މަޖިލީހުގެ މިއަހަރުގެ ފަހު ދައުރު އޮކްޓޯބަރ 7ގައި
-
އަހަރުގެ ދެވަނަ ދައުރު ނިމުނީ 22 އޮގަސްޓުގައި
-
20ވަނަ މަޖިލީހުގައި ދައުރުން ބޭރުން 3 ޖަލްސާ ބޭއްވި
ރައްޔިތުންގެ މަޖިލީހުގެ މިއަހަރުގެ ފަހު ދައުރު އަންނަ އޮކްޓޯބަރު މަހުގެ 7 ވަނަ ދުވަހު ފަށަން ނިންމައިފިއެވެ. މިކަން އިއުލާންކުރެއްވީ އިއްޔެ ދައުރުން ބޭރުން ބޭއްވި ޚާއްސަ ޖަލްސާގައި މަޖިލީހުގެ ރައީސް އަބްދުއްރަޙީމް އަބްދުﷲއެވެ.
މިއަހަރުގެ މިހާތަނަށް މަޖިލީހުގެ ދެ ދައުރު ވަނީ ނިންމާފައެވެ. ފުރަތަމަ ދައުރު ނިންމާލީ 19 ވަނަ މަޖިލީހާއެކުގައެވެ. އަދި ދެވަނަ ދައުރު ފެށީ 20ވަނަ މަޖިލީހާއެކުގައެވެ.
ވިހިވަނަ ރައްޔިތުންގެ މަޖިލީހުގެ ދައުރު ނިންމާލީ މުހިންމު ގިނަ މަސައްކަތްތަކާާއެކުގައެވެ. އެގޮތުން، އެ ދައުރުގައި 33 ޖަލްސާ ބާއްވާފައިވާއިރު މަޖިލީހަށް 23 ބިލެއް ހުށަހަޅައި 11 ބިލެއްގެ މަސައްކަތް ވަނީ ނިންމާފައެވެ.
ފާސްކުރެއްވި ބިލުތައް:
• ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލު
• ލޯކަލް ކައުންސިލްތަކުގެ އިންތިޚާބުގެ ޤާނޫނަށް އިޞްލާޙު ގެނައުމުގެ ބިލު
• ދިވެހިރާއްޖޭގެ ޓޫރިޒަމާ ބެހޭ ޤާނޫނަށް އިޞްލާޙު ގެނައުމުގެ ބިލް
• ވަޒީފާއާ ބެހޭ ޤާނޫނަށް އިޞްލާޙު ގެނައުމުގެ ބިލު
• ފޮރިން އިންވެސްޓްމަންޓްގެ ބިލް
• ދިވެހިރާއްޖޭގެ މާލީ ސެކިއުރިޓީޒްއާ ބެހޭ ޤާނޫނަށް އިޞްލާޙު ގެނައުމުގެ ބިލު
• ޞިއްޙީ ޚިދުމަތް ދިނުމުގެ ޤާނޫނަށް އިޞްލާޙު ގެނައުމުގެ ބިލް
• ދިވެހިރާއްޖޭގެ ޤާނޫނީ ފަންނުގެ ޤާނޫނަށް އިޞްލާޙު ގެނައުމުގެ ބިލު
• ބިނާވެށި ޕްލޭންކުރުމާއި ހިންގުމުގެ ބިލް
• ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލް
މި ދައުރުގައި ސަރުކާރުން ހުށަހެޅުއްވި 9 މައްސަލަ ނިންމާލާފައިވާއިރު ރިޔާސަތުން ހުށަހެޅުއްވި 13 މައްސަލައާއި ތަފާތު އެކި މައްސަލަތަކާ ގުޅޭ 9 ރިޕޯޓުގެ މަސައްކަތްވެސް ވަނީ ނިންމާފައެވެ. އަދި މި ދައުރުގައި ޖުމްލަ 9 ކުއްލި މައްސަލަ ހުށަހަޅާފައިވާއިރު އެ ހުރިހާ މައްސަލައެއްގެ މަސައްކަތްވެސް މަޖިލީހުން ވަނީ ނިންމާފައެވެ.
ތަފާސްހިސާބުތަކުން ދައްކާ ގޮތުގައި 20ވަނަ ރައްޔިތުންގެ މަޖިލީހުގެ މިއަހަރުގެ ދައުރު ނިންމާލިއިރު 82.9 އިންސައްތަ މަސައްކަތް ވަނީ ނިމިފައެވެ. ދައުރު ނިންމާލުމަށްފަހު މަޖިލިސް ޗުއްޓީއަށް ދިޔައީ މިދިޔަ މަހުގެ 22 ވަނަ ދުވަހުއެވެ.
ގިނަ މަސައްކަތްތައް ނިމި ދައުރު ނިންމާލި ނަމަވެސް މަޖިލީހުން ވަނީ ދައުރުން ބޭރުން ތިން ޖަލްސާއެއް ބާއްވާފައެވެ. މި ތިން ޖަލްސާ ބާއްވާފައިވަނީ ސަރުކާރުގެ ފަރާތުން ހުށަހެޅުއްވި މައްސަލައަކާއި ބިލެއްގެ މަސައްކަތްތައް ނިންމުމަށެވެ. އެގޮތުން، މި ޖަލްސާތަކުގައި ޕީޖީގެ މަގާމަށް ބޭފުޅަކު އައްޔަން ކުރުމަށް ރުހުން ދިނުމުގެ މަސައްކަތާއި ސަރުކާރުގެ ފަރާތުން ހުށަހެޅުއްވި، ކުންފުނީގެ ބިލުގެ މަސައްކަތްވަނީ ކުރިއަށް ގެންގޮސްފައެވެ.
މަޖިލީހުގެ ދައުރުން ބޭރުގައި ބޭއްވި ޚާއްސަ 3 ޖަލްސާގައި ޕީޖީގެ މަގާމަށް އައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވެވި އަލްއުސްތާޛް ޢައްބާސް ޝަރީފަށް ރުހުން ދިނުމަށް މަޖިލީހުން ވަނީ ފާސްކޮށްފައެވެ. އަދި ކުންފުނީގެ ބިލު ސަރުކާރުން ފޮނުއްވި ގޮތަށް ވަނީ ފާސްކޮށްފައެވެ.