ޙަޤީޤީ މާނައިގައި ޤާނޫނީ ވަކީލުންގެ ކަންކަން ބެލެހެއްޓުމުގެ މިނިވަންކަން ބާ ކައުންސިލަށް

ޤާނޫނީ ފަންނުގެ ޤާނޫނަށް ގެނައި އިސްލާހަކީ ޙަޤީޤީ މާނައިގައި ޤާނޫނީ ވަކީލުންގެ ކަންކަން ބެލެހެއްޓުމުގެ މިނިވަންކަން ބާ ކައުންސިލަށް ލިބިދިނުމަށް އެޅުނު މުހިންމު ފިޔަވަޅެއް ކަމަށް ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.

ބަންޑާރަ ނައިބު މިހެން ވިދާޅުވީ، ޤާނޫނީ ފަންނުގެ ޤާނޫނަށް ތިންވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގުކުރެއްވުމާ ގުޅިގެން އެކްސްގައި ކުރެއްވި ޕޯސްޓެއްގައެވެ.

މިދިޔަ މަހުގެ 22 ވަނަ ދުވަހު ރައްޔިތުންގެ މަޖިލީހުން ފާސްކުރި ޤާނޫނީ ފަންނުގެ ޤާނޫނަށް އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގުކުރެއްވީ އިއްޔެއެވެ. މި ޤާނޫނުގައި ކުރިން އޮންނަގޮތުން ބާ ކައުންސިލްގައި ބަންޑާރަ ނައިބުވެސް ހިމެނިވަޑައިގަންނަވައެވެ. ނަމަވެސް އެ ޤާނޫނަށް ސަރުކާރުގެ ފަރާތުން ހުށައެޅުއްވި އިސްލާހަކީ ބާ ކައުންސިލުގައި ބަންޑާރަނައިބު ނުހިމެނޭގޮތަށް، ހަމައެކަނި ޤާނޫނީ ވަކީލުން ހިމެނުމަށް ހުށައެޅުއްވި އިސްލާހެކެވެ.

ކުރިން މި ޤާނޫނު ބުނާގޮތުން ބާ ކައުންސިލް އެކުލެވިގެންވަނީ ބަންޑާރަނައިބާއެކު 7 މެންބަރުންގެ މައްޗަށެވެ. ނަމަވެސް ޤާނޫނަށް ގެނައި އިސްލާހާއެކު ބަންޑާރަނައިބު އެ ކައުންސިލުން ވަކިވެ، ބާކައުންސިލް އެކުލަވާލަންވާނީ ޤާނޫނީ ދާއިރާގެ 7 މެންބަރުންގެ މައްޗަށެވެ.

އެގޮތުން ބާ ކައުންސިލްގައި ހިމެނިވަޑައިގަންނަވާނީ ޤާނޫނީ ވަކީލުންގެ ތެރެއިން އިންތިޚާބު ކުރާ ރައީސަކާއި ނައިބު ރައީސާއި، މެންބަރުންނެވެ.

މި އިސްލާހު ހުށަހެޅުމުގެ މަޤްޞަދެއްކަމަށްވެސް ބަޔާންކޮށްފައިވަނީ، ޤާނޫނީ ވަކީލުންގެ ކަންކަން ހަމަޖައްސާނީ ވަކީލުންގެ ފަރާތުން ހޮވާ މަންދޫބުން ކަމުގައި ހަމަޖައްސާ، ބާކައުންސިލު ފުރިހަމަ މިނިވަންކަމާއިއެކު ހިންގުމުގެ ފުރުސަތު ހޯދައި ދިނުން ކަމަށެވެ.

