ދެކުނަށް މިއަދު މޫސުން ގޯސް، މެދު ރާއްޖެތެރެއަށް ކެރީގެ އަސަރު ފޯރާނެ

ދެކުނާއި މެދުތެރޭގެ އަތޮޅުތަކަށް މިއަދު މޫސުން ގޯސްވާނެ ކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.

މޫސުމާބެހޭ ޤައުމީ އިދާރައިން ވިދާޅުވީ، ދެކުނާއި މެދުރާއްޖޭގެ އަތޮޅުތަކަށް މޫސުން ގޯސްވާނެކަމަށް ލަފާކުރެވުނަސް އުތުރުގެ އަތޮޅުތަކަށް މޫސުން މިއަދު އާންމުގޮތެއްގައި ރަނގަޅުވާނެ ކަމަށެވެ. މެޓުން ވިދާޅުވީ ދެކުނުގެ އެކި ހިސާބަށް ވިއްސާރަ ކުރާނެކަމަށް އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ.

މޫސުން ގޯސްވެ، ބޯކޮށް ވާރޭވެހޭނެކަމަށް ލަފާކޮށް މެޓް އޮފީހުން ވަނީ ރޭގެ ވަގުތުތަކުގައި ލ އަތޮޅުން ފެށިގެން އައްޑޫ ސިޓީއަށް ހުދު ސަމާލުނެރެފައެވެ. ހުދު ސަމާލުގެ ވަގުތުތަނީ މިއަދު ހެނދުނު 6:30 ހަމައަށް ހަމަވެފައެވެ.

ކަނޑުތައް އާދައިގެވަރަކަށް މަޑުވެފައި، ދެކުނުގެ އަތޮޅުތަކަށް ދެކުނާއި ހުޅަނގުދެކުނުން އަދި އެހެން ހިސާބުތަކަށް އުތުރާއި އިރުއުތުރުން ގަޑިއަކު 05 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެކަމަށް މެޓުން ވިދާޅުވިއެވެ. އަދި ރާޅުގެ އުސްމިން ހުންނާނީ 1 ފޫޓާ 4 ފޫޓާއި ދެމެދުގައި ކަމަށްވެސް އެއިދާރާއިން ވިދާޅުވިއެވެ.

މޫސުން ގޯސްވާނެކަމަށް ލަފާކުރެވޭތީ ޚާއްސަކޮށް ކަނޑު ދަތުރުކުރާ ފަރާތްތަކުންނާއި ޢާންމުކޮށް ހުރިހާ އެންމެންވެސް މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ.