ކުރިޔަށް އޮތް ހިޖުރީ އައު އަހަރު، އަންނަ އާދީއްތަ ދުވަހު ފެށޭނެއެވެ.
މިނިސްޓްރީ އޮފް އިސްލާމިކް އެފެއަރޒުން ކުރައްވާފައިވާ އިޢުލާނެއްގައިވާ ގޮތުން، ހިނގަމުން މިދާ ހިޖުރީގޮތުން 1437 ވަނަ އަހަރުގެ ޛުލްޙިއްޖާ މަހުގެ 29 ވަނަ ދުވަހަކީ، އެކެއް އޮކްޓޯބަރ 2016 ވާ ހޮނިހިރު ދުވަހެވެ. އަދި ޛުލްޙިއްޖާ މަހަކީ އެ މަހުގެ 29 ވަނަ ދުވަހު، މަސްނިމޭ މަހެއް ކަމަށްވުމާއެކު، ޖެހިގެން އަންނަ އާދީއްތަ ދުވަސް ކަމަށްވާ އޮކްޓޯބަރ މަހުގެ 2 ވަނަ ދުވަހަކީ 1438 ވަނަ އަހަރުގެ 1 ވަނަ ދުވަސް ކަމަށް އިސްލާމިކް މިނިސްޓްރީން ނެރުއްވި އިޢުލާނުގައި ވަނީ ކަނޑައަޅުއްވާފައެވެ.
މިގޮތަށް ހަމަޖެއްސެވުމާ ގުޅިގެން، ރާއްޖޭގެ ރަސްމީ ކަލަންޑަރުގައި މުޙައްރަމްގެ 1 ވަނަ ދުވަހުގެ ގޮތުގައި ކަނޑައެޅިފައިވާ އާދީއްތަ ދުވަސް ކަލަންޑަރުގައި މިހާރު އޮތްގޮތާ ވަނީ ދިމާވެފައެވެ. އަދި ރާއްޖޭގައި ހިޖުރީ އައު އަހަރު ފެށޭ ދުވަހަކީ ރަސްމީ ބަންދު ދުވަހެއް ކަމަށްވުމާއެކު އެ ދުވަސް ކަލަންޑަރުން ދިމާވާ، އަންނަ އާދީއްތަ ދުވަހަކީ ރަސްމީ ބަންދު ދުވަހެކެވެ.