އިންޑިއާގެ އެހީގައި، 28 ރަށެއްގެ ކުރިއަށް ގެންދިޔަ ފެނާއި ނަރުދަމާގެ މަސައްކަތް ނިންމައި ޙަވާލުކޮށްފި

އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓް ފެސިލިޓީގެ ދަށުން 28 ރަށެއްގައި ކުރިއަށް ގެންދިޔަ ފެނާއި ނަރުދަމާ ނިޒާމު ޤާއިމުކުރުމުގެ މަސައްކަތް ނިންމައި ރަސްމީކޮށް ދިވެހި ސަރުކާރާ ހަވާލުކޮށްފިއެވެ.

އެކަމަށްޓަކައި ރައީސުލްޖުމްހޫރިއްޔާގެ އޮފީހުގައި ޚާއްސަ ރަސްމިއްޔާތެއް ބޭއްވިއެވެ. މަސައްކަތް ނިންމައި އެކަމުގެ ލިޔުން ރަސްމީކޮށް ދިވެހި ސަރުކާރާ ހަވާލުކުރެއްވީ އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ.ސުބްރަމާނިއަމް ޖަޔަޝަންކަރެވެ. ދިވެހި ސަރުކާރުގެ ފަރާތުން ލިޔުމާ ހަވާލުވެ ވަޑައިގަތީ ރާއްޖޭގެ ޚާރިޖީ ވަޒީރު މޫސާ ޒަމީރެވެ.

އިންޑިއާގެ އެގްޒިމް ބޭންކުގެ އެހީގައި 34 ރަށެއްގައި ފެނާއި ނަރުދަމާ ނިޒާމު ޤާއިމްކުރުމަށް ހަމަޖެހިފައިވާކަމަށް ސަރުކާރުން އެންމެ ފުރަތަމަ ހާމަކުރައްވާފައިވަނީ 2019ވަނަ އަހަރުގެ މާރޗް މަހުގެ 28ވަނަ ދުވަހުއެވެ.

މި މަޝްރޫޢަކީ އެގްޒިމް ބޭންކާއެކު 2019ވަނަ އަހަރުގެ މާރޗް މަހުގެ 18ވަނަ ދުވަހު ސޮއިކުރެއްވި ކްރެޑިޓް ލައިން އެއްބަސްވުމެއްގެ ދަށުން ކުރިއަށްގެންދިޔަ މަސައްކަތެކެވެ. މިމަސައްކަތުގެ ދަށުން މިވަނީ 28 ރަށެއްގައި ކުރިއަށްގެންދިޔަ މަޝްރޫޢު ނިންމާލާފައެވެ. އެއީ 21 ރަށެއްގައި ފެނުގެ ނިޒާމު ތަރައްޤީކުރުމާއި 2 ރަށެއްގައި ނަރުދަމާ ނިޒާމު ޤާއިމްކުރުމެވެ. އަދި 5 ރަށެއްގައި ފެނާއި ނަރުދަމާގެ ނިޒާމު ޤާއިމްކޮށްފައިވެއެވެ.

ފެނުގެ ނިޒާމު ޤާއިމްކޮށްފައިވާ ރަށްތައް

• ހއ.ކެލާ
• ށ.ފުނަދޫ
• ނ.މަނަދޫ
• ކ.ކާށިދޫ
• ޅ.ކުރެންދޫ
• ވ.ފެލިދޫ
• ދ.މީދޫ
• ފ.ބިިލެއްދޫ
• ލ.މާބައިދޫ
• ލ.އިސްދޫ-ކަލައިދޫ
• ލ.މާމެންދޫ
• ލ.ގަން
• މ.ކޮޅުފުށި
• މ.މުލި
• ތ.ހިރިލަންދޫ
• ގއ.މާމެންދޫ
• ގއ.ދާންދޫ
• ގއ.ގެމަނަފުށި
• ގދ.ފަރެސްމާތޮޑާ
• ގދ.ހޯޑެއްދޫ
• ގއ.މަޑަވެލި

ނަރުދަމާ ނިޒާމު ޤާއިމްކޮށްފައިވާ ރަށްރަށް

• އއ.ތޮއްޑޫ
• އދ.ދަގެތީ

ފެނާއި ނަރުދަމާ ޤާއިމްކޮށްފައިވާ ރަށްތައް

• މ.މަޑުއްވަރީ
• ވ.ފުލިދޫ
• ވ.ތިނަދޫ
• ދ.ބަޑިދޫ
• ފ.ދަރަބޫދޫ

އިންޑިޔާގެ އެކްސްޓަރނަލް އެފެއާޒް މިނިސްޓަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރޭގައިވަނީ އިންޑިޔާ ސަރުކާރުގެ އެހީގައި ކުރިއަށްގެންދިޔަ 6 މަޝްރޫޢެއްގެ ނިމުންވެސް ފާހަގަކުރައްވާފައިވެއެވެ.