ވަޠަނީ ޚިދުމަތުގެ 4ވަނަ ބުރު: މާލެ ސަރަހައްދުގެ އިންޓަވިއުތައް ނިމިއްޖެ
-
12 ރަށެއްގައި އަދިވެސް އިންޓަވިއުތައް ކުރިއަށްދާނެ
-
މި ހަފްތާ ތެރޭގައި ދެން ހުރި ޓެސްޓުތައްވެސް ކުރިއަށްގެންދާނެ
ދިވެހި ވަޠަނީ ޚިދުމަތުގެ ޕްރޮގްރާމުގެ ހަތަރުވަނަ ބުރަށް ބައިވެރިން ހޮވުމަށް މާލެ ސަރަހައްދުގައި ބޭއްވި އިންޓަވިއު ޕްރޮސެސް ނިންމާލައިފިއެވެ.
މިބެޗަށް ބައިވެރިން ހޮވުމަށް މާލެ ސަރަހައްދުގައި އިންޓަވިއުތައް ކުރިއަށްގެންގޮސްފައިވަނީ އާދިއްތަ އަދި ހޯމަ ދުވަހުއެވެ.
ދިވެހި ވަޠަނީ ޚިދުމަތުގައި ބައިވެރިވުމަށް އެޕްލިކޭޝަން ހުށަހަޅާފައިވާ ފަރާތްތަކުގެ ތެރެއިން ނެޝަނަލް ސަރވިސް އިނީޝިއަލް ޓްރޭނިންގެ ހަތަރުވަނަ ބެޗުގައި ފުރުޞަތު ދީފައިވަނީ 3ވަނަ ބެޗަށް ކުރިމަތިލުމަށް ހުޅުވާލި ފުރުޞަތުގައި ޖާގަ ނުލިބުނު ކުދިންނަށެވެ.
މި ބެޗަށް ބައިވެރިން ހޮވުމުގެ މަރުހަލާގައި، އިންޓަވިއުއާއި، މެޑިކަލް ޓެސްޓްތަކާއި، އެޕްޓިޓިއުޑް ޓެސްޓްގެ އިތުރުން ފިޓްނަސް ޓެސްޓްތައްވެސް ބައިވެރިން ފުރިހަމަކުރާނެއެވެ. އެގޮތުން މާލެ ސަރަހައްދުގައި ބޭއްވި އިންޓަވިއު ޕްރޮސެސް މިހާރު ނިންމާލާފައިވާއިރު، ރާއްޖޭގެ 12 ސަރަހައްދެއްގައި އަދިވެސް އިންޓަވިއުތައް ކުރިއަށްގެންދާނެއެވެ.
މީގެ ތެރޭގައި ހއ.ދިއްދޫ، ށ.ފުނަދޫ، ނ.މަނަދޫ، ރ.އުނގޫފާރު، އދ.މަހިބަދޫ، ފ.ނިލަންދޫ، ތ.ވޭމަންޑޫ، ލ.ގަން، ކުޅުދުއްފުށި ސިޓީ، ތިނަދޫ ސިޓީ، ފުވައްމުލައް ސިޓީ އަދި އައްޑޫ ސިޓީ ހިތަދޫ ހިމެނެއެވެ. އަދި މިކަމަށް އެމްއެންޑީއެފުގެ 5 ޓީމެއް އެކި ސަރަހައްދުތަކުގައި މިވަގުތުވެސް ދަނީ ހަރަކާތްތެރިވަމުންނެވެ.
ހަތަރުވަނަ ބެޗަށް ބައިވެރިން ހޮވުމުގެ މަރުހަލާގައި، އިންޓަވިއުއާއި، މެޑިކަލް ޓެސްޓްތަކާއި، އެޕްޓިޓިއުޑް ޓެސްޓްގެ އިތުރުން ފިޓްނަސް ޓެސްޓްތައްވެސް ބައިވެރިން ފުރިހަމަކުރާނެއެވެ. އަދި މީގެ ތެރެއިން މާލެ ސަރަހައްދުގައި ބޭއްވި އިންޓަވިއު ޕްރޮސެސް މިހާރު ނިންމާލާފައިވާއިރު، މި ހަފްތާގެ ތެރޭގައި ދެން ހުރި ޓެސްޓުތައްވެސް ކުރިއަށްގެންދިއުމަށް ވަނީ ހަމަޖެހިފައެވެ.
ދިވެހި ވަޠަނީ ޚިދުމަތުގެ ޕްރޮގްރާމަކީ، އަމިއްލަ ނަފުސަށް އިތުބާރުކުރާ، އަގީދާ ވަރުގަދަ، ރޫހާނީ އަދި ޖިސްމާނީ ގޮތުން ދުޅަހެޔޮ، ދިވެހި ގައުމިއްޔަތަށް ލޯބިކުރާ، ޒިންމާދާރު ޒުވާން ޖީލެއް ބިނާކުރުމަށް ރައީސުލްޖުމްހޫރިއްޔާ ޑރ، މުޙައްމަދު މުޢިއްޒު އިސްނަންގަވައިގެން ކުރިއަށްގެންދާ ހަރަކާތެކެވެ.
ހަތަރުވަނަ ބުރަށް ބައިވެރިން ހޮވުމުގެ މަސައްކަތް ކުރިއަށްދާއިރު މި އަހަރުގެ ޖޫން މަހުގެ 19ވަނަ ދުވަހު ވަނީ ތިންވަނަ ބުރުގެ ޓްރެއިނިންގވެސް ފަށާފައެވެ. ދިފާއީ ވުޒާރާއިން ވިދާޅުވީ، އެ ބެޗްގެ ބައިވެރިން މިހާރު ޅ. މާފިލާފުށީގައި ތަމްރީނުތައް ފުރިހަމަ ކުރަމުންދާ ކަމަށެވެ.