ސަލާމަތީ ފިޔަވަޅުތަކާއެކު ބަންގްލަދޭޝްގެ ލޭބަރުން ގެނައުމުގެ ލިމިޓު އުވާލަން ހުށައަޅަނީ

ރާއްޖެއަށް ބަންގްލަދޭޝްގެ ލޭބަރުން ގެނެވޭނެކަމަށް ކަނޑައަޅާފައިޥާ ޢަދަދު އުވާލުމަށް ޤާނޫނަށް އިސްލާހު ހުށަހަޅުއްވާނެ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގެ ސަލާމަތީ ޚިދުމަތްތަކޭބެހޭ ކޮމިޓީގައި ވާހަކަފުޅުދައްކަވަމުންނެވެ.

ބަންގްލަދޭޝްގެ ލޭބަރުން ގެނައުމަށް ވަކި ޢަދަދެއް ކަނޑައަޅާފައި އޮތް ސަބަބާއި، އެއީ ވަކި ގައުމެއްގެ ބަޔަކަށް ތަފާތުކުރުން ކަމަށް ވިދާޅުވެ މެންބަރަކު ކޮމިޓީގައި ކުރެއްވި ސުވާލަށް ޖަވާބުދެއްވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވީ ރާއްޖޭގައި ލޭބަރުންނަށް މިހާރު އޮތް ޑިމާންޑާއި ކުރިއަށް އޮތްތަނުގައި އަންދާޒާކުރެވޭ ޑިމާންޑަށް ބަލާއިރު ބަންގްލަދޭޝްގެ ލޭބަރުންގެނެވޭނެ ޢަދަދު އުވާލަން ޖެހޭކަމަށް ދެކެވަޑައިގަންނަވާ ކަމަށެވެ. މިހާރު ޤާނޫނު ބުނާގޮތުން ބަންގްލަދޭޝުން ރާއްޖެއަށް ގެނެވޭނީ 100،000 ލޭބަރުންނެވެ.

ބަންގްލަދޭޝްގެ ލޭބަރުން ރާއްޖެ އެތެރެކުރެވޭ ޢަދަދު އުވާލަން ޖެހޭކަމަށް ދެކެވަޑައިގެންނެވި ނަމަވެސް އެކަން ކުރަންވާނީ އިތުރު ފިޔަވަޅުތަކެއް އެޅުމަށް ފަހުގައި ކަމަށް ވަޒީރު ވިދާޅުވިއެވެ. އެގޮތުން، އެ ވުޒާރާއިން ބިދޭސީންގެ ކަންކަން ބަލަހައްޓާ ނިޒާމަށް ބަދަލުތައް ގެނެސް ސައްތައިންސައްތަ ބަޔޮމެޓްރިކްކޮށް ޖަވާބުދާރީ ކުރެވޭގޮތަށް ބަދަލުތައް ގެނައުމުން އެ ހުއްދަ ދޭން ފަސޭހަވާނެކަމަށް ވަޒީރު ވިދާޅުވިއެވެ.

މީގެ އިތުރުން ރަށްރަށަށް ގެންދާ ބިދޭސީންނަށް ވޯކް ޕާމިޓްގެ އިތުރުން ރަށު ކައުންސިލްތަކުން ގަބޫލުކުރާ ޕާމިޓެއް ދިނުމަކީ ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް ދާއިމީ ހައްލަކަށްވާނެ ކަމެއްކަންވެސް ވަޒީރު ފާހަގަކުރެއްވިއެވެ.

އިޙްސާން ވިދާޅުވީ ބޯޑަރ ކޮންޓްރޯލް ސިސްޓަމާއި އެކްސްޕެޓްރިއޭޓް ސިސްޓަމް މެދުވެރިކޮށް ބެލި ބެލުމުން ރާއްޖޭގައި މިހާރު 90،624 ބަންގްލަދޭޝްގެ ލޭބަރުން އެބަތިބިކަމަށެވެ.

އެއްލައްކަ ބަންގްލަދޭޝް ލޭބަރުން ހަމަވާން ބާކީ ނުވަ ހާހެއްހާ ޖާގަ އޮތުމުން އެ ޢަދަދަށް މީހުން ގެންނަން ސަރުކާރުން ހުއްދަ ދިން ނަމަވެސް، އޭގެ ނާޖާއިޒު ފައިދާ ނަގާފައިވާކަމަށް އިޙްސާން ވިދާޅުވިއެވެ. އެގޮތުން ކުރިން ބްލެކް ލިސްޓުކޮށްފައި ހުރި ބައެއް ކުންފުނިތަކަށް ދީފައި ހުރި ކޯޓާތަކަށް ބިދޭސީ މަސައްކަތްތެރިން އެތެރެކޮށް ދޫކޮށްލާފައިވާކަމަށް ވަޒީރު ވިދާޅުވިއެވެ. މި މައްސަލަ ފާހަގަވި ހިސާބުން އަނެއްކާވެސް ވަނީ ބަންގްލަދޭޝް މީހުން ނުގެނެވޭގޮތަށް ބޯޑަރު ބަންދުކޮށްފައެވެ.

"އެހެންވީމާ ދާއިމީ ގޮތެއްގައި އަޅުގަނޑުމެންނަށް ލޮކެއް އަޅުވާނުލެވެނީސް ބޯޑަރު ހުޅުވާލަން ބޭނުންނުވީ." ދާޚިލީ ސަލާމަތާ ފަންނިއްޔާތާ ބެހޭ ވަޒީރު ވިދާޅުވިއެވެ.

ބިދޭސީން ގެނެސް ދޫކޮށްލާ ކުންފުނިތަކުގެ މައްސަލަ ފުލުހުން މެދުވެރިކޮށް މިހާރު ތަހުގީގުކުރަމުން އަންނަ ކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވިއެވެ.