ގޭންގު ހަދައިގެން ކުރާ ކުށްތައް މަނާކުރުމަށް ޚާއްޞަ ޤާނޫނެއް އެކުލަވާލަނީ

މަސްތުވާތަކެތީގެ ވަބާއިން ދިވެހި ޤައުމު ސަލާމަތްކުރުމަށާއި، ގޭންގު ހަދައިގެން ކުރާ ކުށްތައް މަނާކުރުމަށް ބޭނުންވާ ޤާނޫނު ހެދުމަށް ވަރަށް އަވަހަށް ސަރުކާރުގެ ފަރާތުން މަޖިލީހަށް ހުށައަޅުއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ސޯޝަލް މީޑިއާގައި ކުރެއްވި ޕޯސްޓެއްގައެވެ.

ރައީސް ވިދާޅުވީ، މަސްތުވާތަކެތީގެ ވަބާއިން ދިވެހި ޤައުމު ސަލާމަތްކުރުމަށް ދައުލަތުގެ އިދާރާތަކުން ކުރަމުން އަންނަ މަސައްކަތަށް އޮތް އެންމެ ބޮޑު އެއް ގޮންޖެހުމަކީ މިހާރު އަމަލުކުރަމުންދާ މަސްތުވާތަކެއްޗާބެހޭ ޤާނޫނުގައި ހުރި ބައެއް އުނިކަންކަންކަމަށެވެ. އެހެންކަމުން، މަސްތުވާތަކެތީގެ މައްސަލަތައް ތަޙްޤީޤުކޮށް، ދަޢުވާކުރުމުގައި ހުރި ގޮންޖެހުންތައް ނައްތާލުމަށްޓަކައި، ދައުލަތުގެ ކަމާގުޅުންހުރި އިދާރާތަކުގެ މަޝްވަރާއާއެކު މަސްތުވާތަކެއްޗާބެހޭ ޤާނޫނު ރިވިއުކުރުމަށްފަހު، އެ ޤާނޫނަށް ގެންނަންޖެހޭ އިޞްލާޙުތައް މި ހަފްތާގެ ތެރޭގައި ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާނެކަމަށް އެމަނިކުފާނު ވިދާޅުވިއެވެ.

ހަމައެއާއެކު، މަސްތުވާތަކެތީގެ މައްސަލަތަކާ ވަރަށް ބޮޑަށް ގުޅިފައިވާ ގޭންގު ކުށްތަކުގެ މައްސަލައިން ދިވެހި ޤައުމު ރައްކާތެރިކޮށް ސަލާމަތްކުރުމަށްޓަކައި، މިހާރު އަމަލު ކުރަމުން އަންނަ ގޭންގު ކުށްތައް މަނާކުރުމުގެ ޤާނޫނުގެ ބަދަލުގައި، މިސަރުކާރުގެ ފަރާތުން އަލަށް އެކުލަވާލަމުންދާ ގޭންގު ހަދައިގެން ކުރާ ކުށްތައް މަނާކުރުމުގެ ބިލު ކުރިޔަށް އޮތް 2 ހަފްތާ ތެރޭގައި ސަރުކާރުގެ ފަރާތުން މަޖިލީހަށް ހުށަހަޅާނެކަމަށްވެސް ރައީސް ވިދާޅުވިއެވެ.

ރައީސް ވަނީ، މިފަދަ ބޮޑެތި މައްސަލަތަކަށް ދާއިމީ ޙައްލެއް ގެނައުމަށް ކުރަމުންދާ މަސައްކަތްތަަކަށް ދިވެހި ރައްޔިތުން ދެއްވާ އެއްބާރުލެއްވުމަށް ޝުކުރުއަދާކުރައްވާފައެވެ.

މަސްތުވާތަކެތީގެ ޤާނޫނަށް ގެންނަ އިޞްލާހުތަކުގެ ޑްރާފްޓް ބިލް ދާޚިލީ ސަލާމަތާ ފަންނިއްޔާތާ ބެހޭ ވުޒާރާއިން ބަންޑާރަ ނައިބުގެ އޮފީހަށް މިހާރުވަނީ ފޮނުވާފައެވެ.

