ރަހީނުކުރި ހާދިސާގައި ފުލުހުން އަމަލުކުރި ގޮތުގެ ތަހުޤީޤެއް ހިންގަން އަންގާފައެއް ނުވާނެ: ދާޚިލީ ވަޒީރު

ރޭ މާލޭގައި ރަހީނުކުރި އަންހެން މީހާ ސަލާމަތްކުރުމުގައި ފުލުހުން ބާރުގެ ބޭނުންކުރިގޮތުގެ ތަހުގީގެއް ހިންގަން އަންގާފައި ނުވާނެކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ރަހީނުކޮށްފައި ހުރި އަންހެން މީހާ ސަލާމާތްކުރުމުގައި ފުލުހުން ބާރުގެ ބޭނުންކުރި ގޮތުގެ ތަހުގީގެއް ހިންގާކަމަށް ބުނެ ބައެއް މީޑިއާތަކުން ހަޤީޤަތާއި ޚިލާފު ވާހަކަތަކެއް ފެތުރުމާއި ގުޅިގެނެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވީ އަންހެނަކު ރަހީނުކުރި ހާދިސާގައި ފުލުހުން ބާރުގެ ބޭނުންކުރި ގޮތުގެ އެތެރޭގެ ތަހުގީގެއް ހިންގާކަމަށް ބުނެ ދައްކަމުންދަނީ ދޮގު ވާހަކަތަކެއް ކަމަށާއި، އެފަދަ ތަހުޤީޤެއް ހިންގަން އަންގާފައިނުވާނޭކަމަށެވެ. އަދި ރަހީނުކޮށްފައި ހުރި އަންހެން މީހާ ސަލާމަތްވީ ފުލުހުން ކުރި ހިތްވަރުގަދަ މަސައްކަތުންކަން ފާހަގަކޮށް، ފުލުހުންގެ މަސައްކަތަށް ވަޒީރު ވަނީ ސާބަސް ދަންނަވާފައެވެ.

Mi ee Dhogu Vaahakaeh. Fuluhun kurehvvee hiyyvaru gadha masahkatheh. Fuluhunge masahkathun Raheenukohfaivaa anhen kuhjeh salaamaiyy kurevunu. Ekamah takaa fuluhunnah saabas dhannavan. Fuluhun baaruge beynun kurigoiyy thahugeegu kuran angaafai nuvaane. https://t.co/IDLiTWgdM9

— Minister of Homeland Security & Technology (@min_mohst) August 30, 2024

މާލޭގެ މަގުމަތީގައި ވަޅިއަކުން ބިރު ދައްކައިގެން އަންހެނަކު ރަހީނުކުރުމަށް މަސައްކަތްކޮށްފައިވަނީ ށ. މިލަންދޫ، ހެޕީލޭންޑް އަހުމަދު އަތުހަރު ނަމަކަށް ކިިޔާ މީހެކެވެ. ނަމަވެސް ފުލުހުން ހުށިޔާރުކަމާއެކު ކުރި މަސައްކަތުން އަންހެން މީހާ ވަނީ ސަލާމަތްކޮށްފައެވެ.

މި ހާދިސާއަށްފަހު އަންހެން މީހާއާއި ފިރިހެން މީހާއަށް ހޮސްޕިޓަލުގައި ފަރުވާ ދިން ނަމަވެސް، މާބޮޑު އަނިޔާތަކެއް ނުލިބޭކަމަށް ފުލުހުން ވިދާޅުވެއެވެ. މި މައްސަލާގައި ހިމެނޭ ފިރިހެން މީހާ ހޮސްޕިޓަލުން ދޫކޮށްލާފައިވާއިރު އަދި އޭނާ މިހާރު ހުރީ ފުލުހުންގެ ބެލުމުގެ ދަށުގައިކަމަށް ފުލުހުން ވިދާޅުވެއެވެ.

މި މައްސަލައިގައި ފުލުހުން ހަރަކާތްތެރިވިގޮތަށް ކޮމިޝަނަރ އޮފް ޕޮލިސް ޢަލީ ޝުޖާޢުވެސް ވަނީ ތައުރީފުކުރައްވާފައެވެ.