ރަސްމާލެ މަޝްރޫޢު: އެހެން އިންވެސްޓްމެންޓްތަކަށްވުރެ އެޑްވާންސް ބޮޑު

ރަސްމާލޭގައި ހިންގާ މަޝްރޫޢުން އެޑްވާންސް ގޮތުގައި ލިބޭ އަދަދަކީ ރާއްޖޭގެ މީގެ ކުރިން ބޭރުގެ ބަޔަކާއި ހަވާލުކޮށްގެން ކުރިއަށް ގެންދިޔަ މަޝްރޫޢުތަކަށް ވުރެ ބޮޑު އަދަދެއް ކަމަށް ބިނާރާއި ގެދޮރުވެރިކަމާއި އުމްރާނީ ތަަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

ބިނާރާ ގެދޮރުވެރިކަމާއި އުމްރާނީ ތަަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު މިހެން ވިދާޅުވިެފައި މިވަނީ ރަސްމާލެ ތަރައްޤީ ކުރުމުގެ މަޝްރޫޢާ ގުޅިގެން ސިޔާސީ ބައެއް ފަރާތްތަކުން ފާޅުކުރެއްވި ކަންބޮޑުވުންތަކާ ގުޅިގެންނެވެ.

މިކަމާއި ގުޅޭގޮތުން ޕީއެސްއެމް ނިއުސްއަށް މައުލުމާތުދެއްވަމުން، ބިނާރާއި ގެދޮރުވެރިކަމާއި އުމްރާނީ ތަަރައްޤީއާ ބެހޭ ވަޒީރު ޑރ. އަބްދުﷲ މުއްޠަލިބު ވިދާޅުވީ މިމަޝްރޫޢުގެ ދަށުން އާންމު އުސޫލުން ނަގުދު ފައިސާގެ ގޮތުގައި ފައިސާ ނުލިބުނު ނަމަވެސް، ރާސްމާލޭގެ އަސްލު މަޝްރުޢު ފެށުމުގެ ކުރިން، އެޑްވާންސް ގޮތުގައި ބޯހިޔަވާހިކަމުގެ މަޝްރޫޢުއެއް ފެށިގެން ކުރިއަށްދާނެ ކަމަށް ވަޒީރު ވިދާޅުވިއެވެ.

އީގަލް ހިލްސްއާއެކު މިވަގުތު ސޮއިކޮށްފައިވާ ކޮމާޝަލް ޓަރމްސް އެގްރީމެންޓް ދަށުން، 5000 ހައުސިންގ ޔުނިޓުގެ ބޯހިޔާވަހިކަމުގެ މަޝްރުޢޫއެއް މަޝްރުޢޫގެ ރަސްމާލެ ތަރައްޤީ ކުރުމުގެ އެޑްވާންސްގެ ގޮތުގައި ކުރިއަށް ގެންދާނެ ކަމަށް ވަޒީރު ވިދާޅުވިއެވެ. މިއީ 500 މިލިޔަން ޑޮލަރު ނުވަތަ 7.7 ބިލިޔަން ރުފިޔާގެ ބޯހިޔާވަހިކަމުގެ މަޝްރޫޢުއެކެވެ.

