ޕޯޓް ކޮމްޕްލެކްސް ހުރި ބިމުގައި 25 ފަންގިފިލާގެ އިމާރާތެއް ތަރައްޤީކުރަނީ

ޕޯޓް ކޮމްޕްލެކްސް ހުރި ބިމުގައި 25 ފަންގިފިލާގެ އިމާރާތެއް ތަރައްޤީކުރުމަށް މޯލްޑިވްސް ޕޯޓްސް ލިމިޓެޑުން ނިންމައިފިއެވެ.

މިކަން ހާމަކުރެއްވީ ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމްގައި ވާހަކަދައްކަވަމުން އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމެވެ.

އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވީ ޕޯޓް ކޮމްޕްލެކްސް ހުރި ބިމުގައި 25 ފަންގިފިލާގެ އިމާރާތެއް ތަރައްޤީކުރުމަށް ނިންމާފައިވާކަމަށާއި އެކަމުގެ މަސައްކަތް އަންނަ އަހަރު ތެރޭގައި ފަށާނެކަމަށެވެ. އެތަން އިމާރާތް ކުރުމަށް ހަމަޖެހިފައިވަނީ ލަގްޒަރީ އެޕާޓްމަންޓްތަކާއި ވިޔަފާރީގެ ފުރުޞަތުތައް ފަހިވާނެ ގޮތަކަށްކަމަށް ވިދާޅުވިއެވެ. އަދި އެ އިމާރާތް ތަރައްޤީކުރާނީ ޕާކު ކުރެވޭނެ ޖާގަތަކާއެކު ކަމަށާއި އެކި ފަންގިފިލާތައް ޕާކިންނަށް ޚާއްސަ ކުރާނެކަންވެސް ވަޖީހު ވިދާޅުވިއެވެ.

"މި މަސައްކަތާއެކު އެމްޕީއެލް ވެގެންދާނީ ރާއްޖޭގައި މި ހުރި ކުންފުނިތަކުގެ ތެރެއިން އާމްދަނީ އެންމެ ގިނައިން ލިބޭނެ ކުންފުންޏަކަށް. އިރާދަކުރެއްވިއްޔާ މިކަން ހާސިލްކުރެވޭނެ." އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވިއެވެ.

އެމްޕީއެލްގެ ސީއީއޯ ވަނީ އަންނަ އަހަރު އެކުންފުނިން އިސްކަން ދީގެން ކުރުމަށް ނިންމާފައިވާ އިތުރު ކަންކަމުގެ މަޢުލޫމާތުވެސް ހިއްސާ ކުރައްވާފައެވެ. އެގޮތުން ވިޔަފާރި ބަނދަރުތައް ތަރައްޤީކުރުމަށްޓަކައި މަސައްކަތްވެސް އަންނައަހަރު ކުރައްވާނެކަމަށް ވިދާޅުވިއެވެ.

އެގޮތުން މާލެ ވިޔަފާރި ބަނދަރު ތިލަފުއްޓަށް ބަދަލުކުރުމަށްޓަކައި ކުރަންޖެހޭ މަސައްކަތްތައް އަންނަ އަހަރުތެރޭގައި ކުރާނެކަމަށާއި ލ.އަތޮޅުގައި މެރިޓައިމްގެ ހަރަކާތްތަކެއް ފަށާނެކަމަށް ވިދާޅުވިއެވެ. އަދި އައްޑޫއާއި ކުދުދުއްފުށީ ސިޓީގެ ޕޯޓް އިތުރަށް ތަރައްޤީކުރުމުގެ މަސައްކަތްވެސް ފަށާނެކަމަށް އެމްޕީއެލްގެ ސީއީއޯ މުޙައްމަދު ވަޖީހު ވިދާޅުވިއެވެ.