އޮލިމްޕިއާޑުން ދަސްވީ ބަލިނުކުރެވޭނެ ކުޅުންތެރިޔަކު ނުހުންނާނެކަން: ލައިސާ

އުޒްބަކިސްތާނުގަ ކުރިއަށްދިޔަ 46ވަނަ ޗެސް އޮލިމްޕިއާޑުން ދަސްވި އެންމެ މުހިންމު ފިލާވަޅަކީ މަސައްކަތްކޮށްފިނަމަ ބަލިނުކުރެވޭނެ ކުޅުންތެރިޔަކު ނުހުންނާނެކަންކަމަށް ޓީމުގެ ކާމިޔާބު ކުޅުންތެރިޔާ މަރްޔަމް ލައިސާ ޢަބްދުއްރަޝީދު ބުނެފިއެވެ.

ރާޒުވާގެ އެންމެ ބޮޑު ޓީމު މުބާރާތްކަމަށްވާ ޗެސް އޮލިމްޕިއާޑުން ޤައުމީ އަންހެން ޓީމުވަނީ "އީ" ކެޓަގަރީން ރަން މެޑަލް ހޯދާފައެވެ. އުޒްބަކިސްތާނުގެ ސަމަރކަންޑް ސްޕޯޓްސް ކޮމްޕްލެކްސްގައި މިމަހުގެ 15 އިން 28 އަށް ކުރިއަށްދިޔަ މިމުބާރާތުގައި 37 ޤައުމަކާ ރާއްޖޭގެ ޓީމު ވާދަކޮށް ކެޓަގަރީއިން ރަން މެޑަލް ހާސިލްކޮށްފަވާއިރު، މިއީ މިހާތަނަށް ރާއްޖޭގެ އަންހެން ރާޒުވާ ޓީމެއް ހޯދި އެންމެ ބޮޑު ކާމިޔާބީއެވެ.

މި ކާމިޔާބީއާ ގުޅިގެން ލައިސާ ބުނީ މިއީ ޤައުމީ އަންހެން ޓީމުން ދެކެމުންދިޔަ ދުވަސްވީ ހުވަފެނެއް ހަގީގަތަކަށްވުންކަމަށެވެ. މިއީ އުނދަގޫ މެޗުތަކަކަށްފަހު ޓީމެއްގެ ކުރެވުނު ބުރަ މަސައްކަތުގެ ނަތީޖާކަމަށް ޒުވާން އެތުލީޓު ސިފަކޮށްފަވާއިރު، މިފަދަ ބޮޑު ކާމިޔާއެއް ލިބުމުން ކުރެވޭ އިހްސާސް ބުނެދޭން ނޭނގޭކަމަށް އޭނާ ބުންޏެވެ.

"މުޅި ޓީމާމެދު ފަޚުރުވެރިވަން. އަދިވެސް މިތިބީ ގަބޫލުކުރަންވެސް ދަތިވެފަ. ވަރަށް މަސައްކަތުން މިކާމިޔާބީ ލިބުނީ. އެހެންވީމަ ހުރިހާ ކުދިންވެސް އަދިވެސް މިތިބީ ޕްރޮސެސިންގަ. ވަރަށް އުފާވެއްޖެ. މުބާރާތަށް ފުރީވެސް ރަން މެޑައްޔެއްގެ އަމާޒުގައި. މިއީ ދުވަސްވީ ހުވަފެނެއް ހަގީގަތަކަށްވުން. ވަރަށް އުފާވެއްޖެ" ލައިސާ ބުންޏެވެ.

