އޮންލައިންކޮށް ހުށަހަޅާ ޕާސްޕޯޓުތައް ހުޅުމާލެއިން މިހާރު ނެގޭނެ

"އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް ހުޅުމާލެއިން ނެގޭނެ އިންތިޒާމް ހަމަޖައްސައިފިއެވެ.

އިމިގްރޭޝަނުން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ "އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް ހުޅުމާލެއިން ނެގޭނެ އިންތިޒާމު މިހާރު ހަމަޖެހިފައިވާ ކަމަށެވެ. އެގޮތުން ޕާސްޕޯޓަށް އެދި ހުށައަޅާއިރު، ޕާސްޕޯޓް ނަގަން ބޭނުންވާ ތަން ނުވަތަ ކަލެކްޝަން ޕޮއިންޓެއްގެ ގޮތުގައި ހުޅުމާލޭގެ ސެންޓަރުތައް ޖެހުމުން ޕާސްޕޯޓްތައް ނެގޭނެކަމަށް އިމިގްރޭޝަނުން ވިދާޅުވެއެވެ.

އިމިގްރޭޝަންގެ ޕާސްޕޯޓް ކަލެކްޝަން ސެންޓަރުތައް ހުޅުމާލޭގައި ޤާއިމްކޮށްފައިވަނީ ހުޅުމާލެ ފުރަތަމަ ފިޔަވަހީގައި ހުންނަ އުމަރު ޒާހިރު އޮފީސް އިމާރާތުގެ ތިރީފަންގިފިލާގައެވެ. އަދި ހުޅުމާލެ ދެވަނަ ފިޔަވަހީގެ ވިނަރެސް 2ގެ އެއްވަނަ ފަންގިފިލާގައެވެ.

ހުޅުމާލެއިން ޕާސްޕޯޓުގެ ޚިދުމަތް!
"އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް މިހާރު ހުޅުމާލެއިން ނެގުމުގެ އިންތިޒާމް ވަނީ ހަމަޖެހިފައި. pic.twitter.com/O58awvNjfO

— Maldives Immigration (@ImmigrationMV) December 11, 2024

ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު މިދިޔަ ނޮވްމެބަރު މަހުގެ 16 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ އިފްތިތާހްކޮށްދެއްވާފައެވެ. އައިޑީކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމުގެ މަޝްރޫޢު އެއްކޮށް ނިންމުމަށް ހަމަޖެހިފައިވަނީ އަންނަ އަހަރުގެ ނިޔަލަށެވެ.

ޕާސްޕޯޓުގެ ޚިދުމަތް މިހާރު ލިބެނީ މާލެ ސަރަޙައްދުގެ އިތުރަށް ސިޓީތަކާއި ހއ. ދިއްދޫންނެވެ. އަދި މިހާރު ވަނީ ދ. ކުޑަހުވަދޫގައި ޕާސްޕޯޓް ނެގޭނެ އިންތިޒާމް ހަމަޖައްސާފައެވެ. އަދި މިއަހަރު ލ. ފޮނަދޫގައި އެ ޚިދުމަތް ފެށުމަށް އޮތީ ނިންމާފައެވެ.