ފޮރިން ޑައިރެކްޓް އިންވެސްޓްމަންޓްގެ ދައުރު ފުޅާކޮށް އިޤްތިޞާދީ ތަރައްޤީ ގެނައުމަކީ އަމާޒެއް: ވަޒީރު ސަޢީދު

ފޮރިން ޑައިރެކްޓް އިންވެސްޓްމަންޓްގެ ދައުރު ފުޅާކޮށް އޭގެތެރެއިން އިޤްތިޞާދީ ތަރައްޤީ ގެނައުމަކީ މިސަރުކާރުގެ އަމާޒެއްކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، މިއަދު ތަސްދީގުކުރި ފޮރިން ޑައިރެކްޓް އިންވެސްޓްމަންޓް ޤާނޫނާއި ގުޅޭގޮތުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.

ނޫސްވެރިންގެ ބައްދަލުވުމުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވައުދުފުޅުތަކުގެ ތެރޭގައި އިޤްތިޞާދީ ދާއިރާއިން ބޮޑެތި ރީފޯމްގެ މަސައްކަތްތަކެއް އެބަހުރިކަމަށެވެ. އެގޮތުން ވިޔަފާރި ފުޅާކުރުމާއި، ވިޔަފާރިތަކަށް ފަހި މާހައުލެއް ޤާއިމްކޮށްދެއްވުމަށް މަސައްކަތްކުރައްވަމުން ގެންދަވާކަމަށް ވިދާޅުވިއެވެ.

"އަޅުގަނޑުމެންގެ ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެންނެވިއިރުގައި އެމަނިކުފާނުގެ ވައުދުފުޅުތަކުގެ ތެރޭގައި މިހުރީ ގާތްގަނޑަކަށް ބޮޑެތި ސްޓްރަކްޗަރަލް ރިފޯމް އިޤްތިޞާދީ ދާއިރާގައި. ވިޔަފާރި ފުޅާކުރުމާއި، ރާއްޖެއަކީ ވިޔަފާރިކުރަން ފަސޭހަތަކަށް ހެދުމާއި، އަދި ރިއަލް އެސްޓޭޓްގެ ދާއިރާއަކީވެސް ވިޔަފާރީގެ ދާއިރާއަކަށް ހެދުން." ވަޒީރު ވިދާޅުވިއެވެ.

ބަންޑާރަ ނައިބު އަލްއުސްތާޛު އަޙްމަދު އުޝާމް ވިދާޅުވީ، ރާއްޖޭގައި އެންމެ ފުރަތަމަ ފޮރިން ޑައިރެކްޓް އިންވެސްޓްމަންޓްގެ ޤާނޫނެއް ވުޖޫދުވެފައިވަނީ 1979 ވަނަ އަހަރުކަމަށެވެ. މި ޤާނޫނަކީ އެއިރަށް ރަނގަޅު ޤާނޫނެއް ނަމަވެސް ޤާނޫނަށް ބަދަލުތަކެއް ގެންނަންޖެހިފައިވާކަމަށެވެ. ޤާނޫނަށް ބަދަލުގެނެސް ރައީސް ތަސްދީޤްކުރައްވާފައިވާއިރު މިހާރު މިޤާނޫނަކީ އިންވެސްޓަރުންނާއި ރަހުމަތްތެރި ޤާނޫނެއްކަން ބަންޑާރަ ނައިބު ފާހަގަކުރެއްވިއެވެ.

"މިހާލަތުގައި ރާއްޖޭގައި އިންވެސްޓްކުރަން އަންނައިރުގައި ބޭނުންވާ ފަރާތްތަކަށް އެ ލިބިދޭންޖެހޭ ރައްކާތެރިކަމަށް ބަލާއިރުގައި އެންމެ ރަނގަޅު ޤާނޫނެއްނޫން. އެ ސަބަބަށްޓަކައި ވަރަށް ކުރީއްސުރެ ފޮރިން އިންވެސްޓްމަންޓް ޤާނޫނު އިސްލާހުކޮށް ނުވަތަ އެކަމާއިގުޅޭ އައު ޤާނޫނެއް ހެދުމުގެ މަސައްކަތް ތަފާތު ގިނަ ސަރުކާރުތަކުން އެބަހުރި ކޮށްފައި. މި ސަރުކާރުންވެސް ރާއްޖެއަކީ އިންވެސްޓަރ ފްރެންޑްލީ ޤައުމަކަށް ހެދުމަށްޓަކައި ޤާނޫނުތަކަށް ބޮޑެތި ބަދަލުތަކެއް ގެނައުމުގެ މަސައްކަތް އަޅުގަނޑުމެން ވާނީ ފަށާފައި. މިފަދަ ޤާނޫނުތައް އޭގެ ޒާތުގައި އެއީ ވަރަށް ވަގުތު ނަގާ ކަމެއް. އެހެންނަމަވެސް ރައީސްގެ ވިޝަންއަކީ ރާއްޖެއަކީ އިންވެސްޓަރ ފްރެންޑްލީ ޤައުމަކަށް ހެދުމަށްޓަކައި މިފަދަ ޤާނޫނުތަކަށް ގެންނަންޖެހޭ އިސްލާހުތައް ނުވަތަ އަލަށް ޤާނޫނުތައް އެކުލަވާލަންޖެހޭކަމަށްވާނަމަ އެ މަސައްކަތް ވީހާވެސް އަވަހަކަށް ކުރުން." އަޙްމަދު އުޝާމް ވިދާޅުއެވެ.

ޤާނޫނު އެކުލަވާލުމުގައި އިންޓަނޭޝަނަލް ބެސްޓް ޕްރެކްޓިސްއާ އެލައިން ކުރުމާއި މިހާރު ރާއްޖޭގައި ޤާއިމްވެ ކުރިއަށްދާ އިންވެސްޓަރުން ތަމްސީލްކުރާ ޤާނޫނީ ވަކީލުންގެ ލަފައާއި މަޝްވަރާ ހޯދާފައިވާކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ވަނީ ވިދާޅުވެފައެވެ.