އެންމެ ބޮޑު އިސްކަމެއް ދިނީ ރައްޔިތުން ރައްކާތެރި ހިސާބުތަކަށް ގެންދިއުމަށް: ދިފާޢީ ވަޒީރު

އަލިފާނުގެ ހާދިސާ ހިނގުމުން އެންމެ ބޮޑު އިސްކަމެއްދެއްވީ އަލިފާންގަނޑު ނިއްވުމާއެކު އާއްމު ރައްޔިތުން ސަލާމަތުގެ އައްސޭރިތަކަށް ގެންދިޔުމަށްކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

މި އިމާރާތަކީ ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ އިތުރުން އިމާރާތްކުރުމާއި ބިނާރާބެހޭ ވުޒާރާވެސް ހިންގަމުން އަންނަ އިމާރާތުގައި ރޯވުމާ ގުޅިގެން އަލިފާން ނިއްވުމަށް ކުރަމުންދާ މަސައްކަތްތައް ވަޒީރު ވަނީ ޕީއެސްއެމް ނިއުސްއާ ހިއްސާކުރައްވާފައެވެ.

އެގޮތުން ވަޒީރު ޣައްސާން ވިދާޅުވީ އަލިފާނުގެ ހާދިސާ ހިނގައިގެން އުޅޭކަމުގެ މަޢުލޫމާތު ލިބުމާއެކު ހެނދުނު 6:30 ހާއިރުންފެށިގެން އެމްއެންޑީއެފްގެ ފަޔަރ ޓީމުން ހަރަކާތްތެރިވާން ފެށިކަމަށެވެ. ވަޒީރު ވިދާޅުވީ އަލިފާނުގެ ހާދިސާއާ ގުޅިގެން އެންމެ ފުރަތަމަ އިސްކަމެއްދެއްވީ އެ ސަރަޙައްދުތަކުގެ ގެ ތަކުގައި އުޅޭ މީހުންނާއި އާންމު ރައްޔިތުންގެ ސަލާމާތުގެ އައްސޭރިއަށް ގެންދިޔުމަށްކަމަށެވެ. އަދި އެ މަސައްކަތް ނިމުނު އިރު އަލިފާންގަނޑު ބޮޑަށް ފެތުރިފައިވާކަމަށް ވަޒީރު ވިދާޅުވިއެވެ.

" ވައި ހުރި ގޮތަށް އަލިފާން އިތުރަށް ފެތުރިދާނެތީ އެއްވެސް ފުރާނައަކަށް ގެއްލުން ލިބުމަކީ އެދޭނެކަމެއް ނޫން. އެމަސައްކަތް ނިމުނު އިރު އަލިފާންގަނޑު ބޮޑަށް ރޯވެފައި ހުރީ" ދިފާޢީ ވަޒީރު ޣައްސާން މައުމޫން ވިދާޅުވިއެވެ.

ވަޒީރު ވިދާޅުވީ އެންޑީއެފްގެ އަލިފާން ނިންވާ ހުރިހާ އާލަތްތަކާއި އިތުރު މުވައްޒަފުންނާއެކުވެސް އަލިފާން ނިއްވުމުގެ މަސައްކަތް ކުރަމުން ދިޔަކަމަށެވެ. އަދި އެމްއޭސީއެލްގެ ވެހިކަލްތައްވެސް އަލިފާން ނިއްވުމަށް ބޭނުންކުރިކަން ވަޒީރު ފާހަގަކުރެއްވިއެވެ. މީގެ އިތުރުން ވަޒީރު ވިދާޅުވީ ހައުސިން މިނިސްޓްރީއާއި ކޮންސްޓްރަކްޝަން މިނިސްޓްރީގެ އިތުރުން ކައިރީގައި ހުރި އެހެނިހެން އިމާރާތްތަކުގައި ހުރި މުހިއްމު ލިޔެކިޔުންތައް ރައްކާތެރި ހިސާބުތަކަށް ބަދަލުކުރުމުގެ މަސައްކަތް ކުރަމުންދާކަމަށެވެ.