ޤާނޫނީ ސަރުކާރު ބަދަލުކުރަން އުޅުނު މައްސަލާގައި ފިޔަވަޅު އަޅަންޖެހޭ މީހުން ދެނެގަންނަނީ
-
ބީއެމްއެލް ކާޑުތަކުގެ ޑޮލަރު ލިމިޓަށް ބަދަލު ގެނައީ މި މަހުގެ 25ވަނަ ދުވަހު
-
ބީއެމްއެލުން ވަނީ ސަރުކާރުގެ މަޝްވަރާއާއެކު ނިންމުން ބަދަލުކޮށްފައި
ބޭންކް އޮފް މޯލްޑިވްސް، ބީއެމްއެލުން ކާޑުތަކުގެ ޑޮލަރު ލިމިޓަށް ގެނައި ބަދަލާ ގުޅިގެން، ޤާނޫނީ ސަރުކާރު ބަދަލުކުރަން އުޅުނުކަމަށް ތުހުމަތުކުރެވޭ މައްސަލައިގައި ފިޔަވަޅު އަޅަންޖެހޭ މީހުންތިބިތޯ ދެނެގަތުމުގެ މަސައްކަތް ކުރަމުންދާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ދިވެހި ފުލުހުންގެ ޚިދުމަތުން ކުރިން ވިދާލުވެފައިވަނީ ސަރުކާރުގެ މައި ހިއްސާ އޮންނަ ބޭންކަކުން ދިވެހި ރައްޔިތުންނަށް ކުއްލި ސިހުމެއް ގެނުވާފަދަ ނިންމުމެއް ނިންމި ވަގުތާއި ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާއިބެހޭ ގޮތުން ނޫސްވެރިންގެ ބައްދަލުވުމެއް ބޭއްވި ކަމަށެވެ. އަދި ހަމަ އެވަގުތު މީސް މީޑިއާގައި ބޮޓް(އަސްލު މީހަކަށް ނިސްބަތް ނުވާ) އެކައުންޓުތައް ބޭނުންކޮށްގެން ސަރުކާރު ވައްޓާލުމަށް މަގުތަކަށް ނިކުތުމަށް ގޮވާލާ އާންމު ހަމަޖެހުން ނަގާލުމަށް ގޮވާލާފައިވާ ކަމަށެވެ. އަދި އެފަރާތްތަކުން ޤައުމުގެ މަސްލަހަތު ނަގާލުމަށް ހިތްވަރު ދީފައިވާ ފުލުހުން ވިދާޅުވެފައިވެއެވެ.
މިއީ ޤާނޫނީ ސަރުކާރެއް ޣައިރު ޤާނޫނީކޮށް ބަދަލުކުރުމަށް ކުރިކަމެއްގެގޮތުގައި ބެލުމުގެ ޖާގަ އޮތް ކަމަށް ވިދާޅުވެ ފުލުހުން ވަނީ މިމައްސަލަ ބަލަމުންދާކަން ހާމަކުރައްވާފައެވެ.
މި މައްސަލައާއިގުޅިގެން ފުލުހުން މިއަދު ވިދާޅުވީ، މައްސަލައިގެ ތަހުގީގުގައި ހޯދަންޖެހޭ މައުލޫމާތު އެއްކުރުމާއި، ބަލަންޖެހޭ ހުރިހާ ކަމެއް ތަފްސީލުކޮށް ދިރާސާކުރުމުގެ މަސައްކަތް ކުރަމުންދާ ކަމަށެވެ. އަދި ފިޔަވަޅު އަޅަންޖެހޭ މީހެއް ހުރިތޯ ދެނެގަތުމުގެ މަސައްކަތް ކުރިއަށްދާކަމަށްވެސް ފުލުހުން ވިދާޅުވިއެވެ.
ބީއެމްއެލުން މި މަހުގެ 25 ވަނަ ދުވަހު ވަނީ ދިވެހި ފައިސާ ކާޑުތަކުން ބޭރު ފައިސާގެ އެއްވެސް މުޢަމަލާތެއް ނުކުރެވޭނެ ގޮތަށް ނިންމާފައެވެ. ނަމަވެސް އެމްއެމްއޭގެ ލަފަޔާއެކު އެ ބޭންކުން ވަނީ އެ ނިންމުން ފަހުން ބަދަލުކޮށްފައެވެ.
ސަރުކާރުން ވަނީ ބީއެމްއެލްގެ މި ނިންމެވުމަކީ ސަރުކާރުން އެކަމާ ގުޅިގެން ދެއްވާފައިވާ ލަފާއާއި ދެކޮޅަށް ނިންމާފައިވާ ނިންމުމެއް ކަމަށް ވިދާޅުވެފައެވެ.