ހުޅުމާލޭގައި ޤާއިމްކުރަމުން އަންނަ ބައިނަލްއަޤުވާމީ އެކުއެޓިކް ކޮމްޕްލެކްސްގެ މަސައްކަތް ކުރިއަށްދާ ގޮތް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ބައްލަވާލައްވައިފިއެވެ.
އެކުއެޓިކް ކޮމްޕްލެކްސް ގާއިމްކުރަނީ ހުޅުމާލޭ ސްޕޯޓްސް ކޮމްޕްލެކްސް އިމާރާތާއި ޖެހިގެން އޮންނަ ބިމުގައެވެ.
އެކުއެޓިކް ކޮމްޕްލެކްސްގައި މިވަގުތު ކުރިއަށްދަނީ މައި ޕޫލް ރޭވުމުގެ މަސައްކަތް ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން ވިދާޅުވެއެވެ.
ބައިނަލްއަޤްވާމީ މިންގަނޑުތަކާ އެއްގޮތަށް ޤާއިމްކުރާ މި ކޮމްޕްލެކްސްގައި ފެތުމަށް ހާއްސަ ޕޫލަކާއި، ޑައިވް ޕޫލެއްގެ އިތުރުން، 1200 މީހުންނަށް ކުޅިބަލަންތިބެވޭނެ އިންތިޒާމްތައްވެސް ހުންނާނެއެވެ.
10 އެޕްރީލް 2025 ގައި ބިންގާ އެޅި ޕޫލަށް ބޭނުންވާ ހުރިހާ ސާމާނެއް ރާއްޖެއިން ބޭރުން ގެނެސްފަވާއިރު، މި ޕޫލު ވެގެންދާނީ ސަރަހައްދީ ފެންވަރުގައިވެސް ދިވެހިން ފަޚުރުވެރިވާނެ ވަސީލަތަކަށް ކަމަށް ކުޅިވަރު ވަޒީރު ރާފިޢު ވަނީ މީގެ ކުރިން ވިދާޅުވެފައެވެ.
ކުޅިވަރު އެތުލީޓުންނަށް ފަހި ފުރުސަތުތައް ފަހިކޮށްދީ ވަސީލަތްތައް ގާއިމްކޮށްދެއްވުމަށް މި ސަރުކާރުން ކުރައްވަމުން އަންނަ ކާމިޔާބު މަސައްކަތްތަކުގެ ދަށުން، އެކިއެކި ކުޅިވަރުތަކަށް ޙާއްސަ ވަސީލަތްތައް އަންނަނީ ގާއިމްކޮށްދެއްވަމުންނެވެ. އަދި ގިނަ ކުޅިވަރުތަކެއް ކުޅެވޭނެ ގޮތަށް، މަލްޓިސްޕޯޓްސް ކޮމްޕްލެކްސްތަކެއް ގާއިމްކުރުމުގެ މަސައްކަތް ވެސް އަންނަނީ ކުރަމުންނެވެ.