މިހާރު ޢަމަލުކުރަމުން އަންނަ މަސްތުވާތަކެއްޗާ ބެހޭ ޤާނޫނުގެ ދަށުން ދެވޭ އެންމެ ހަރުކަށި އަދަބަކީ ޢުމުރަށް (25 އަހަރަށް) ޖަލަށްލުމާއެކު އެއްލައްކަ ރުފިޔާއާއި ދިހަ މިލިޔަން ރުފިޔާއާ ދެމެދުގެ ޢަދަދަކުން ޖޫރިމަނާކުރުމެވެ. ނަމަވެސް އަލަށް ގެންނަ އިޞްލާހުގައި މަސްތުވާތަކެތި އެތެރޭ ކުރާ ފަރާތްތަކަށް މަރުގެ އަދަބު ދޭން ވަނީ ހިމަނާފައެވެ.

މަސްތުވާތަކެއްޗާ ބެހޭ ޤާނޫނަށް ސަރުކާރުން ގެންނަން ފެންނަ އިޞްލާހުގެ ޑްރާފްޓް ބިލުގެ ޖަދުވަލު 1ގައި ވަނީ 500 ގްރާމަށްވުރެ ގިނައިން މަސްތުވާތަކެތި އެތެރެކޮށްފި ނަމަ މަރުގެ އަދަބު ދެވޭ ގޮތަށް ހިމަނާފައެވެ. އެގޮތުން 139 ބާވަތެއްގެ މަސްތުވާތަކެތި އެ މާއްދާގައި ބަޔާންކޮށްފައިވެއެވެ. ޑްރާފްޓް ބިލުގެ އިބާރާތުގައި ބަޔާންކޮށްފައިވަނީ މިއިން ކޮންމެ ބާވަތެއް ވިޔަސް އެ ބަރުދަން ފުރިހަމަވެ، މަސްތުވާތަކެތި ޓްރެފިކްކުރުމުގެ ކުށް ސާބިތުވެއްޖެ ނަމަ މަރުގެ ހުކުމް އިއްވަން ޖެހޭނެ ކަމަށެވެ.

މަސްތުވާތަކެއްޗާ ބެހޭ ގާނޫނަށް ގެންނަން ވިސްނާ އިސްލާހުތަކުގެ ތެރޭގައި ޑްރަގު ކޯޓަށް އިތުރު ބާރުތައް ދިނުމާއި، ރިހެބިިލިޓޭޝަނާ ގުޅޭ މާއްދާތަކަށް ގެންނަ އިސްލާހުތަކުގެ އިތުރުން މަސްތުވާތަކެތި ޓްރެފިކުކުރުން ކަމަށް ބެލެވޭނެ ހާލަތްތައް ހިމަނާފައިވެއެވެ.

ޑްރަގު ކޯޓަށް ލިބޭ ބާރުތަކުގެ މަސްތުވާތަކެތި ބޭނުންކުރުމާއި ޕެޑަލްކުރުމުގެ ކުށުގެ ތުހުމަތުކުރެވޭ މީހުންގެ ބަންދު އަމުރާ މެދު ގޮތެއް ނިންމުމާއި އެފަދަ މައްސަލަތަކުގެ ޝަރީއަތް ހިންގުންވެސް ހިމެނެއެވެ. ކުރިން މިކަންކަން ކުރަނީ ކްރިމިނަލް ކޯޓުންނެވެ.

މީގެ އިތުރުން ކުރިން ޑްރަގު ކޯޓަށާއި ޕްރޮސިކިއުޓާރ ޖެނެރަލަށް އިހުތިޔާރީކޮށް އޮތް ބައެއް ކަންކަން އެއީ ތަންފީޒުކުރަން މަޖުބޫރު ކަންކަމުގެ ގޮތުގައި އިބާރާތް ބަދަލުކޮށްފައިވެއެވެ. އޭގެ ތެރޭގައި ފަރުވާގެ އަމުރާ ޚިލާފުވާ މީހުންނަށް ފިޔަވަޅު އެޅުން ހަރުކަށި ކުރުމާއި، ނުކޮށް ދޫކޮށްލާ ދައުވާތައް އުފުލުން ހިމެނެއެވެ.