އެމެރިކާގެ މޭޖަރ ލީގުގެ އީސްޓަރން ކޮންފަރެންސްގައި އިއްޔެ އިންޓަރ މަޔާމީ އާއި ދެކޮޅަށް އޯލަންޑޯ ސިޓީ ކުޅުނު މެޗު ފަހަތުން އަރާ 4-2 ގެ ނަތީޖާއަކުން އިންޓަރ މަޔާމީ ކާމިޔާބުކޮށްފި އެވެ.
މި ސީޒަނުގެ ފުރަތަމަ މެޗުގައި ލޮސް އެންޖަލެސް އެފްސީ އާއި ދެކޮޅަށް ކުޅުނު މެޗު އިންޓަރ މަޔާމީ ބަލިވެފައިވާއިރު މި މެޗަށް އެ ޓީމުން ނިކުމެފައިވަނީ ޖެހިޖެހިގެން ދެ ބަލިނުވުމުގެ ނިޔަތުގަ އެވެ.
އެންމެ ފަހުގެ ޗެމްޕިއަން އިންޓަރ މަޔާމީ އާއި ދެކޮޅަށް އޯލަންޑޯ ކުޅުނު މި މެޗުގެ ފުރަތަމަ 25 މިނިޓުގެ ތެރޭގައި އެ ޓީމުން ވަނީ އިންޓަރ މަޔާމީ ކޮޅަށް ދެ ލަނޑު ޖަހާފަ އެވެ. މި ދެ ލަނޑު އެ ޓީމަށް ކާމިޔާބުކޮށްދީފައިވަނީ މާކޯ ޕަސަލިޗް އާއި މާޓިން އޮޖޭޑާ އެވެ.
ނަމަވެސް ދެވަނަ ހާފުގެ ކުޅުން ފެށުނުތާ ހަތަރުވަނަ މިނިޓުގައި އިންޓާރ މަޔާމީގެ މަޓެއޯ ސިލްވެޓީ ވަނީ އޭރިޔާ ބޭރުން ފޮނުވާލި ބާރު ހަމަލާ ގޯލުގެ ތެރެއަށް ފޮނުވާލާފަ އެވެ.
މި މެޗުގެ ނަތީޖާ އިންޓަރ މަޔާމީ އިން އެއްވަރު ކޮށްފައިވަނި މެޗުގެ 57 ވަނަ މިނިޓުގައި ކެޕްޓަން ލިއޮނެލް މެސީ ކާމިޔާބުކޮށްދިން ލަނޑުންނެވެ.
އިންޓަރ މަޔާމީ އިން މި މެޗުގައި ފުރަތަމަ ފަހަރަށް ލީޑު ނަގާފައިވަނީ މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް ޓެލަސްކޯ ސެގޯވިއާ ކާމިޔާބުކޮށްދިން ލަނޑުންނެވެ. އަދި މެޗުގެ 90 ވަނަ މިނިޓުގައި ލިއޮނެލް މެސީ ވަނީ އިތުރު ލަނޑެއް ޖަހާ މެޗުގެ ނަތީޖާ 4-2 އަށް ބަދަލުކޮށްފަ އެވެ.
މިއީ އޯލަންޑޯގެ ދަނޑުން އިންޓަރ މަޔާމީ އެންމެ ފަހުން ކުޅުނު 9 މެޗުގެ ތެރެއިން އެ ޓީމު މޮޅުވި ފުރަތަމަ ފަހަރެވެ.