އީމާންކަމާއި، ކެތްތެރިކަމުން ހިމާޔަތް ލިބިގެންފި މީހަކަށް ދަރުމައާއި ސަވާބު ހިސާބެއްނެތި ދެއްވާނެ: ޚުޠުބާ

ދިމާވާ މުޞީބާތްތަކުގައި، އީމާންކަމާއި، ކެތްތެރިކަމުން ހިމާޔަތް ލިބިގެންފިނަމަ، ދުނިޔެއާއި އާޚިރަތުގައި ދަރުމައާއި ސަވާބު ހިސާބެއްނެތި ދެއްވާނެކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.

މިއަދުގެ ހުކުރު ޚުޠުބާގެ މަޢުޟޫއަކީ ޤަޟާ ޤަދަރަށް އީމާންވުމެވެ.

ހުކުރު ހުޠުބާގައި ވިދާޅުވީ ޤަޟާ ޤަދަރަށް އީމާންވާ މީހަކު އޭނާގެ ޙަޔާތް ހޭދަކުރަމުންދާނީ ހިތްހަމަޖެހުމާ އެކުގައިކަމަށެވެ. ފިތުނައިގެ ސަބަބުން އެ ފަދަ މީހަކު ގުޑުގުޑުއަޅައިގެން ނުދާނެ ކަމަށެވެ. އަދި ދަތި އުނދަގޫކަމެއް ދިމާވުމުން އެފަދަ މީހަކު ބަލިކަށިވެގެން ވެސް ނުދާނެ ކަމަށާއި، ހުރިހާ ކަމެއް މެދުވެރިވެގެންދަނީ މާތް اللهގެ ޢިލްމުފުޅާއި އެކަލާނގެ އިރާދަފުޅުންކަން އިޢުތިޤާދުކުރާ ބަޔަކު ބިރުގަނެ، ހިތްނުތަނަވަސްވެ، މާޔޫސްވާކަށް ނުޖެހޭނެކަން ހުކުރު ޚުތުބާގައިވަނީ ހަނދާންކޮށްދީފައެވެ. އަދި ދިމާވެފައިވާ ކަންކަމާ، ހިތާމަކޮށް ފުރާނައަށް ގެއްލުމެއް ނުދޭނެކަން ވެސް ޚުތުބާގައިވަނީ ފާހަގަކުރައްވާފައެވެ.

"ކަލޭގެފާނު ވިދާޅުވާށެވެ! ﷲ އަޅަމެންނަށް ލިޔުއްވައިފައިވާކަމެއް މެނުވީ، އަޅަމެންނަކަށް ނުޖެހޭނެތެވެ. އެކަލާނގެއީ، އަޅަމެންގެ އެހީތެރިވަންތަ ރަސްކަލާނގެއެވެ. ފަހެ، مؤمن ން ހަމައެކަނި، ﷲ އަށް وكيل ކުރާހުށިކަމެވެ!" ޚުޠުބާގައި ވިދާޅުވިއެވެ.

މިއަދުގެ ހުކުރު ޚުތުބާގައި ވިދާޅުވީ ދިމާވާ މުޞީބާތްތަކުގައި، އެންމެ ވަރުގަދަ ހަތިޔާރަކަށް ވާންޖެހޭނީ ޤަޟާޤަދަރަށް އީމާންވުމާއި، ކެތްތެރިކަން އިސްކުރުންކަމަށެވެ.
އަދި އީމާންކަމާއި، ކެތްތެރިކަމުން ހިމާޔަތް ލިބިގެންފިނަމަ، ދުނިޔެއާއި އާޚިރަތުގައި ދަރުމައާއި ސަވާބު ހިސާބެއްނެތި ދެއްވާނެކަމަށެވެ. އަދި މާތްﷲ އެއްވެސް އަޅަކަށް ނުއުފުލެވޭވަރުގެ ތަކުލީފެއް ނުޖައްސަވާނެކަން ފާހަގަކުރައްވާ، ޚުތުބާގައި ވިދާޅުވީ އެކަލާނގެއީ އެންމެ ޢަދުލުވެރި ރަސްކަލާނގެކަމަށާއި، އެކަލާނގެ އެއްވެސް އަޅަކަށް އަނިޔާވެރިވެވޮޑިއެއްނުގަންނަވާނެކަމަށެވެ.

ޚުޠުބާގައި ވިދާޅުވީ މާތް ﷲ މި ކައުނުގައި ލައްވާފައިވާ ހުރިހައި ކަމެއް ލައްވައިފައިވަނީ އަޅުތަކުންގެ މަޞްލަޙަތަށްޓަކައިކަމަށެވެ. އަދި އެކަން އެނގުނުކަމުގައި ވިޔަސް، އަދި ނޭނގުނު ކަމުގައި ވިޔަސް ހިނގާ ހުރިހައި ކަމަކީ އެ ކަމުގައި އެންމެ މަޞްލަޙަތު ހުރި ގޮތް ކަމަށާއި، އެކަލާނގެ ހައްދަވައިފައިވާ ތަކެއްޗާއި އެ ތަކެއްޗަށް މިންވަރުކުރައްވައިފައިވާ ގޮތް ދެނެވޮޑިގެންވާ ފަރާތަކީ ހަމަ އެކަނި މާތް ﷲ ކަން ޚުތުބާގައި ވަނީ ހަނދާންކޮށްދީފައެވެ.

"ތިމަންރަސްކަލާނގެ އުޑާއި، ބިމާއި، އެ ދެމެދުގައި ވާހައި ތަކެތި، ކުޅިވަރެއްގެ ގޮތުގައެއް ނަހައްދަވަމެވެ." ޚުޠުބާގައި ވިދާޅުވިއެވެ.

ޤަޟާ ޤަދަރަށް ނުވަތަ ހެޔޮމިންވަރާއި ނުބައިމިންވަރަށް އީމާންވުމުގައި ހަތަރު ކަމަކަށް އީމާންވާން ޖެހެއެވެ. އޭގެ ތެރެއިން ފުރަތަމަ ކަމަކީ، މާތް ﷲ ހުރިހައި ކަމެއް ދެނެވޮޑިގެންވާކަމަށް އީމާންވުމެވެ. ދެވަނަކަމަކީ ލައުހުލް މަހްފޫޒް ގައި މާތް ﷲ ހުރިހާ ކަމެއް ލިޔުއްވާފައިވާކަމަށް އިމާންވުމެވެ. އަދި ތިންވަނަ ކަމަކީ، ކޮންމެ ކަމެއްވެސް ހިނގަމުންދަނީ އެކަލާނގެ އިރާދަފުޅުންކަމާއި، އިރާދަފުޅާ ނުލައި އެއްވެސްކަމެއް ނުހިނގާނެކަމަށް އީމާންވުމެވެ. ހަތަރު ވަނަ ކަމަކީ ކައުނާއި ކައުނުގައި ވާހައި ތަކެއްޗެއް ހެއްދެވީ މާތް ﷲ ކަމަށް އީމާންވުމެވެ.