އައިޓީބީ ބާލިންގައި ރާއްޖެ: މިހާރު ކުރިއަށްދަނީ ފަހުގެ ތައްޔާރީތައް

އައިޓީބީ ބާލިންއަށް ދިވެހިރާއްޖެއިން އެންމެފަހުގެ ތައްޔާރީތައް ވަމުން އަންނަކަމަށް ވިޒިޓް މޯލްޑިވްސްއިން ހާމަކޮށްފިއެވެ.

މިއަހަރުގެ ބާލިން ފެއަރ އޮންނާނީ މިމަހުގެ 3ވަނަ ދުވަހުން ފެށިގެން 5ވަނަ ދުވަހާއި ހަމައަށެވެ.

ވިޒިޓް މޯލްޑިވްސް ކޯޕަރޭޝަނުން ވިދާޅުވީ، ޖަރުމަނުވިލާތުގެ ބާލިންގައި ބޭއްވުމަށް ހަމަޖެހިފައިވާ ދުނިޔޭގެ އެންމެ ބޮޑު އެއް ޓޫރިޒަމް ފެއަރ ކަމަށްވާ "އައިޓީބީ ބާލިން" ގައި ރާއްޖެ އިސްތިހާރުކުރުމަށްޓަކައި ވާންޖެހޭ އެންމެހައި ތައްޔާރީތައް މިހާރު ވަމުންދާ ކަމަށެވެ. އަދި މިއަހަރުގެ ފެއަރގައި ތައްޔާރުކުރާ ރާއްޖޭގެ ސްޓޭންޑުގެ މަސައްކަތްތައްވެސް މިހާރު ގާތްގަނޑަކަށް އެއްކޮށް ނިމިފައިވާ ކަމަށެވެ.

ވިޒިޓް މޯލްޑިވްސް ކޯޕަރޭޝަން، ވީއެމްސީން ވިދާޅުވީ، ކުރީ އަހަރުތަކޭ އެއްގޮތަށް މިއަހަރުގެ ފެއަރގައިވެސް ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ރިސޯޓުތަކާއި، ގެސްޓްހައުސްތަކުގެ އިތުރުން ލިވަބޯޑްތަކާއި، މި ސަނާއަތުގައި ސިދާ އަދި ނުސީދާގޮތުންވެސް ހަރަކާތްތެރިވާ ފަރާތްތަކުން ބައިވެރިވެފައިވާ ކަމަށެވެ. އެގޮތުން މިއަހަރުގެ ފެއަރގައި 63 ކުންފުންޏަކުން މީހުން ބައިވެރިވާނެ ކަމަށް އެކުންފުނިން މައުލޫމާތު ދެއެވެ.

ނަމަވެސް، މިހާރު ދުނިޔޭގެ މަސްރަހުގައި ހުރި ގޮންޖެހުންތަކާއި، ފްލައިޓްތައް ކެންސަލްވުމުގެ ސަބަބުން އައިޓީބީގައި ބައިވެރިވާ ބައެއް ފަރާތްތަކަށް އަދި ޖަރުމަނަށް ވަޑައިނުގެންނެވޭކަމަށް ވިޒިޓް މޯލްޑިވްސްއިން މައުލޫމާތު ދެއެވެ. އެހެންނަމަވެސް، ކުރިއަށް އޮތް ދުވަސްތަކުގައި އެފަރާތްތަކުންވެސް ޖަރުމަނަށް ވަޑައިގަންނަވާނެ ކަމަށް އެކޯޕަރޭޝަނުން ވިދާޅުވެއެވެ.

ކުރީ އަހަރުގެ ފެއަރތަކޭ އެއްގޮތަށް މިއަހަރުގެ ފެއަރގައިވެސް ބީޓުބީ މީޓިންތައް ބޭއްވުމަށް ވަނީ ހަމަޖެހިފައެވެ. އަދި މިއަހަރުގެ ފެއަރގެ ހަވާސާގައި ބޭއްވޭ މުހިއްމު ދެ ހަރަކާތް ކަމަށްވާ "މޯލްޑިވިއަން ނައިޓް" އަދި ނޫސްވެރިންގެ ބައްދަލުވުންވެސް ބޭއްވުމަށް ވަނީ ހަަމަޖެހިފައެވެ. އަދި ފެއަރގެ ތެރޭގައި ރާއްޖޭގެ މަންޒިލް އިސްތިހާރުކުރުމުގެ ކަންކަން ވީ އެންމެ ފުރިހަމައަށް ކުރިއަށްގެންދާނެ ކަމުގެ ޔަގީންކަން ވީއެމްސީން ވަނީ ދެއްވާފައެވެ.

ޖަރުމަނަކީ ރާއްޖޭގެ ފަތުރުވެރިކަމަށް މުހިންމު މާކެޓެކެވެ. ފަތުރުވެރިކަމާއި ބެހޭ ވުޒާރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ އަހަރު ޖަރުމަނުން ރާއްޖެއަށް 167,822 ފަތުރުވެރިން ވަނީ ޒިޔާރަތްކޮށްފައެވެ. މިއީ އޭގެ ކުރީ އަހަރާއި އަޅާ ބަލާއިރު 6.7 އިންސައްތަ އިތުރު އަދަދެކެވެ. އަދި ޖަރުމަނަކީ ރާއްޖެއަށް އެންމެ ގިނައިން ފަތުރުވެރިން އަންނަ ފަސް ގައުމުގެ ތެރޭގައި ހިމެނޭ ގައުމެކެވެ.

މި ފެއަރގެ ސަބަބުން ޖަރުމަނުގެ އިތުރުން ޔޫރަޕުގެ މާކެޓުން ރާއްޖެއަށް އަންނަ ފަތުރުވެރިންގެ އަދަދު އިތުރުވެ، ރާއްޖޭގެ ފަތުރުވެރިކަމަށް އިތުރު ކުރިއެރުން ލިބޭނެ ކަމަށް ސަރުކާރުން އުންމީދު ކުރައްވައެވެ.