ހުރިހާ އަތޮޅެއްގައިވެސް ސެން ޔުނިޓް ޤާއިމްކުރަނީ

ސްކޫލް ނިޒާމުގެ ތެރެއިން ޚާއްޞަ އެހީއަށް ބޭނުންވާ ކުދިންނަށް އުގަންނައިދެއްވުމަށް ސަރުކާރުން ކުރައްވަމުން ގެންދަވާ މަސައްކަތް ކާމިޔާބު ކަމަށާއި، އުންމީދަކީ ހުރިހާ އަތޮޅެއްގައިވެސް ސެން ޔުނިޓް ޤާއިމްކޮށް، ލުއި ފަސޭހަ ގޮތެއްގައި މިފަދަ ކުދިންނަށް ތަޢުލީމާއި ހުނަރު ދަސްކޮށްދިނުންކަމަށް އެޑިއުކޭޝަން މިނިސްޓަރ އާއިޝަތު ޝިހާމް ވިދާޅުވެއްޖެއެވެ.

ސަރުކާރުން މިހާރު ތަންފީޒްކުރައްވަމުން ގެންދަވާ "ހުރިހައި ކުދިން ޝާމިލްކޮށްގެން އުގަންނައިދޭ ސިޔާސަތު"ގެ ދަށުން އެއްވެސް ކުއްޖަކު ބާކީނުކޮށް ތަޢުލީމީ ރަސްމީ ނިޒާމްގެ ތެރޭގައި ހިމަނުއްވައިގެން އެކުއްޖެއްގެ ޤާބިލިއްޔަތު ހުރި މިންވަރަކުން ތަޢުލީމް އުގައިންނައިދެއްވުމާއި ހުނަރު ދަސްކޮށްދެއްވުމުގެ މަސައްކަތް ސަރުކާރުން ގެންދަވަނީ ކުރައްވަމުންނެވެ.

img:http://s4.psmnews.mv/images/660x400/8052.jpg|އިމާދުއްދީން ސްކޫލް / ފޮޓޯ: ޕީއެސްއެމް

މާލެސިޓީގައި ވަކި ނުކުޅެދުންތެރިކަމަށް ސްކޫލްތައް ޚާއްޞަ ކުރައްވައިގެން މިމަސައްކަތް ކުރިޔަށް ގެންދަވާއިރު، އިވުމުން މަޙްރޫމްވެފައިވާ ކުދިންނާއި، އިވުމުގައި ބައެއް މައްސަލަތައް ހުރި ކުދިންނަށް ޖަމާލުއްދީން ސްކޫލްގައި އަދި ފެނުމުން މަޙްރޫމްވެފައިވާ އަދި ފެނުމުގެ މައްސަލަތައް ހުންނަ ކުދިންނަށް ޚާއްޞަ ކްލާސްތަކެއް ކަލާފާނު ސްކޫލްގައި ހިންގަވައެވެ. ހަމައެއާއެކު ޢިމާދުއްދީން ސްކޫލާއި، އަމީނިއްޔާ ސްކޫލާއި، ހިރިޔާ ސްކޫލްގައިވެސް ޖިސްމާނީ އަދި ނަފްސާނީ ނުކުޅެދުންތެރިކަން ހުންނަ ކުދިންނަށް ޚާއްޞަ ސެން (ސްޕެޝަލް އެޑިއުކޭޝަނަލް ނީޑްސް) ކްލާސްތަކެއް އުފައްދަވާ ގިނަ ޢަދަދެއްގެ ކުދިންނަށް، ތަޢުލީމާއި އެކިއެކި ތެރަޕީތައް ދެމުންދާކަން ފާހަގަކޮށްލެވެއެވެ.

އެޑިއުކޭޝަން މިނިސްޓަރ ޢާއިޝަތު ޝިހާމް ވިދާޅުވީ "ހުރިހައި ކުދިން ޝާމިލްކޮށްގެން އުގަންނައިދޭ ސިޔާސަތު" ތަންފީޒް ކުރެއްވުމަށް ކުރައްވަމުން ގެންދަވާ މަސައްކަތް ކާމިޔާބު ކަމަށާއި، މީގެ ދަށުން ތަޢުލީމް އުގެނޭ ކުދިންގެ ނިޞްބަތް ވަރަށް ބޮޑަށް އިތުރުވެގެން ހިނގައްޖެކަމަށެވެ. މިނިސްޓަރ ވިދާޅުވީ، ނުކުޅެދުންތެރިކަމާމެދު ހޭލުންތެރިކަންކުޑަކަމުންނާއި އަދި ޚިދްމަތްދޭ ފަރާތްތައް މަދުކަމުން އަދިވެސް މިކުދިންނަށް ބޭނުންވާ ހުރިހައި ތަޢުލީމާއި ތަމްރީނާއި އަދި އެހެނިހެންވެސް ހުނަރު ސްކޫލް ނިޒާމްގެތެރެއިން ދެއްވަން މަޖްބޫރުވެފައިވާކަމަށެވެ.

