އިންޑިއާއާއި ރާއްޖެއާ ދެމެދު ކާގޯ ދަތުރުތައް ކުރިއަރުވަން ނެޓްވޯކިން ސެޝަނެއް ބާއްވައިފި

އިންޑިއާ އާއި ރާއްޖެއާ ދެމެދު ކުރާ ކާގޯ ދަތުރުތައް އިތުރަށް ހަރުދަނާކުރުމަށް ރާއްޖޭގެ ޤައުމީ ޝިޕިންގް ލައިން، އެމްއެސްއެސް އާއި އިންޑިއާގެ ޤައުމީ ޝިޕިން ކޯޕަރޭޝަން، އެސްސީއައި ދެމެދު ނެޓްވޯކިން ސެންޝަނެއް ބާއްވައިފިއެވެ.

މި ނެޓްވޯކިންގ ސެޝަނަކީ އިންޑިއާ ހައިކޮމިޝަންގެ އެހީތެރިކަމާއި އެކު ދެޤައުމުގެ ޤައުމީ ޝިޕިންގް ކުންފުނިތައް ގުޅިގެން ބޭއްވި ބައްދަލުވުމެކެވެ. މި ބައްދަލުވުމުގައި ދެ ޤައުމުގެ އިމްޕޯޓް އަދި އެކްސްޕޯޓް ކުރާ ވިޔަފާރިވެރިން ބައިވެރިވެފައިވެއެވެ. މިކަމާއި ގުޅޭގޮތުން އެމްއެމްއެސްއިން ވިދާޅުވީ މި ބައްދަލުވުމުގައި ރާއްޖެއަށް މުދާ އެތެރެކުރާ 50 ވަރަކަށް ވިޔަފާރިވެރިން ބައިވެރިވެފައިވާ ކަމަށެވެ.

އެމްއެސްއެސްއިން ވިދާޅުވި ގޮތުގައި 2020ވަނަ އަހަރުން ފެށިގެން އިންޑިއާގެ ޓުޓިކޮރިންއާއި ރާއްޖެއާއި ދެމެދު ކާގޯ ޚިދުމަތްތައް ދަނީ ދެމުންނެވެ. މިއާއެކު މި ބައްދަލުވުމަކީ އެ ޤައުމުގެ ޤައުމީ ޝިޕިންގ ކުންފުންޏާއެކު ބޭއްވުނު މިފަދަ ފުރަތަމަ ބައްދަލުވުން ކަމަށެވެ. އަދި މި ބައްދަލުވުގެ ތެރެއިން ސަބަބުން ރާއްޖެއާއި އިންޑިއާ ދެމެދު ކުރެވޭ ކާގޯ ދަތުރުތައް އިތުރަށް ފުޅާކުރެވި ހަރުދަނާ ކުރުމަށް މަގުފަހިވެގެންދާނެ ކަމަށް އެމްއެސްއެސްއިން ވިދާޅުވިއެވެ.

އިންޑިއާއަކީ ރާއްޖެއަށް އެންމެ ގިނައިން އިމްޕޯޓް ކުރާ އެއް ޤައުމެވެ. އެގޮތުން އެމްއެސްއެސްއިން ދަތުރުތައް 2020ވަނަ އަހަރު ފެށިފަހުން، މިހާރު ކޮންމެ މަހަކު އިންޑިއާއާއި ރާއްޖެއާ ދެމެދު 3 ދަތުރު ކުރާ ކަމަށް އެކުންފުނިން ވިދާޅުވެއެވެ.