އެމްޑީޕީ ހިންގާފައިވަނީ އެކި ލީޑަރުން އެކިގޮތަށް، އެހެންވެ ދަތިތަކެއް އެބަހުރި: ފައްޔާޟް

އެމްޑީޕީއަކީ އެއިރެއްގެ ހުންނެވި ވެރިއަކަށް ފެނުނު ގޮތަކަށް ހިންގާފައިވާ ޕާޓީއެއް ކަމަށާއި، އެހެންކަމުން ޕާޓީ ހިންގަން ދަތިތަކެއް އެބަހުރިކަމަށް އިދިކޮޅު އެންމެބޮޑު ޕާޓީ އެމްޑީޕީގެ ޗެއަރޕާސަން އަލްއުސްތާޛް ފައްޔާޟް އިސްމާޢީލް ވިދާޅުވެއްޖެއެވެ. ފައްޔާޟް މިހެން ވިދާޅުވީ އެމްޑީޕީ ޤައުމީ މަޖިލީހުގެ ބައްދަލުވުމުގައި ވާހަކަ ދައްކަވަމުންނެވެ.

އެމްޑީޕީގެ އަސާސީ ޤަވާއިދަށް ހުށަހެޅި ބައެއް އިޞްލާހުތަކާއި ގުޅޭގޮތުން ވާހަކަދައްކަވަމުން އެމްޑީޕީގެ ޗެއަރޕާސަން ފައްޔާޟް އިސްމާޢީލް ވިދާޅުވީ އެ ޕާޓީ މިހާތަނަށް ހިންގާފައިވަނީ އެއިރެއްގެ ލީޑަރަކަށް ފެނިވަޑައިގެންނެވި ގޮތަށް ކަމަށެވެ. އެހެންކަމުން އެމްޑީޕީގެ ހިންގުން ވަރުގަދަނުކޮށް ކުރިއަށް ދެވެން ނެތްކަން ފާހަގަކުރައްވާ ފައްޔާޟް ވަނީ މީގެ ކުރިން ޕާޓީ ހިންގާފައިވަނީ އެއްވެސް ނިޒާމެއްގެ ތެރެއިން ނޫންކަމަށް ވިދާޅުވެފައެވެ.

"މި ބަދަލުތައް ނުގެނެސް ޕާޓީ ވަރުގަދަކޮށް ހިންގުމަށް ދަތިތަކެއް އެބަހުރި. ޕާޓީ މިހާ ހިސާބަށް ގެންގޮސްފައި އޮތީ ވަކި ސްޓްރަކްޗަރއެއްގެ ތެރެއަކުނޫން. އެއިރެއްގަ ހުންނަވާ ލީޑަރެއް މިހާރު ދާނީ ޗާނދަނީ މަގުންނޭ މަޖީދީ މަގުންނެއް ނޫނޭ، އެ ބީދައިން ހިންގަވާފައި އޮތް ޕާޓީއެއް މިއީ." ފައްޔާޟް އިސްމާޢީލް ވިދާޅުވިއެވެ.

އެމްޑީޕީގެ އާސާސީ ޤަވާއިދަށް ބަދަލު ގެންނަން ހުށައެޅި ކަންކަމުގެ ތެރޭގައި އެޕާޓީގެ ހަރަކާތްތައް އިތުރަށް ވަރުގަދަ ކުރުމަށް އިތުރު 3 ގުނަވަނެއް ޕާޓީގެ ތެރޭގައި އުފެއްދުމަށް ވަނީ ހުށަހަޅާފައެވެ. އެއީ ކައުންސިލަރުންގެ ވިންގާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ ވިންގުގެ އިތުރުން، ޕާޓީ ޤައުމީ މަޝްވަރާ މަޖިލީސް ޤާއިމްކުރުމެވެ. ޕާޓީގެ ޤައުމީ މަޝްވަރާ މަޖިލީހަކީ ޕާޓީގެ އެކި ދުވަސްވަރު މަސައްކަތް ކުރެއްވި ފަރާތްތަކުގެ ތެރެއިން މިހާރު އެއްވެސް ހައިސިއްޔަތެއް ނެތް ފަރާތްތަކަށް ޕާޓީގެ ހިންގުމުގައި ފުރުސަތު ދިނުމަށް ގެންނަ އިސްލާހެކެވެ.

މި އިސްލާހުތަކަށް އިތުރަށް މަޝްވަރާ ކުރުމަށް ޤައުމީ މަޖިލީހުގައިވަނީ ނިންމާފައެވެ. އަދި އެމްޑީޕީ ވަކި ނިޒާމެއްގެ ތެރެއިން މަސައްކަތް ކުރާ ޕާޓީއަކަށް ހެދުމަށް އެޕާޓީގެ ލީޑާޝިޕުން މިހާރު ވަނީ އަމާޒު ހިފާފައެވެ.