެ އަޅުގަނޑުމެންނަށް އެ މަސައްކަތްތައް ފެށޭނެ." އޭސީޕީ ވިދާޅުވިއެވެ.
#MPSPressStatement: 171-A(C1)/PS/2026/09 - Maguthakugai nurakkaatherikoh ulhan'dhu dhuvvun thakuraaru kuraa faraaiythakaamedhu harukashi fiyavalhu elhumaai jinaaee thahugeegu hingumaa gulhey https://t.co/t74ILcU9tz pic.twitter.com/GFcvDEoEwX
— Maldives Police (@PoliceMv) October 3, 2026
އޭސީޕީ މިހެން ވިދާޅުވެފައި މިވަނީ މަގުމަތީގެ އުސޫލްތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު ޚާއްސަ ފިޔަވަޅުތަކެއް ފުލުހުން އަޅަމުންދާނެކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދުވެސް ވިދާޅުވެފައިވާ ދަނޑިވަޅެއްގައެވެ.
ކޮމިޝަނަރ އޮފް ޕޮލިސް އެކަން ހާމަކުރައްވާފައިވަނީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ޚިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ދެއްވި މެސެޖެއްގައެވެ.
ސީޕީގެ މެސެޖުގައި ޓްރެފިކްގެ އާއްމު އުސޫލްތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން، ގިނަ ބައެއްގެ ހައްގުތައް ގެއްލި، ނުރައްކާތެރި އެކި ހާދިސާތައް ހިނގަމުންދާކަން ވަނީ ފާހަގަކުރައްވާފައެވެ. އެހެންކަމުން އެފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އަޅާނެކަމަށާއި، އެފަދަ ފަރާތްތަކަށް ފިޔަވަޅުއަޅަން އިދާރާތަކަށް އަންގަވާފައިވާނެކަމަށް ސީޕީ ވިދާޅުވިއެވެ.
މަގުމަތީގެ ސަލަމާތާ ރައްކާތެރިކަން ކަށަވަރުކުރުމަށް ފުލުހުންގެ ޚިދުމަތުން ވަނީ ޚާއްސަ މަސައްކަތްތަކެއް ފައްޓަވާފައެވެ.