ޚާއްޞަ ރައްކާތެރިކަމާއި، ހިމާޔަތް ބޭނުންވާ ކުޑަކުދިންނާއި ގުޅުން ހުރި މައްސަލަތަކާ ބެހޭގޮތުން މަޝްވަރާ ކުރެއްވުމަށް، ސްޓޭކް ހޯލްޑާސް ވާރކިންގް ގްރޫޕެއް މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ އުފައްދަވައިފިއެވެ.
ކަމާގުޅުންހުރި ސަރުކާރުގެ އިދާރާތަކާއި، ވުޒާރާތަކާއި، މުއައްސަސާތަކުގެ ބައިވެރިވުން ހިމެނޭ ގޮތަށް އިއްޔެ އެކުލަވާލެއްވި މި ވޯކިންގް ގްރޫޕްގައި، މިނިސްޓްރީ އޮފް ހޯމް އެފެއާޒާއި، ޖުވެނައިލް ޖަސްޓިސް ޔުނިޓާއި، މޯލްޑިވްސް ޕޮލިސް ސާވިސްގެ ދަށުން ހިންގަވާ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓެމެންޓާއި، ޕްރޮސެކިއުޓަރ ޖެނެރަލްގެ އޮފީހުގެ އިތުރުން ޔުނިސެފްވެސް ހިމެނެއެވެ.
މިނިސްޓްރީ އޮފް ޖެންޑަރ އެންޑް ފެމިލީން މަޢުލޫމާތު ދެއްވާ ގޮތުގައި، މި ވޯކިންގް ގްރޫޕް އެކުލަވާލެއްވުމުގެ މައިގަނޑު މަޤްޞަދަކީ، ޚާއްޞަ ރައްކާތެރިކަން ފޯރުވައިދެއްވަން ޖެހިވަޑައިގަންނަވާ، ކުޑަކުދިންނާއި ގުޅުންހުރި މަސައްކަތްތަކުގައި ބައިވެރިވާ އެންމެހައި މުއައްސަސާތަކުގެ މެދުގައި އޮންނަ ގުޅުން ހަރުދަނާކުރައްވައި އެކީގައި މަސައްކަތް ކުރެއްވުމެވެ.
އަދި މި ގްރޫޕްގެ ސަބަބުން، ކަމާގުޅުންހުރި މުއައްސަސާތަކުގެ މެދުގައި އޮންނަ ގުޅުން އިތުރަށް ބަދަހިވެ، މިފަދަ މަސައްކަތްތައް ހަލުވިކަމާއެކު ކުރިޔަށް ގެންދެވޭނެ ނިޒާމެއް ޤާއިމްވެގެންދާނެ ކަމަށް އުންމީދު ކުރައްވާ ކަމަށް މިނިސްޓަރ އޮފް ޖެންޑަރ އެންޑް ފެމިލީ، ޒެނީޝާ ޝަހީދު ޒަކީ ވިދާޅުވިއެވެ.
ސްޓޭކް ހޯލްޑާސް ވޯކިންގް ގްރޫޕްގެ އިތުރުން، މިނިސްޓަރ ވަނީ، މިނިސްޓްރީގެ އިސް މަސްއޫލުވެރިން ހިމެނޭ ގޮތަށް، ޚާއްޞަ ޓާސްކްފޯސްއެއްވެސް އެކުލަވާލައްވާފައެވެ.
ޓާސްކްފޯސްއަކީ، މިނިސްޓްރީގެ ބެއްލެވުމުގެ ދަށުން، މަރުކަޒުގައި ދިރިއުޅޭ ކުދިންނަށް ދިމާވާ ޚާއްޞަ މައްސަލަތައް ޙައްލު ކުރުމުގައި، މިނިސްޓްރީގެ ސެކްޝަންތަކުގެ މެދުގައި ވިލަރެސް ކުރައްވައި، ހަލުވިގޮތެއްގައި މަސައްކަތް ކުރިޔަށް ގެންދެވުމަށް މިނިސްޓަރ އެކުލަވާލެއްވި ޓާސްކްފޯހެކެވެ.