ދިވެހިރާއްޖޭގައި އުކާލާ ޕްލާސްޓިކާއި، ފަރުތަކާއި، މޫދު ސާފުކޮށްގެން ނަގާ ޕްލާސްޓިކް ބޭނުންކޮށްގެން ދުނިޔޭގެ ނަން މަޝްހޫރު "އެޑިޑާސް" ކުންފުނިން ފަރުމާކޮށްފައިވާ ފުރަތަމަ ހޭންޑްމޭޑް 100 ބޫޓުގެ ތެރެއިން ބޫޓެއް، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އަރުވައިފިއެވެ.
މި ބޫޓު ރައީސުލްޖުމްހޫރިއްޔާއަށް އެރުވީ އިއްޔެ ރައީސުލްޖުމްހޫރިއްޔާގެ އޮފީހުގައި ބޭއްވެވި ބައްދަލުކުރެއްވުމެއްގައި، ބަޔޯޑައިވަރސިޓީ އެޑިޔުކޭޝަން އެންޑް އެވެއަރނަސް (ބީމް) ގެ ފައުންޑިންގ މެންބަރ ޝާހީނާ ޢަލީ އާއި، ދުނިޔޭގެ ކަނޑުތައް ޙިމާޔަތްކުރުމަށްޓަކައި މަސައްކަތްކުރާ އަމިއްލަ ޖަމްޢިއްޔާއެއްކަމަށްވާ "ޕާލޭ" ގެ ފައުންޑިންގ މެންބަރ ސިރިލް ގުޝްސްއެވެ.
ރާއްޖޭގެ ގޮނޑުދޮށްތަކުން ނަގާފައިވާ ފަސް މިލިޔަން ހަ ސަތޭކައަށްވުރެ ގިނަ ޕްލާސްޓިކް ފުޅި މިހާތަނަށް އެޑިޑާސް ކުންފުންޏަށް ފޮނުވާފައިވާކަމަށް "ޕާލޭ" ގެ ފައުންޑިންގ މެންބަރ ރައީސުލްޖުމްހޫރިއްޔާއަށް މަޢުލޫމާތު ދެއްވިއެވެ. އަދި، ތިމާވެށި ޙިމާޔަތްކުރުމުގެ މިފަދަ މުހިންމު މަޝްރޫޢެއްގައި ރާއްޖެއިން ޢަމަލީ ގޮތުން ހަރަކާތްތެރިވާ ކަމަށްޓަކައި ރައީސުލްޖުމްހޫރިއްޔާ މަރުޙަބާ ވިދާޅުވިއެވެ.