މިމުބާރާތުގެ ތެރެއިން ލައިސާ އަދި އީނާ ވަނީ ވުމަން ކެނޑިޑޭޓް މާސްޓާ ޓައިޓަލް ވެސް ހޯދާފައެވެ. ފިޑޭ ރޭޓިން ވަކި ވަރަކަށް ހަމަވުމުން މި ޓައިޓަލް ލިބޭއިރު، މިއީވެސް ޤައުމީ ކުޅުންތެރިންގެ އިތުރު މުހިންމު ކާމިޔާބީއެކެވެ. މުބާރާތުގެ ތަޖުރިބާ ހިއްސާކުރަމުން ލައިސާބުނީ އެންމެ އުނދަގޫ މެޗުތަކަކަށްވީ މިސްރާ ދެކޮޅަށް ކުޅުނު މެޗުތައްކަމަށެވެ. މިސްރުން މުބާރާތުގައި ވާދަކުރީ ވުމެން އިންޓަނޭޝަލް މާސްޓާސް ޓައިޓްލްގެ ކުޅުންތެރިންކަމަށާ އުންމީދަކީ ކުރިއަށް އޮތްތަނުގައި އިތުރު ހިތްވަރެއްކޮށް، އެ ޤައުމުވެސް ބަލިކުރުންކަމަށް ލައިސާވަނީ ބުނެފައެވެ.

"އެންމެ އުނދަގޫ މެޗަކީ މިސްރާ ދެކޮޅަށް ކުޅުނު މެޗު. އެއީ ވުމެން އިންޓަނޭޝަލް މާސްޓާސް ކުޅުންތެރިންތަކެއް. އެއީ ވަރަށް ވަރުގަދަ ޓީމެއް. އެޓީމާ ވާދަކޮށް އަޅުގަނޑުމެން ބަލިވި. އެހެންނަމަވެސް އިރާދަކުރެއްވިއްޔާ ދެން އަންނަ އަހަރެއްގައި މިސްރުވެސް ބަލިކުރެވޭތޯ ވަރަށް މަސައްކަތްކުރާނަން" ލައިސާ ބުންޏެވެ.

މިމުބާރާތުގެ ތެރެއިން ލައިސާ އަދި އީނާވަނީ ޑަބްލިއުސީއެމް ޓައިޓްލްވެސް ހޯދާފައެވެ. ފިޑޭ ރޭޓިން ވަކި ވަރަކަށް ހަމަކޮށްގެން މި ޓައިޓަލް ހޯދޭއިރު، މިއީވެސް ޤައުމީ އެތުލީޓުންގެ ކާމިޔާބީއަށް އިތުރުވި މުހިންމު ބޮޅެކެވެ. ބައިނަލްއަޤްވާމީ މިމުބާރާތުގެ ކާމިޔާބީއަކީ ކުޅުންތެރިންނަށް ލިބުނު އިތުރު ހިތްވަރެއްގެ ގޮތުގައި ލައިސާ ދެކެއެވެ. އަދި ކާމިޔާބީއަކީ މަސައްކަތްކޮށްފިނަމަ ވަރަށް ގާތުގައިވާ އެއްޗެއްކަމަށް ލައިސާވަނީ ފާހަގަކޮށްފައެވެ.

"ވަރަށް ބޮޑު ހިތްވަރެއް. މިމުބާރާތް ކުޅުނީމަ އެނގުނީ ބަލިނުކުރެވޭނެ އެއްވެސް ކުޅުންތެރިޔަކު ނުހުންނާނެކަން. ބޭނުންވަނީ އިތުރު ޕުޝްއެއްކަން އެނގިގެން ހިނގައްޖެ" ލައިސާ ބުންޏެވެ.

46ވަނަ ޗެސްއޮލިމްޕިއާޑުގައި ވާދަކޮށް ތާރީޚީ ކާމިޔާބީއަކާއެކު، ޤައުމަށް ރަން މެޑަލް ގެނެސްދިން ޓީމުގައި ހިމެނެނީ ރާއްޖޭގެ އެއްވަނަ އަންހެން ކުޅުންތެރިޔާ ނިހާޔާ އަހްމަދު، އީނާ ޢަބްދުﷲ ހަސަން، މަރްޔަމް ލައިސާ ޢަބްދުއްރަޝީދު، ޢާއިޝަތު އަލްޔާ މުހައްމަދު ޝަރީފްގެ އިތުރުން ޢާއިޝަތު ނޯޔާ ޝަހުރުއްދީން އަފީފެވެ.