މާލީ ދާއިރާގެ ތަރައްގީއަށް އެމްއެމްއޭއާއި ބޭންކުތަކާއި ގުޅިގެން ޚާއްސަ މަސައްކަތްތަކެއް

މާލީ ދާއިރާގެ ތަރައްގީއާ ގުޅޭގޮތުން މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު މުނައްވަރު ރާއްޖޭގައި ހިންގަމުންދާ ބޭންކުތަކާއި މަޝްވަރާކުރައްވައިފިއެވެ.

މަރުކަޒީ ބޭންކު، އެމްއެމްއޭގެ ގަވަރުނަރު ބައްދަލުކުރެއްވި ބޭންކްތަކުގެ ތެރޭގައި ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް، ސްޓޭޓް ބޭންކް އޮފް އިންޑިއާ، ބޭންކް އޮފް ސިލޯން، މޮރޭޝަސް ކޮމާޝަލް ބޭންކް، ކޮމާޝަލް ބޭންކް އޮފް މޯލްޑިވްސް، ހަބީބް ބޭންކް އަދި އެޗްއެސްބީސީ ހިމެނެއެވެ.

ބޭންކުތަކާއިއެކު ބޭއްވި ބައްދަލުވުމުގައި ގަވަރުނަރު ވަނީ ބޭންކުތަކާއި ގުޅިގެން އެކި ދާއިރާތަކުން މަސައްކަތް ކުރުމަށް ވަނީ މަޝްވަރާކުރައްވާފައެވެ. އެގޮތުން ބޭންކްތަކާއި އެމްއެމްއޭ ދެމެދު އޮންނަ ގުޅުން މިހާރަށްވުރެ ރަނގަޅު ކުރުމަށް މަޝްވަރާކުރެއްވިއެވެ. އަދި މާލީ ދާއިރާގެ ތަރައްގީއަށް އެމްއެމްއޭއާއި ގުޅިގެން މަސައްކަތްކުރުމަށް ވަނީ މަޝްވަރާކޮށްފައެވެ.

އަހުމަދު މުނައްވަރު ގަވަރުނަރުގެ މަގާމާއި ހަވާލުވެވަޑައިގަތުމަށްފަހު ސަރުކާރުގެ ވުޒާރާތަކާއި އަދި ވަކިން ޚާއްސަކޮށް މާލީ ވުޒާރާއާއެކު ވަރަށް ގާތުން ރާއްޖޭގެ އިގްތިސާދު އަދި މާލީ ހާލަތު ރަނގަޅުކުރުމަށް ކުރަންޖެހޭ މަސައްކަތްތަކާއި ދަނީ ކުރައްވަމުންނެވެ. އަދި މި މަސައްކަތްތަކުގެ ނަތީޖާއެއްގެ ގޮތުން މިހާރު ލިބިފައިވާ މައުލޫމާތުތަކަށް ބިނާކޮށް އަންދާޒާ ކުރެވޭ ގޮތުން މި މަހު ދައުލަތުގެ ރިޒާވްގެ ހާލަތު ރަނގަޅުވާނެކަމަށް ގަބޫލުކުރެވޭކަމަށް އެމްއެމްއޭއިން ވިދާޅުވެއެވެ. މާލީ ނިޒާމަށް ގޮންޖެހުންތައް ކުރިމަތިވި ނަމަވެސް އެމްއެމްއޭ އާއި ފިނޭންސް މިނިސްޓްރީ އާއި ސަރުކާރުގެ ކަމާގުޅުންހުރި ވުޒާރާތަކާއި މާލީ ހުރިހާ އިދާރާތައް އެކުވެގެން ކުރާ މަސައްކަތުން އެދެވޭ ނަތީޖާއަކަށް ވާސިލްވެވޭނެ ކަމުގެ ޔަގީންކަން އެބައޮތްކަމަށްވެސް އެމްއެމްއޭއިން ވިދާޅުވެއެވެ.

ރާއްޖޭގެ މާލީ ދާއިރާ އަށް ވަރަށް ބޮޑު ކުރިއެރުމެއް ގެނެސްދޭން މަސައްކަތްކުރައްވާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގައި ގަވަރުނަރު މުނައްވަރު ވަނީ ވިދާޅުވެފައެވެ. އަދި ޖީޑީޕީގެ ނިސްބަތުން މިހާރު މާލީ ދާއިރާއަކީ 6 އިންސައްތަ ކަމަށްވާއިރު އަމާޒަކީ ފަސް އަހަރުގެ ތެރޭގައި އެ އަދަދު ދެ ގުނަ ކުރުންކަމަށް ވެސް މުނައްވަރު ވަނީ ވިދާޅުވެފައެވެ.

