މޭނާ ސްކޫލުގެ ހުރިހާ ގޮތަކުން އެންމެ މޮޅު ދަރިވަރުންނަށް ސަހުދީއާއި އިނާން

މޭނާ ސްކޫލުގެ މިދިޔަ އަހަރުގެ، ހުރިހާ ގޮތަކުން އެންމެ މޮޅު ދަރިވަރުގެ މަޤާމް އާއިޝަތު އިނާން ހަމީދުއާއި މުޙައްމަދު ސަހުދީ އަޙުމަދު ލިބިއްޖެއެވެ. މޭނާ ސްކޫލުގެ އަހަރީ އިނާމް ދިނުމުގެ ޖަލްސާގައި، ހުރިހާ ގޮތަކުން އެންމެ ފާހަގަކޮށްލެވުނު ދަރިވަރުންނަށް ތައްޓާއި ހަނދާނީ ލިޔުން ވަނީ ޙަވާލުކޮށްފައެވެ.

2023-2024ވަނަ އަހަރު، އެ ސުކޫލުން ސާނަވީއިން އެންމެ މޮޅު ދަރިވަރަަކަށް ހޮވިފައިވަނީ އާއިޝަތު އިނާން ހަމީދުއެވެ. އަދި މަތީ ސާނަވީއިން އެންމެ މޮޅު ދަރިވަރަަކަށް ހޮވިފައިވަނީ މުޙައްމަދު ސަހުދީ އަޙުމަދުއެވެ.

އާއިޝަތު އިނާން ހަމީދު ވަނީ، ސާނަވީއިން އެސުކޫލުގެ އެންމެ މޮޅު ދަރިވަރުގެ މަޤާމުގެ އިތުރުން ކިޔެވުމަށް އެންމެ މޮޅު ގާލް ގައިޑްގެ މަޤާމްވެސް ހޯދާފައެވެ.

ސާނަވީ އަދި މަތީ ސާނަވީ ތަޢުލީމު ދެމުންދާ މޭނާ ސްކޫލުގެ އިނާމު ދިނުމުގެ ޖަލްސާ ރޭ ބޭއްވިއިރު، މިޖަލްސާގައި އެސްކޫލުގެ 9، 10، 11، އަދި 12ގައި ކިޔަވާ ދަރިވަރުންގެ ތެރެއިން އެކި ވަނަ ތަކަށް ހޮވުނު ދަރިވަރުންނަށް ވަނީ އިނާމު ދީފައެވެ.

މޭނާ ސްކޫލުގެ އިނާމު ދިނުމުގެ ޙަފްލާ ޝަރަފުވެރިކޮއްދެއްވީ ޞިއްޙީ ވުޒާރާގެ ޑެޕިއުޓީ މިނިސްޓަރ ޢަހްމަދު ހަމްދާން ނާސިރެވެ.

2023-2024 ވަނަ އަހަރުގައި، އެ ސްކޫލުގެ އެންމެ މޮޅު ސްކައުޓް ދަރިވަރަކަށް ހޮވިފައިވަނީ ހަސަން ރީމާޒް އަޙްމަދެވެ. އަދި ކިޔެވުމުން އެންމެ މޮޅު ސްކައުޓް ދަރިވަރަކަށް ހޮވިފައިވަނީ މުޙައްމަދު ޝާމިސްއެވެ.

މީގެއިތުރުން، އެ ސްކޫލުގެ އެންމެ މޮޅު ގައިޑް ދަރިވަރަކަށް ހޮވިފައިވަނީ، ޙައްވާ މިޝްކާ ހުސައިންއެވެ. އަދި ކިޔެވުމަށް އެންމެ މޮޅު ގައިޑް ދަރިވަރަކަށް ހޮވިފައިވަނީ އައިޝަތު އިނާން ހަމީދެވެ.

މޭނާ ސްކޫލަކީ ސާނަވީ އަދި މަތީ ސާނަވީ ތަޢުލީމު ދެމުންދާ ސްކޫލެކެވެ. އެގޮތުން އެ ސްކޫލުގައި މިހާރުވެސް 400އެއްހާ ދަރިވަރުން ކިޔަވަމުންދާއިރު، 18 މުވައްޒަފުން ސްކޫލުގައި މަސައްކަތްކުރެއެވެ. އަދި މިދިޔަ އަހަރުގެ އޯލެވެލް އިމްތިހާނުގައި އެ ސްކޫލުގެ ދަރިވަރުން ބައިވެރިވެ، 4 ކުއްޖަކު ވަނީ ޤައުމީ ގަދަ ދިހައެއްގައި ހިމެނިފައެވެ.