ފުރަތަަމަ ސްމާޓް ކްލާސްރޫމްތަކާއެކު މަޖީދިއްޔާގައި 40 ކްލާސްރޫމްގެ އައު އިމާރާތެއް އަޅައިދޭނަން: ރައީސް

ރާއްޖޭގެ ފުރަތަަމަ ސްމާޓް ކްލާސްރޫމްތަކާއެކު މަޖީދިއްޔާ ސްކޫލުގައި 40 ކްލާސްރޫމްގެ އައު އިމާރާތެއް އަޅަން އަންނަ އަހަރުގެ ބަޖެޓުގައި ހިމަނުއްވާނޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިކަން އިއުލާން ކުރެއްވީ މަޖީދިއްޔާ ސްކޫލުގެ "ސައްތަވީ ބިނާ" އިފްތިތާހުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

މަޖީދިއްޔާ ސްކޫލްގެ "ސައްތަވީ ބިނާ" އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ މަޖީދިއްޔާ ސްކޫލުގައި އެމަނިކުފާނު ތައުލީމް ޙާޞިލްކުރެއްވި ދުވަސްތަކުގެ މައްޗަށް އަލިއަޅުއްވައިލައްވާފައެވެ. އަދި އެ ސްކޫލަކީ ރާއްޖޭގެ ތައުލީމުގެ ދަންމަރުކަމަށާއި އެ ސްކޫލް ހުޅުވުނުފަހުން ރާއްޖޭގެ އުފެދިގެން އައި ގިނަ ޝަހުސިއްޔަތުތައް ތައުލީމު ހާސިލް ކުރެއްވީ އެ ސްކޫލުންކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސް ވިދާޅުވީ ސްކޫލް ދުވަސްވަރުގެ ހަގީގީ ބޭނުމަކީ ޤައުމަށް ޚިދުމަތް ކުރުމަށްޓަކައި އަދި އަމިއްލަ ހަޔާތް ބިނާކުރުމަށާއި މުޖުތަމައަށް ފައިދާހުރިކަންކަން ކުރުމަށް ތައުލީމު ހާސިލްކުރުމާއި ތަމްރީން ލިބިގަތުންކަމަށެވެ.

މަޖީދިއްޔާ ސްކޫލަށް ބޭނުންވާ ގިނަ ކަންކަން ހުރިކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ ކުރިއަށް އޮތް އަހަރު ކުރިއަށްގެންދާ ސްކޫލް މަޝްރޫއުތަކުގެ ތެރޭގައި މަޖީދިއްޔާ ސްކޫލާއި އިންވެގެން ހުރި ކުރީގެ ދަރުމަވަންތަ ސްކޫލް ހުރި ބިމުގައި 40 ކްލާސްރޫމްގެ އައު އިމާރާތެއް އަޅުއްވައިދެއްވާނެ ކަމަށެވެ. އަދި އެ ސްކޫލްގެ ދާރުލް އުލޫމަކީ ތައުލީމާ ގުޅުންހުރި ދާރުލްއާސާރަކަށް ހައްދަވައިދެއްވާނެކަމަށްވެސް ރައީސް ވިދާޅުވިއެވެ.

"އެ ކްލާސްރޫމްތަކުގެ ތެރެއިން ބައެއް ކްލާސްތަކަކީ ސްމާޓް ކްލާސްތައް ގޮތުގައި ރާއްޖޭގައި ފުރަތަމަ ފަހަރަށް ގާއިމްކުރެވޭ ސްމާޓް ކްލާސްތަކަށްވާނެ. އަދި އަޅުގަނޑުމެން ކޮންމެ މަޖީދިއްޔާގެ ދަރިވަރުން، އިސްދަރިވަރެއްގެ ފަޚުރުކަމުގައިވާ ދާރުލް އުލޫމާއި ކުރި ބޯށި. އަޅުގަނޑުމެންގެ ޕްލޭނަކީ ނޭޝަނަލް އެޑިއުކޭޝަން މިއުޒިއަމެއްގެ ގޮތުގައި އެތަން ތަރައްގީކުރުން. މި ސްކޫލާއި ރާއްޖޭގެ ތައުލީމީ ތާރީހު ދައްކުވައިދޭ މިއުޒިއަމަކަށް އެތަން ބަދަލުކުރުން،" ރައީސުލްޖުމްހުރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މި ދާރުލްއާސާރުގެ ސަބަބުން މަޖީދިއްޔާ ސްކޫލުގެ ވާހަތަކާއި ރާއްޖޭގެ ތަޢުލީމީ ގިނަ ވާހަކަތައް އެތަނުން ފެނިގެންދާނެ ކަމަށެވެ.

ރައީސް ވިދާޅުވީ އަޅުގަނޑުމެން ކޮންމެ މީހެއްގެވެސް އަޒުމަކަށް ހަދަންވީ އެމީހެއްގެ ހަޔާތުގައި އަނެކުންނަށާއި މުޖުތަމައަށް އަދި ޤައުމަށް ކަމެއް ކޮށްދިނުމަށް މަސައްކަތް ކުރުން ކަމަށެވެ. މީގެ ސަބަބުން ތައުލީމީ ނިޒާމް ހަރުދަނާ ކުރެވިގެންދާނެ ކަމަށްވެސް އެމަނިކުފާނު ވިދާޅުވިއެވެ. އަދި ހިތްވަރާއެކު ނުގުޑާފަދަ އަޒުމެއްގައި ބުރަ މަސައްކަތްކޮށްފިނަމަ ކާމިޔާބު ނުވާނެ އެއްވެސް ކަމެއް ނޯންނާނެކަން ފާހަގަކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެ އަޒުމުގައި ކުރިއަށްދިއުމަށް ނަސޭހަތްތެރިވެވަޑައިގެންނެވިއެވެ..