ޤާނޫނަށް ގެނައި އިސްލާހު ތަސްދީގުކުރެއްވުމާ ގުޅިގެން އެކްސްގައި ކުރެއްވި ޕޯސްޓުގައި ބަންޑާރަ ނައިބު އަލްއުސްތާޛު އަޙްމަދު އުޝާމް ވިދާޅުވީ، މިއީ ޙަޤީޤީ މާނައިގައި ޤާނޫނީ ވަކީލުންގެ ކަންކަން ބެލެހެއްޓުމުގެ މިނިވަންކަމާއި ބާރު، ޤާނޫނީ ވަކީލުން ޢައްޔަންކުރާ ބަޔަކަށް ލިބިދިނުމަށް އެޅުނު މުހިންމު ފިޔަވަޅެއްކަމުގައި ދެކެވަޑައިގަންނަވާ ކަމަށެވެ.

ޤާނޫނީ ފަންނުގެ ޤާނޫނަށް 3 ވަނަ އިޞްލާޙު ގެނައުމުގެ ޤާނޫނު ރައީސުލްޖުމްހޫރިއްޔާ މިއަދު ތަސްދީޤުކުރެއްވުމާއެކު، ދިވެހިރާއްޖޭގެ ބާ ކައުންސިލްގެ އެކްސްކޯގައި ބަންޑާރަނައިބު ހިމެނުން ނިމުމަކަށް އައިސްފި. މިއީ ޙަޤީޤީ މާނައިގައި، ޤާނޫނީ ވަކީލުންގެ ކަންކަން ރެގިއުލޭޓްކުރުމުގެ… https://t.co/N4fHhmLYFh

— Ahmed Usham (@a_usham) September 3, 2024

ބަންޑާރަ ނައިބު ބާ ކައުންސިލްގެ އެކްސްކޯގައި އިންނެވުމުން ކައުންސިލްގެ މިނިވަންކަން ގެއްލޭކަމަށް މެންބަރުން ދެކެވަޑައިގަންނަވާ ކަމަށް ބާ ކައުންސިލުންވެސް ވަނީ ވިދާޅުވެފައެވެ.

އެގޮތުން ބަންޑާރަ ނައިބުގެ އޮފީހުގައި މަސައްކަތް ކުރާ ބައެއް ވަކީލުންވެސް އެކައުންސިލްގައި ހިމެނިވަޑައިގަންވާއިރު ބަންޑާރަ ނައިބު އިންނެވުމުން ރައުޔު ހާމަކުރުމުގައި ދަތިވާކަމަށް އެ ކައުންސިލުގެ ރައީސް ހުސައިން ސިރާޖު ވަނީ ރައްޔިތުންގެ މަޖިލީހުގެ ޖުޑީޝަރީ ކޮމިޓީގައި ވިދާޅުވެފައެވެ.

ޤާނޫނަށް ގެނައި އިސްލާހާއެކު ބާ ކައުންސިލުގެ އެގްޒެކްޓިވް ކޮމިޓީއަށް އިންތިޚާބުކުރަންޖެހޭ މެންބަރުން، ޤާނޫނަށް ޢަމަލުކުރަން ފަށާތާ 60 ދުވަހުގެ ތެރޭގައި އިންތިޚާބުކޮށް ނިންމަންޖެހޭނެއެވެ.

މި އިސްލާހުގައި ރަސްމީ އިދާރާތަކުންނާއި ރަޖިސްޓްރީކޮށްފައިވާ ކިޔަވައިދޭ މަރުކަޒުތަކުން، ދޫކުރާ ލިއުންތަކުގައި އެތަންތަނުގެ އަސްލާއި އެއްގޮތްކަމުގެ ތައްގަނޑު ޖަހައިދިނުމާއި ބޭރު ޤައުމުތަކުގައި ބޭނުން ކުރުމަށް ދިވެހި ރައްޔިތުންގެ ބައެއް ލިއުންތަކާއި ޑިޕްލޮމެޓިކް މިޝަންތަކުން އަސްލާއި އެއްގޮތްކަމުގެ ތައްގަނޑު ޖަހައިދިނުންވެސް ވަނީ ހުއްދަކޮށްފައެވެ.