img:http://s2.psmnews.mv/images/660x400/14627930670526.jpg|ރާއްޖޭގެ ސްކޫލެއްގައި ކިޔަވައިދެނީ / ފޮޓޯ: ޕީއެސްއެމް ފައިލް

ސަރުކާރުގެ ޢަމާޒަކީ މިކުދިންނަށް ތަޢުލީމް ފޯރުވައިދެއްވުން ކަމުގައިވީނަމަވެސް މިހުރިހައި ޚިދްމަތްތަކެއް ސެން ކްލާސްތަކުގެ ތެރެއިން ފޯރުކޮށްދޭން ޖެހުމުން މި ސިޔާސަތު ތަންފީޒްކުރެއްވުމަށް ކުރާ މަސައްކަތަށް އަދިވެސް ގޮންޖެހުންތައް އެބަހުރިކަން މިނިސްޓަރ ފާހަގަ ކުރެއްވިއެވެ. އެހެންކަމުން އާދައިގެ ކްލާސްތަކުގައި ކުދިން ބައިތިއްބައިގެން އެހީދެވެން ނެތް އަތޮޅުތެރޭގެ ސްކޫލްތައް ބައްލަވައި އެސްކޫލްތަކުގައި ސެން ކްލާސްތައް ޤާއިމްކުރަން މަސައްކަތްކުރައްވަމުން ގެންދަވާކަމަށް މިނިސްޓަރު ވިދާޅުވިއެވެ.

މިނިސްޓަރ ވިދާޅުވީ،އަތޮޅުތެރޭގެ ބޮޑެތި ސްކޫލްތަކުގައި މިހާރުވެސް ސެން ކްލާސް ޤާއިމްކުރެވި، އަދި ސެންކްލާސް ނެތް އަތޮޅުތަކުގައި ފޯކަލް ޕޮއިންޓް ހަމަޖައްސަވައި ވަކި އުޞޫލެއްގެ ދަށުން، އެފަދަ ސްކޫލްތަކުގައިވެސް ނުކުޅެދުންތެރިކަން ހުންނަ ކުދިންނަށް ޚިދްމަތް ފޯރުކޮށްދެމުންދާކަމަށެވެ. އަދި ސެން ކްލާސް އުފެއްދުމަށާއި އަދި މިފަދަ ކުދިންނަށް އުނގައިންނައިދޭ ޚާއްޞާ ޓީޗަރުން ތަމްރީންކުރެއްވުމަށް ވަރަށް އަހަމިއްޔަތުކަމެއް ދެއްވާކަމަށް މިނިސްޓަރ ވިދާޅުވިއެވެ.

ސަރުކާރުގެ ޢާމާޒަކީ 2016 ގެ ނިޔަލަށް ރާއްޖޭގެ ކޮންމެ ސްކޫލެއްގައި ސްޕެޝަލް އެޑިއުކޭޝަން ދާއިރާއިން ޚާއްޞަވެފައިވާ ޓީޗަރެއްގެ ޚިދްމަތް ދެވޭނޭ އިންތިޒާމް ހަމަޖެއްސުމެވެ. މީގެ ދަށުން މިފަދަ ޓީޗަރުން އުގަންނައިދެއްވުމަށް ކުރައްވަމުން ގެންދަވާ މަސައްކަތުގެ ދަށުން 2015 ވަނަ އަހަރު 52 އަދި 2016 ވަނަ އަހަރުގެ މިހާތަނަށް 160 ޓީޗަރުން ވަނީ ތަމްރީންކުރައްވާފައެވެ.

 ދިވެހި ޤައުމީ ޔުނިވަރސިޓީގައި މިހާރު ސްޕެޝަލް އެޑިއުކޭޝަނުގެ މަތީތަޢުލީމް އުގަންނައިދެއްވަން ފަށްޓަވާފައިވާއިރު، އެޔުނިވަރސިޓީގައި ކިޔަވައިދޭ ހުރިހާ އެހެން ކޯސްތަކުގައިވެސް މިދާއިރާގެ މޮޑިއުލެއް ވަނީ ހިމަނާފައެވެ. އަދި ނޭޝަނަލް އިންސްޓިޓިއުޓް އޮފް އެޑިއުކޭޝަނުންވެސް ގެންދަވަނީ ޚާއްޞަ ޓީޗަރުން ތަމްރީންކުރެއްވުމަށް މަސައްކަތް ކުރަމުންނެވެ.