ޕްރީ ސީޒަން ޓުއަރގައި ދެކުނު ކޮރެއާއަށް ގޮސް އުޅޭ އިނގިރޭސި ޕްރިމިއަރ ލީގުގެ މެންޗެސްޓަރ ސިޓީ އާއި ސްޕެނިޝް ލަލީގާގެ އެތުލެޓިކޯ މެޑްރިޑްގެ މެދުގައި ކުޅުނު ރަހްމަތްތެރިކަމުގެ މެޗު ސިޓީއިން ކާމިޔާބު ކޮށްފިއެވެ.
ދެކުނު ކޮރެއާގެ ވެރިރަށް ސޯލްގެ ސޯލް ވޯންޑް ކަޕް ސްޓޭޑިއަމްގައި ކުޅުނު މިމެޗު ސިޓީއިން ކާމިޔާބު ކޮށްފައިވަނީ ފަހަތުން އަރާ 3 ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. ނަމަވެސް މިއާއެކުވެސް މިމެޗުގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ އެތުލެޓިކޯއިންނެވެ. މެޗުގެ 43 ވަނަ މިނެޓްގައި މޯޓެން ހިޔުލްމަންޑް ތަނަވަސްކޮށްދިން ފުރުސަތެއްގައި މިލަނޑު ކާމިޔާބު ކޮށްފައިވަނީ އުމުރުން 16 އަހަރުގެ ހޯގޭ ޑޮމިންގޭޒްއެވެ.
މިމެޗުގައި ސިޓީއިން ކާމިޔާބު ކުރި ފުރަތަމަ ލަނޑު މެޗުގެ 57 ވަނަ މިނެޓުގައި އެންޓޮއިން ސެމެންޔޯ ތަނަވަސްކޮށްދިން ފުރުސަތެއްގައި ޖަހައިދީ މެޗުގެ ނަތީޖާ ހަމަހަމަ ކޮށްދީފައިވަނީ އޮމަރު މަރްމޫޝްއެވެ. މިލަނޑު ޖެހިތާ 2 މިނެޓް ފަހުން ސިޓީއަށް މިމެޗުގައި ލީޑު ނަގައިދިނީވެސް ސެމެންޔޯގެ އެސިސްޓެއްގައި މަރްމޫޝްއެވެ.
50 ހާހަށް ދުރެ ގިނަ މީހުން ކުޅިބަލަށް ދަނޑަށް ވަން މިމެޗުގައި އެންމެ އަޑުގަދަވެގެންދިޔައީ އެތުލެޓިކޯއަށް ކުޅޭ ދެކުނު ކޮރެއާގެ ބައިނަލްއަޤްވާމީ ކުޅުންތެރިޔާ ލީ ކާން އިން ދެވަނަ ހާފުގައި ކުޅެން އެރުވުމުންނެވެ. މިމެޗުގައި ލީއަށްވަނީ މެޗުގެ ނަތީޖާ ހަމަހަމަ ކުރާނެ ރަނގަޅު ފުރުސަތެއް ލިބިގެން ގޮސްފައެވެ. ނަމަވެސް އޭނާ ފޮނުވާލި ހަމަލާ އަމާޒުވީ ގޯލްގެ ދަނޑި އަށެވެ. މިމެޗުގައި ސިޓީގެ ފަހު ލަނޑު މެޗުގެ 90 ވަނަ މިނެޓުގައި ކާމިޔާބު ކޮށްދިނީ ރަޔަން އައިޓް ނޫރީއެވެ.
މިމެޗާއެކު ސިޓިއިން އޭޝިއާއަށް ކުރި ޕްރި ސީޒަން ޓުއަރ މިވަނީ ނިމުމަކަށް އައިސްފައެވެ. މިފަހަރުގެ ޓުއަރގައި އެޓީމުން ތިން މެޗު ކުޅުނު އިރު ފުރަތަމަ މެޗުގައި އިޓާލިއަން ސެރީއާގެ އިންޓަރ މިލާން އަތުން ޕެނަލްޓީ ޖަހައިގެން 3 ލަނޑު އެއް ލަނޑުން ބަލިވިއިރު ޖެހިގެން އައި މެޗުގައި ކޭ ލީގުގެ އޯލް ސްޓަރ ޓީމާއި ބައްދަލުކޮށް 3 ލަނޑު އެއް ލަނޑުން ވަނީ މޮޅުވެފައެވެ. ސިޓި ދެން ކުޅުމަށް ހަމަޖެހިފައިވަނީ ކާޑިފްގެ ޕްރިންސިޕަލިޓީ ސްޓެޑިއަމްގައި މިއަންނަ އާދިއްތަ ދުވަހު ކުޅުމަށް ހަމަޖެހިފައިވާ ކޮމިއުނިޓީ ޝީލްޑް މެޗުގައެވެ. މިމެޗުގައި އެފް އޭ ކަޕްގެ ޗެމްޕިއަނުންގެ ހައިސިއްޔަތުން ސިޓީ ބައްދަލުކުރާނީ އިންގްލިޝް ޕްރިމިއަރ ލީގުގެ ޗެމްޕިއަން އާސެނަލް އާއެވެ.
ސިޓީގެ ކޯޗު ކަމާއި މިސީޒަންގައި ހަވާލުވި އެންޒޯ މަރެސްކާއަށް މިފަހަރުގެ އޭޝިއަން ޓުއަރގައި މަސައްކަތް ކުރަން ޖެހިފާވީ އެޓީމުގެ މުހިންމު ގިނަ ކުޅުންތެރިން ތަކަކާއި ނުލައެވެ. މިގޮތުން ވޯލްޑް ކަޕަށް ފަހު އާލިންގ ހާލަންޑް، ރޮޑްރީ، ރަޔަން ޗާކީ، ޖެރެމީ ޑޯކޫ، މާކް ގޭހީ، ނީކޯ އޯރައިލީ އަދި އެލިއޮޓް އެންޑަސަން މިފަހަރުގެ ޓުއަރގައި ބައިވެރިވެފައެއް ނުވެއެވެ.