ގެއްލިގެން ހޯދި ޢަބްދުލް ޢަޒީޒު ހުރީ ތިލަފުށީގައި، ހާލު ރަނގަޅު

ގެއްލިގެން ހޯދަމުން އަންނަކަމަށް ފުލުހުން ހާމަކުރި ޢަބްދުލްޢަޒީޒު މުޙައްމަދު ހުރީ ތިލަފުށީގައިކަމަށް އޭނާ ފުލުހުންނަށް އަންގައިފިއެވެ.

މުދާ އުފުލާ ދޯންޏެއްގައި މަސައްކަތް ކުރާ ޏ.ފުވައްމުލަށް ދޫޑިގަން، ދުންފިނިގެ، އުމުރުން 64 އަހަރުގެ ޢަބްދުލްޢަޒީޒު މުޙައްމަދު ގެއްލިގެން ހޯދަން ފަށާފައިވަނީ އޭނާގެ ޚަބަރެއް އާއިލާއަށް ނުވެ ގިނަ ދުވަސްތަކެއްވުމުންނެވެ. ފުލުހުން އިއްޔެ ހާމަކުރައްވާފައިވާގޮތުގައި ޢަބްދުލްޢަޒީޒު މުޙައްމަދުގެ ޢާއިލާއަށް އާއިލާއަށް އޭނާގެ ޚަބަރެއް އެންމެ ފަހުން ވެފައިވަނީ 2025 ސެޕްޓެންބަރު 3 ވަނަ ދުވަހު ފޯނުންނެވެ. އަދި ޢަބްދުލްޢަޒީޒު މުޙައްމަދު އާއިލާގެ މީހަކަށް އެންމެ ފަހުން ފެނިފައިވަނީ 2025 ނޮވެންބަރު މަސްތެރޭގައި އައިޖީއެމްއެޗް ކައިރިން ކަމަށް ވެސް އޭނާގެ އާއިލާއިން ފުލުހުންނަށް މައުލޫމާތު ދީފައިވެއެވެ.

މިކަމާ ގުޅިގެން ޢަބްދުލްޢަޒީޒު މުޙައްމަދު ހޯދަން ފުލުހުން އިއްޔެ އިޢުލާންކޮށްފައިވަނިކޮށް އޭނާގެ އާއިލާއަށާއި ފުވައްމުލަކު ޕޮލިސް ސްޓޭޝަނަށް ގުޅައި، އޭނާ ހުރީ ތިލަފުށީގައި ކަމާއި ހާލު ރަނގަޅުކަމަށް ޢަބްދުލްޢަޒީޒު މުޙައްމަދު މަޢުލޫމާތު ދީފައިވާކަމަށް ފުލުހުން ވިދާޅުވިއެވެ.

ޢާއިލާއަށް ޚަބަރެއް ނުވެ ގިނަ ދުވަސްތަކެއް ވުމުން ފުލުހުންނަށް ހުށަހަޅާ މައްސަލަތަކުގައި އޭނާއާއި ބެހޭ މައުލޫމާތު ހޯދުމަށް އެކަމަށް އޮންނަ އިޖުރާޢަތްތަކުގެ ދަށުން އާންމުކޮށް ފުލުހުން ޢިއުލާން ކުރެއެވެ.