އޭޝިއަން ޕެރަ ގޭމްސްއަށް ޤައުމީ ޕެރަ ޓީމު ތައްޔާރު

ރާއްޖޭގެ ޕެރަ ޓީމު ޖަޕާނުގައި ބޭއްވުމަށް ހަމަޖެހިފައިވާ އޭޝިއަން ޕެރަ ގޭމްސްއަށް ތައްޔާރުވަމުން އަންނަކަމަށް މޯލްޑިވްސް ޕެރަލިމްޕިކް ކޮމިޓީން ބުނެފިއެވެ.

ރާއްޖޭގެ ޕެރަލިމްޕިކް ޓީމާ ގުޅޭގޮތުން ޕީއެސްއެމް ނިއުސްއަށް ދެއްވި އިންޓަވިއުއެއްގައި ކޮމިޓީގެ ސެކްރެޓެރީ ޖެނެރަލް އަހްމަދު މުހައްމަދު ވިދާޅުވީ ޕެރަ ޓީމުން، އޭޝިއަން ޕެރަ ގޭމްސްއާއެކު އިތުރު ބައިނަލްއަޤްވާމީ މުބާރާތަކަށް ތައްޔާރުވަމުން އަންނަކަމަށެވެ.

އަހްމަދު ވިދާޅުވީ ޤައުމީ ޕެރަ ޓީމުން އެންމެ ފުރަތަމަ ވާދަކުރާނީ އޭޝިއަން ޕެރަ ގޭމްސްގައިކަމަށެވެ. ޤައުމީ ޕެރަ އެތުލީޓުން އެމުބާރާތަށް ތައްޔާރުވާންފަށާފައިވާއިރު، ތައިލެންޑް އޯޕަން ޕެރަ ބެޑްމިންޓަން ޗެމްޕިއަންޝިޕްގައިވެސް ރާއްޖެއިން ވާދަކުރާނެކަމަށް އަހްމަދު މައުލޫމާތު ދެއްވިއެވެ. އޭގެ އިތުރުން ކޮރެއާގައި އޮންނަ ޓްރޭނިން ޕްރޮގްރާމަކުންވެސް ރާއްޖޭގެ އެތުލީޓުންނަށް ފުރުސަތު ލިބިފައިވާކަމަށް އަހްމަދު ހާމަކުރެއްވިއެވެ.

"އެންމެ ފުރަތަމަ އަޅުގަނޑުމެން މި ބައިވެރިވަނީ އޭޝިއަން ޕެރަ ގޭމްސްގައި، އޭޝިއަން ޕެރަ ގޭމްސްގައި އަންނަމަހު އިރާދަކުރެއްވިއްޔާ އަޅުގަނޑުމެންގެ އެތުލެޓިކްސް ޓީމު އެބަ ބައިވެރިވޭ. އެއާއި ވިދިގެން މިފަހަރު ޗާންސް ނުލިބުނު ބެޑްމިންޓަން ޓީމު އެބަ ބައިވެރިވޭ ތައިލެންޑް އޯޕަން ޕެރަ ބެޑްމިންޓަން ޗެމްޕިއަންޝިޕްގައި. އަދި ކޮރެއާއިން ލިބުނު ފުރުސަތެއްގައި ޓްރޭނިންއެއްގައިވެސް ޕެރަ އެތުލީޓުން އެބަ ބައިވެރިވޭ" އަހްމަދު ވިދާޅުވިއެވެ.

5 ވަނަ އޭޝިއަން ޕެރަ ގޭމްސް ކުރިއަށްދާނީ މިމަހުގެ 18 އިން 24 އަށް ޖަޕާނުގެ އައިޗީ ނަގޯޔާގައެވެ. މިމުބާރާތުގައި ވާދަކުރާ އެތުލީޓުންނަކީ ޢަބްދުﷲ އަޔާން އަސްގަރާއި، ޢަބްދުއްރައްޒާޤްގެ އިތުރުން ފާތިމަތު އިބްރާހިމްއެވެ. އަދި ތައިލެންޑް އޯޕަން ޕެރަ ބެޑްމިންޓަން ޗެމްޕިއަންޝިޕްގައި ޤައުމު ތަމްސީލުކުރާނީ ޢާއިޝަތު ނަޒާހާއެވެ. މިމުބާރާތް ތާވަލުކޮށްފައިވަނީ ނޮވެމްބަރުމަހުގެ 24 އިން 29 އަށެވެ.

ކޮރެއާގައި އޮންނަ ޓްރޭނިން ޕްރޮގްރާމަށްދާ ޕެރަ އެތުލީޓުންނަކީ ހައްވާ އީޝަލް ރިޔާޒާއި އަލަށް ޓީމާ ގުޅުނު އާޔަންއެވެ. މި އެތުލީޓުން ކޮރެއާގައި ހަދާ ޓްރޭނިންތަކަކީ ނޮވެމްބަރުމަހުގެ 16 އިން ދިހަ ދުވަހުގެ މުއްދަތަށް ކުރިއަށްދާ ޓްރޭނިންތަކެކެވެ.

މޯލްޑިވްސް ޕެރަލިމްޕިކް ކޮމިޓީން އަންނަނީ ރާއްޖޭގެ އެތުލީޓުންނަށް ގިނަ ފުރުސަތުތަކެއް ހޯދައިދިނުމަށް މަސައްކަތްކުރަމުންނެވެ. އެގޮތުން ދާދިފަހުން ޤައުމީ ޕެރަ ޓީމުގެ އެތުލީޓު އަޔާން ވަނީ ކުރިއަށް އޮތް އޭޝިއަން ޕެރަ ގޭމްސްއަށް ތައްޔާރުވުމުގެ ގޮތުން "ރޯޑް ޓު ނަގޯޔާ" ގެ ނަމުގައި ކުރިއަށްދިޔަ ހައި ޕާފޯމަންސް ޓްރޭނިން ކޭމްޕެއް އުޒްބަކިސްތާނުގައި ފުރިހަމަކޮށްފައެވެ.