މާލެ ސަރަޙައްދަށް މިއަދުވެސް ވައި ނުސާފު

މިއަދުވެސް މާލެ ސަރަޙައްދަށް ވައި ނުސާފު ވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ. އެ އިދާރާއިން ވިދާޅުވީ، އުތުރާއި، މެދުރާއްޖެތެރޭގެ ރަށްތަކަށް ވައި ނުސާފުވީނަމަވެސް ދެކުނުގެ ރަށްތަކަށް ވައި ސާފު ވާނެކަމަށެވެ.

މޫސުމާބެހޭ ޤައުމީ އިދާރާއިން ވިދާޅުވީ، މި ދުވަސްވަރު ރާއްޖޭގެ ވައި ނުސާފުވަނީ ރާއްޖޭގެ އިރުމަތިން ބޭރުން އަންނަ ދުމުގެ ސަބަބުންކަމަށެވެ. ވައި ނުސާފުވުމުގެ ސަބަބުން ލޮލަށް ފެންނަ ދުރުމިން ވަރަށް ބޮޑަށް ވަނީ ދަށްވެފައެވެ. އެގޮތުން ސާފު ދުވަހެއްގައި 10 ކިލޯމީޓަރަށްވުރެ ދުރު ފެނުނު ނަމަވެސް މާލެ ސަރަޙައްދަށް މިހާރު ލޮލަށް ފެންނަ ދުރުމިން 4 ކިލޯމީޓަރަށް ވުރެ ދަށްވެފައިވާކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ.

އެ އިދާރާޢިން ވިދާޅުވީ، ކޮންމެ އަހަރެއްގެވެސް މި ދުވަސްވަރު ރާއްޖޭގެ އެކި ހިސާބުތަކަށް ވައިނުސާފުވާކަމަށެވެ.

ވައިނުސާފުވާ ވަގުތުތަކުގައި ރައްކާތެރިވުމުގެ ގޮތުން ފުއްޕާމޭގެ ބަލިތަކާއި ހިތުގެ ބަލި އަދި އެލާޖީ މައްސަލަ ހުންނަ މީހުން ގެއިން ބޭރުގައި ގިނަވަގުތު ހޭދަނުކުރުމަށް އެޗްޕީއޭއިން އިލްތިމާސްކުރައްވައެވެ. އެގޮތުން، ބޭރަށް ނިކުންނަ ވަގުތުތަކުގައި މާސްކު އެޅުމާއި، ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަވަގުތު ހޭދަނުކުރުމާއި ތުއްތު ކުދިން ބޭރަށް ނުނެރުމަކީ ރައްކާތެރިވުމުގެ ގޮތުން އެޅިދާނެ ފިޔަވަޅުތަކެކެވެ.