"އެކުއިޒިޝަން ކޮސްޓްގެ ގޮތުގައި މިސާލަކަށް ޖީއެމްއާރަށް އެއަރޕޯޓު ދީގެން ލިބުނީ 78 މިލިޔަން ޑޮލަރު. އެނބޫދޫ ފަޅު ދީގެން އެކުއިޒިޝަން ކޯސްޓުގެ ގޮތުގައި ލިބުނު 40 މިލިޔަން ޑޮލަރު. އެއާއި ގުޅުވައި ބަލާނަމަ އެތައް ގުނައެއް ބޮޑު އަދަދެއް މި ލިބިގެންދިޔައީ. އެހެންވީމަ އެޑްވާންސް ފައިސާ ނުލިބޭ ވާހަކައަކީ، ކޭޝްގެ ގޮތުގައި ނުލިބުނު ކަމުގައިވިއަސް، ދިވެހި ރައްޔިތުންނަށް ސީދާ މަންފާވާގޮތަށް، ބޯހިޔާވަހިކަމުގެ މަޝްރޫޢެއް ހިންގުމަށްޓަކައި އެބޭފުޅުން، އެބޭފުޅުންގެ ޕްރޮޖެކްޓުން ފައިސާ ލިބުމުގެ ކުރީން އެ 500 މިލިޔަން ޑޮލަރަށްވާ ޕްރޮޖެކްޓް ހިންގަދޭން އެއްބަސްވީ. " ވަޒީރު މުއްޠަލިބު ވިދާޅުވިއެވެ.

ރަސްމާލެ ތަރައްޤީގެ މަޝްރޫޢު މާލެ ސަރަހައްދުގައި ކުރިއަށް ގެންދަން ނިންމާފައިވަނީ އީގަލް ހިލްސް ކުންފުނިން ބަލަންޖެހޭ ކަންކަން ބެލުމަށް ފަހު ކަމަށް ވަޒީރު ވިދާޅުވިއެވެ. މިއީ ބޭރުގެ ބައެއްގެ އަމިއްލަ އިންވެސްޓްމެންޓެއް ކަމުން، މިމަޝްރޫޢޫ ވަކި ސަރަހައްދެއްގައި ހިންގުމަށް ސަރުކާރުން ނުނިންމާނެ ކަމަށް ވަޒީރު ވިދާޅުވިއެވެ. އޭގެ ބަދަލުގައި ސަރުކާރުން އިސްކަން ދިނީ މަޝްރުޢޫގެ ފައިދާ ދިވެހިންނަށް އެންމެ ބޮޑަށް ކުރާނެ ގޮތަކާއި މެދު ކަމަށް ބިނާރާ ބެހޭ ވަޒީރު ވިދާޅުވިއެވެ.

"ރަސްމާލޭގެ އެއްބައިގަ ދިވެހިން ދިރިއުޅޭއިރު ފަރާތްތައް އާބާދުވެ ތަރައްޤީވާނީ އެތާ ކައިރީ އެވަރުގެ މަސައްކަތެއް ކުރެވިގެން، ސަރުކާރަށްވެސް މުހިންމު ކަމަކަށްވި އެތާ ކައިރީ މީހުން އާބާދުވެގެން ދައިރު، އިޤްތިޞާދީ މަންފާތަކާއި ވަޒީފާގެ ފުރުސަތު ލިބިގެން ދިއުން. އެހެންވީމަ، އެފަރާތުންވެސް ދޭންވެގެން ރަސްމާލޭގައި ޕްރޮޖެކްޓް ހިންގަން. ސަރުކާރަށްވެސް ވަރަށް ގިނަ ފައިދާތަކެއް ހުރީމަ އެއާއެކު ކުރިއަށް މިދަނީ." ވަޒީރު މުއްޠަލިބު ވިދާޅުވިއެވެ.

ރަސްމާލޭގައި 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" އާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކުރީ މި މަހުގެ 21ވަނަ ދުވަހުއެވެ. މިމަޝްރޫޢުގެ ދަށުން 500 ހެކްޓަރުގެ ސަރަހައްދު އީގަލް ހިލްސްއިން ތަރައްޤީ ކުރާނައެވެ. ރަސްމާލޭގައި އިޤްތިޞާދީ މަޝްރޫޢެއް ކުރިއަށްގެންދިޔަ ނަމަވެސް އެތަނުގައި ރައްޔިތުންނަށް ކަނޑައަޅާފައިވާ އެއްވެސް ގޯއްޗެއް، ނުވަތަ ފްލެޓް އެޅުމުގެ މަޝްރޫޢެއް ކެންސަލް ހުއްޓާނުލާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.