ރައީސް އިސްކަންދެއްވަނީ ޢިލްމީ ދިރާސާތަކަށްފަހު ކަންކަން ނިންމެވުމަށް: ޢަބްދުއްރަޙީމް

ޢިލްމީ ދިރާސާތައްކުރުމަށްފަހު ޤައުމުގެ ބޮޑެތި ކަންކަން ނިންމެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްކަންދެއްވާކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ވިލާ ކޮލެޖުގައި އަލަށް ތަޢާރަފްކުރި ދެ ޕްރޮގުރާމެއް އިފްތިތާޙްކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.

ރައްޔިތުންގެ މަޖިލީހުގެ ރައީސް، ޢަބްދުއްރަޙީމް ޢަބްދުﷲ ވިދާޅުވީ ޢުމްރާނީ ގޮތުންނާއި އިޤުތިޞާދީގޮތުން ރާއްޖެ ކުރިއަރަމުންދާއިރު މި ދާއިރާތަކުން ޢިލްމީ ދިރާސާތައްކުރުމަކީ މުހިންމުކަމެއް ކަމަށެވެ. އަދި ދާއިރާތައް ކުރިއެރުވޭނީ ޢިލްމީ ދިރާސާތަކެއް ކޮށްގެންކަން ޢަބްދުއްރަޙީމް ވިދާޅުވިއެވެ.

މަޖިލީހުގެ ރައީސް ވިދާޅުވީ ރާއްޖޭގައި މިވަގުތު ވެރިއަކަށް ހުންނެވީ ޢިލްމަށް ލޯބި ކުރައްވާ، ޢިލްމުގެ ރޮނގުން ޙާސިލްކުރެއްވޭނެ އެންމެ މަތީ ސަނަދު ހޯއްދަވައިގެން ހުންނެވި ވެރިއެއްކަމަށެވެ. އެފަދަ ބޭފުޅެއް ރާއްޖޭގެ ރައީސުލްޖުމްހޫރިއްޔާކަމުގެ މަޤާމުގައި ހުންނެވުމަކީ ކިޔަވާ ދަރިވަރުންނަށް ލިބޭ ނަސީބެއްގެގޮތުގައި ޢަބްދުއްރަޙީމް ސިފަކުރެއްވިއެވެ.

ޢަބްދުއްރަޙީމް ވިދާޅުވީ އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޤަބޫލުފުޅު ކުރައްވަނީ ޤައުމުގެ މުހިންމު ކަންކަމަށް ގޮތް ނިންމާވާނީ ޢިލްމީ ދިރާސާތަކެއް ކުރުމަށް ފަހުގައިކަމަށެވެ. އަދި ފުޅާ ދާއިރާއެއްގައި ޢިލްމީ ދިރާސާތައް ކުރުމަށް މަގު ފަހިކޮށްދެއްވާނެކަމަށް ރައީސުލްޖުމްހޫރިއްޔާ ވިދާޅުވެފައިވާކަންވެސް ޢަބްދުއްރަޙީމް ފާހަގަކުރެއްވިއެވެ.

ޢަބްދުއްރަޙީމް ވިދާޅުވީ ވިލާ ކޮލެޖުން ތަޢާރަފްކުރި އައު ޕްރޮގްރާމްތަކުން ރާއްޖޭގެ މުހިންމު ދާއިރާތަކަށް ކުރިއެރުން ހޯދަދޭނެކަމަށާއި، ރައީސް ބޭނުންފުޅުވާފަދަ ދިރާސާވެރިން އުފެދޭނެ ކަމަށެވެ. އެގޮތުން ރާއްޖޭގެ ސިޔާސީ ދާއިރާއަށް އަންނާނެ ކުރިއެރުންތައް ޢަބްދުއްރަޙީމް ފާހަގަކުރެއްވިއެވެ.

"ސިޔާސީ ޢިލްމަކީ ވަރަށް ފުޅާ އެއްޗެއް. ވެރިކަމުގެ ނިޒާމުތައް އެކުލެވޭ ގޮތާއި ސަރުކާރުގެ އޮނިގަނޑާއި ރައްޔިތުންނާ ގުޅުންހުރި ކަންކަން ނިންމުމާއި ޚާރިޖީ ގުޅުންތަކާއި އިންސާނީ ޙައްޤުތަކާބެހޭ މަޢުލޫމާތު މި ޢިލްމުގައި ހިމެނޭ. މިފަދަ ޕްރޮގުރާމެއް ތަޢާރަފްވެގެން ދިޔުމަކީ ރާއްޖޭގެ ސިޔާސީ މުސްތަޤުބަލަށް ރަނގަޅު އަސަރުތަކެއް ކުރާނެ ކަމެއް." ޢަބްދުއްރަޙީމް ޢަބްދުﷲ ވިދާޅުވިއެވެ.

ވިލާ ކޮލެޖުން އަލަށް ތަޢާރަފްކުރި ދެ ޕްރޮގުރާމަކީ ބެޗްލަރ އޮފް ޕޮލިޓިކަލް ސައިންސް އެންޑް އިންޓަނޭޝަނަލް ރިލޭޝަންސްއާއި، ބެޗްލަރ އޮފް ކުއެންޓިޓީ ސަރވޭއިންއެވެ. މި ދެ ޕްރޮގުރާމުގެވެސް މުއްދަތަކީ 3 އަހަރު ދުވަހެވެ. މިއީ މޯލްޑިވްސް ކޮލިފިކޭޝަންސް އޮތޯރިޓީ، އެމްކިޔުއޭގެ ލެވެލް 7ގެ ޕްރޮގުރާމުތަކެކެވެ.

ވިލާ ކޮލެޖުން ބުނީ ޕޮލިޓިކަލް ސައިންސް އެންޑް އިންޓަނޭޝަނަލް ރިލޭޝަންސްގެ ޑިގްރީ ޕްރޮގުރާމުން ދަރިވަރުންނަށް ރާއްޖޭގެ ސިޔާސީ މަސްރަޙާއި ސިޔާސީ މަސްރަޙުގެ ތާރީޚާއި ޚާރިޖީ ގުޅުންތަކާ ބެހޭގޮތުން މަޢުލޫމާތު ދެވޭނެކަމަށެވެ. އަދި ކުއެންޓިޓީ ސަރވޭއިންގެ ޑިގްރީ ޕްރޮގުރާމުން ޢުމްރާނީ ތަރައްޤީގެ މަޝްރޫޢަކަށް ބޭނުންވާ މާލީ ކަންކަމާއި ޕްރޮކިޔުމެންޓްގެ ކަންކަން މެނޭޖްކުރާނެ ގޮތް ދަރިވަރުންނަށް ދަސްކޮށްދެވޭނެ ކަމަށެވެ.