ދައުލަތުގެ މާލީއްޔާއަށް ދިމަވެފައިވާ ގޮންޖެހުންތައް ހައްލުކުރުމާއި ގުޅޭގޮތުން އެމްއެމްއޭއިން ވިދާޅުވީ ކޮވިޑް 19ގެ އާލަމީ ވަބާގެ ސަބަބުން ކުރިމަތިވި އިގްތިސާދީ ގޮންޖެހުންތަކާއި ގުޅިގެން އެމްއެމްއޭ އާއި ފިނޭންސް މިނިސްޓްރީއާއެކު 2019 ވަނަ އަހަރު ވެވުނު އެއްބަސްވުމެއްގެ ދަށުން ސޮވެރިން ޑިވެލޮޕްމެންޓް ފަންޑް (އެސްޑީއެފް)އަށް ޖަމާކުރެވޭ ޑޮލަރު އެމްއެމްއޭ އަށް މާރުކުރުމަށްފަހު ބޭނުންކުރެވޭ ރިޒާވްގައި ހިމަނާފައިވާކަމަށެވެ. އެހެންނަމަވެސް 2023 ވަނަ އަހަރުގެ ޑިސެމްބަރު މަހުން ފެށިގެން ސޮވެރިން ޑިވެލޮޕްމެންޓް ފަންޑަށް ޖަމާވާ ބޭރު ފައިސާ އެމްއެމްއޭއަށް މާރުކުރުމުގެ ބަދަލުގައި ޑޮލަރުން ބެހެއްޓުމަށް ނިންމުމުން ބޭނުންކުރެވޭ ގޮތަށް 65 މިލިއަން ޑޮލަރު ހުރިކަން އެމްއެމްއޭއިން ފާހަގަކުރެއެވެ.

އެމްއެމްއޭއިން ވިދާޅުވީ އެސްޑީއެފަށް ޖަމާކުރެވޭ ބޭރުފައިސާގެ އަދަދު އިތުރުކުރުމަށް ސަރުކާރުން އަޅަން ނިންމާފައިވާ ފިޔަވަޅުތަކުގެ ސަބަބުން އެސްޑީއެފްގެ އަދަދު ކުރިން ލަފާކުރި އަދަދަށްވުރެ އިތުރުވެގެންދާނެކަމަށެވެ.

އަދި ރާއްޖޭގެ ޓޫރިޒަމާއި ގުޅިފައިވާ އިންޑަސްޓްރީތަކުން މިއަހަރުގެ ބާކީއޮތް ދުވަސްތަކުގައި ކުރިން ލަފާކުރި ގޮތާ ޚިލާފަށް އިތުރު ކުރިއެރުންތަކެއް ލިބޭނެކަމަށް އެމްއެމްއޭއަށް އަންދާޒާ ކުރެވޭތީ މީގެ ހެޔޮ ބަދަލު ރިޒާވްއިން ފެންނާނެކަމަށްވެސް އެމްއެމްއޭއިން ވަނީ ބުނެފައެވެ.

މީގެ އިތުރުން ސަރުކާރާއި ސަރުކާރު ހިއްސާވާ ކުންފުނިތަކުގެ ބޭރު ފައިސާގެ މުއާމަލާތްތަކަށް ބޭނުންވާ ފައިނޭންސިން ބޭރުގެ އެކިއެކި ފަރާތްތަކުން ހޯދުމުގެ މަސައްކަތްތަކެއް ދަނީ ސަރުކާރުން ކުރަމުންނެވެ. މިއާއެކު ފޮރިން ކަރަންސީ ލިކިއުޑިޓީ އިތުރުކުރުމުގެ ގޮތުން ފާއިތުވި އަހަރުތަކުގައިވެސް އެމްއެމްއޭއިން ބޭނުންކޮށްފައިވާ ކަރަންސީ ސްވޮޕް އެރޭންޖްމެންޓްގެ ތެރެއިން ބޭރު ފައިސާ ހޯދޭނެ ގޮތްތަކަކަށް ދަނީ މަސައްކަތްކުރަމުންކަމަށްވެސް އެމްއެމްއޭއިން ބުނެއެވެ.

ދައުލަތުގެ މާލީ ހާލަތު ރަނގަޅުކުރުމަށް، ކުރެވޭ މަސައްކަތްތައް ބޭރުގެ މާލީ އިދާރާތަކުންވެސް ވަނީ ބަލައިގަނެފައެވެ. އެގޮތުން ސަރުކާރުން ރިފޯމް އެޖެންޑާގައި ހިމަނާފައިވާ ފިޔަވަޅުތަކުން އިޤްތިޞާދީ ހާލަތު ރަނގަޅު ކުރެވޭނެ ކަމަށް މާލީ އިދާރާތަކުން ވަނީ ހާމަކޮށްފައެވެ..