އަށް މަސް ދުވަހުގެ ތެރޭގައި 158 ކިލޯގެ މަސްތުވާތަކެތި އަތުލައިގެންފި

މިއަހަރުގެ މިހާތަނަށް 158 ކިލޯއަށްވުރެ ގިނަ އަދަދެއްގެ މަސްތުވާތަކެތި އަތުލައިގެންފައިވާ ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

ފުލުހުން ވަނީ ޑްރަގް އެންފޯސްމަންޓުން މިއަހަރުގެ ތެރޭގައި ކޮށްފައިވާ މަސައްކަތްތަކުގެ ތަފާސްހިސާބުތައް ހިއްސާކުރައްވާފައެވެ.

ޑްރަގް އެންފޯސްމަންޓުގެ ތަފާސްހިސާބުތަކުން ދައްކާ ގޮތުގައި މިއަހަރުގެ އޮގަސްޓް މަހުގެ 31 ވަނަ ދުވަހުގެ ނިޔަލަށް 158.8 ކިލޯގެ މަސްތުވާތަކެތި ވަނީ އަތުލައިގެންފައެވެ. އަދި މި މުއްދަތުގައި 5252 ބަނގުރާފުޅި އަތުލާފައިވާކަމަށްވެސް ތަފާސްހިސާބުތަކުން ދައްކައެވެ.

ފުލުހުން ވިދާޅުވެފައިވާ ގޮތުގައި މިއަހަރުގެ މިހާތަނަށް އަތުލައިގެންފައިވާ މަސްތުވާތަކެއްޗާއި ބަނގުރަލުގެ އަގު 282،273،651.52 ރުފިޔާއަށް އަރާ ކަމަށެވެ.

ޑްރަގް އެންފޯސްމަންޓުން މިއަހަރުގެ މިހާތަނަށް 113 އޮޕަރޭޝަނެއް ހިންގާފައިވާއިރު 8554 މީހުން ވަނީ ބަލައި ފާސްކޮށްފައެވެ. އަދި 712 މީހަކު ހައްޔަރުކޮށް، އޭގެ ތެރޭގައި ހިމެނޭ 80 ބިދޭސީއަކު ވަނީ އިމިގްރޭޝަނާ ހަވާލުކޮށްފައެވެ.

ފުލުހުންގެ ޑްރަގް އެންފޯސްމެންޓު ޔުނިޓަށް ފާއިތުވި 8 މަސްދުވަހު 475 މައްސަލަ ހުށަހަޅާފައިވާއިރު، އޭގެތެރެއިން 230 މައްސަލަ ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށްވެސް ފުލުހުންގެ ތަފާސްހިސާބުތަކުން ދައްކައެވެ.

ޑްރަގް އެންފޯސްމަންޓުގެ އިތުރުން ގޭންގް ކްރައިމް އެންފޯސްމަންޓުން ކޮށްފައިވާ މަސައްކަތްތަކުގެ ތަފާސްހިސާބުތައްވެސް ފުލުހުން ވަނީ ހިއްސާކުރައްވާފައެވެ. އެގޮތުން، އަހަރުގެ ފުރަތަމަ 8 މަސް ދުވަހުގެ ތެރޭގައި 12،253 މީހަކާ ސުވާލުކޮށްފައިވާ ކަމަށާއި އޭގެ ތެރޭގައި، 18 އަހަރު ފުރިފައިވާ 2،583 މީހުން ހިމެނޭކަމަށް ފުލުހުން ވިދާޅުވެއެވެ.

މި މުއްދަތުގައި 18 އަހަރު ނުފުރޭ 331 ކުޑަކުދިން، 2،014 ފަހަރަށް ހުއްޓުވައި ސުވާލުކޮށްފައިވާކަންވެސް ގޭންގް ކްރައިމް އެންފޯސްމަންޓުގެ ތަފާސްހިސާބުތަކުން ދައްކައެވެ.

ގޭންގު ކުށްތަކާ ގުުޅޭ އެކި މައްސަލަތަކުގައި ޖުމުލަ 67 މީހުން ހައްޔަރުކޮށްފައިވާއިރު އޭގެ ތެރެއިން 30 މީހުން ދޫކޮށްލާފައިވާކަމަށް ތަފާސްހިސާބުތައް ދައްކައެވެ. އަދި 22 މީހަކު ފުލުހުންގެ ހައްޔަރުގައި ތިބިއިރު 15 މީހަކު ވަނީ ރިމާންޑު ޖަލުތަކުގައި ބަންދުކޮށްފައެވެ.

ގޭންގު ކުށްތަކާ ގުޅިގެން މިދިޔަ އަށް މަސްދުވަހުގެ ތެރޭގައި ފުލުހުންގެ ޚިދުމަތަށް 22 މައްސަލައެއް ހުށަހެޅިއިރު އޭގެ ތެރެއިން ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީ 8 މައްސަލަ ކަމަށްވެސް ދިވެހި ފުލުހުންގެ ޚިދުމަތުގެ ގޭންގް ކްރައިމް އެންފޯސްމަންޓުގެ ތަފާސްހިސާބުތަކުން ދައްކައެވެ.

މަސްތުވާތަކެތީގެ މައްސަލަތަކާއި ގޭންގު ކުށްތައް ހުއްޓުވުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، ޤާނޫނަށް ގެންނަންޖެހޭ އިސްލާހުތައް ގެނައުމުގެ މަސައްކަތްތައްވެސް ސަރުކާރުން މިހާރު ދަނީ ކުރައްވަމުންނެވެ.