އަމީނީ މަގު މަރާމާތުކުރި ސަރަޙައްދު އާދިއްތަ ދުވަހު ހުޅުވާލަނީ

އަމީނީ މަގުގައި މަރާމަތުކުރި ސަރަޙައްދު އަންނަ އާދިއްތަ ދުވަހު އާއްމު ދަތުރުފަތުރުކުރުމަށް ހުޅުވާލާނެކަމަށް ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

މަގު މަރާމަތުކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ.

އަމީނީ މަގުގައި ހަލާކުވެފައިވާ ސަރަހައްދު މަރާމާތުކުރުމުގެ މަސައްކަތް ކުރިއަށްގެންދަނީ ދެ ސެގްމަންޓަކަށެވެ. އޭގެތެރެއިން ދުއްވުމަށް ހުޅުވާލުމަށް ތައްޔާރުވެފައިވަނީ ސެގްމަންޓް 1ގެ ގޮތުގައި ހިމެނޭ، ދިވެހިރާއްޖޭގެ އަޑުން ފަށައިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދެވެ.

ސެގްމަންޓް 2ގެ ގޮތުގައި، ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމަތީގައި ތާރު އެޅުމުގެ މަސައްކަތްވެސް މިހާރު ވަނީ ނިންމާފައެވެ. އެ ސަރަޙައްދުތަކުގައި ކުރިން އަޅާފައިވާ ތާރުގަނޑު ނަގާ އަދި މަގުގެ އަޑީގެ ނެޓްވޯކްތައްވެސް އަލުން ވަނީ ތަރުތީބުކޮށްފައެވެ.

ތާރުގެ މަސައްކަތް ނިމި މިހާރު ކުރަމުންދަނީ ޓްރެފިކް ނިޝާންތައް ކުރެހުމާއި، ފިނިޝިންގައި ހިމެނޭ އެހެނިހެން މަސައްކަތްތަކެވެ. ބިނާރާ ބެހޭ ވުޒާރާއިން ވިދާޅުވީ މަގުގެ އެންމެހާ މަސައްކަތް ނިންމާ، އާދިއްތަ ދުވަހު އާއްމު ދަތުރުފަތުރަށް ހުޅުވާލާނެކަމަށެވެ.

ދެން ފަށާނީ ސެގްމަންޓް 3 ގެ މަސައްކަތެވެ. ސެގްމަންޓް 3ގެ ގޮތުގައި ކުރިއަށްގެންދަނީ އިއްޒުއްދީން މަގާ ހަމައިން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަޙައްދެވެ.

އަމީނީ މަގު މާފަންނާވީ ފަޅީގެ ބައިތައް މަރަމާތު ކުރުމުގެ މަސައްކަތް ކުރިއަށްގެންދިޔައީ އެ ސަރަޙައްދުގެ ތާރުގަނޑު ވަރަށް ބޮޑަށް ހަލާކުގެ ވަޅުގަނޑުތައް ހެދެމުންދާތީ، އުޅަނދުތައް ދުއްވުމަށް ދަތިވުމުގެ ސަބަބުންނެވެ. މަގުގެ އެ ސަރަޙައްދަކީ ބަސް ދަތުރުކުރާ އަދި ގިނަ އަދަދަކަށް ހެވީ ވެހިކަލްވެސް ދުއްވާ ސަރަޙައްދެކެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ކުރަމުންދާ މަސައްކަތުގެތެރެއިން، މާލޭގެ ހުޅަނގުކޮޅުން ބޭރު މަގު ތަރައްޤީކުރުމުގެ މަޝްރޫޢު ފެށުމަށްވެސް ވަނީ ތައްޔާރުވެފައެވެ. އެގޮތުން މިހާރު ވަނީ ވެސްޓް ޕާކް ސަރަޙައްދުން ބައެއް، ފެން ހިންދާ ނިޒާމުގެ މަސައްކަތް ކުރުމަށެ ބަންދުކޮށްފައެވެ.

ބޮޑުތަކުރުފާނު މަގު ތާރު އަޅާ، ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން މިހާތަނަށް ވަނީ ހެންވޭރު ފެރީ ޓަރމިނަލުން ފަށައިގެ، ނޯތް ހާބަރާ ހަމައަށް އޮންނަ ސަރަޙައްދު ތަރައްޤީކުރުމުގެ މަސައްކަތް މުޅިން ނިންމާފައެވެ. މިއާއެކު އެ ސަރަޙައްދުތަކުގެ ތޮއްޖެހުމާއި ދަތުރުފަތުރަށް ބޮޑު ލުޔެއް ވަނީ ލިބިފައެވެ.