"ޓްރާންސްފޯމް" ޕްރޮޖެކްޓާއެކު މަސްވެރިކަމުގެ ދާއިރާއަށް އިތުރު ކުރިއެރުންތައް ލިބޭނެ: ޝިޔާމް

ޓްރާންސްފޯމް ޕްރޮޖެކްޓުގެ ސަބަބުން ރާއްޖޭގެ މަސްވެރިކަމުގެ ދާއިރާއަށް އިތުރު ކުރިއެރުންތައް ލިބޭނެކަމަށް މަސްވެރިކަމާއި ކަނޑުގެ ދިރުންތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ ޓްރާންސްފޯމް ޕްރޮޖެކްޓް ފެށުމަށް ޕްރޮޖެކްޓުގައި ހިމެނޭ ބައިވެރިންނަށް މައުލޫމާތު ދިނުމުގެ ގޮތުން ބޭއްވި ވޯކްޝޮޕް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

"ޓްރާންސްފޯމިންގ ފިޝަރީޒް ސެކްޓަރ މެނޭޖްމަންޓްއިން ސައުތް ވެސްޓް އިންޑިއަން އޯޝަން ރީޖަން އެންޑް އިން މޯލްޑިވަސް ޕްރޮޖެކްޓް" ޓްރާންސްޕޯމްއަކީ ވޯލްޑް ބޭންކުގެ ހިލޭ އެހީއާއި ލޯނު އެހީގެ ދަށުން ކުރިއަށްގެންދާ ޕްރޮގްރާމެެކެވެ.

މަސްވެރިކަމާއި ކަނޑުގެ ދިރުންތަކާބެހޭ ވަޒީރު އަހުމަދު ޝިޔާމް ވިދާޅުވީ މި މަޝްރޫއަކީ ހުޅަނގު ދެކުނު އިންޑިޔާ ކަނޑުގެ ސަރަޙައްދުގައި ހެކިތަކަށް ބިނާކޮށް މަސްވެރިކަމުގެ ކަންކަން ބެލެހެއްޓުން ހަރުދަނާކުރުމަށާއި މި ސަރަހައްދުގެ މަސްވެރިކަމުގައި ދިވެހިރާއްޖޭގެ ވާދަވެރިކަން އިތުރުކުރުމުގެ މަގުސަދުގައި ކުރިއަށްގެންދާ މަޝްރޫއެއް ކަމަށެވެ.

އަދި މިއީ މަސްވެރިކަމުގެ ދާއިރާއިން ވޯލްޑު ބޭންކުން ރާއްޖޭގައި ހިންގާ އެންމެ ބޮޑު މަޝްރޫއު ކަމަށާއި މަޝްރޫއުގެ ކާމިޔާބީއަށް ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ދެއްވާ ކަމަށްވެސް ވަޒީރު ވިދާޅުވިއެވެ.

މި މަޝްރޫއުގެ އެއްބަސްވުމުގައި މިދިޔަ އަހަރުގެ އޯގަސްޓްމަހުގެ ތެރޭގައި ސޮއިކޮށްފައިވާކަން ފާހަގަކުރައްވައި ވަޒީރު ވިދާޅުވީ ފާއިތުވި މަސްތަކުގައި މަސައްކަތްކުރަމުން އައީ އައު ސަރުކާރުގެ ސިޔާސަތުތަކާ މަޝްރޫއާ ގުޅާލުމަށް ކަމަށެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިކަމުގެ ދާއިރާ ތަރައްގީކުރުމަށް ގެންގުޅުއްވާ ލަނޑުދަނޑިތައް ސާފުވެފައި ރަނގަޅު ކަމަށާއި އެހެންވެ މި މަޝްރޫއާއެކު މަސްވެރިކަމުގެ ދާއިރާ އާއި މަސްވެރިންގެ ދިރިއުޅުމަށް ހެޔޮ ބަދަލުތަކެއް އަންނާނެކަމަށް ވަޒީރު ވިދާޅުވިއެވެ.

ހަތް އަހަރު ދުވަހަށް ކުރިއަށްގެންދާ ޓްރާންސްފޯމް ޕްރޮޖެކްޓަކީ 64.8 މިލިއަން ޑޮލަރުގެ ބަޖެޓަށް ފަރުމާކޮށްފައިވާ ޕްރޮޖެކްޓެކެވެ. މީގެ ތެރެއިން 12 މިލިއަން ޑޮލަރު އިންޑިއަން އޯޝަން ކޮމިޝަނަށް ކަނޑައަޅާފައިވާއިރު، ދިވެހިރާއްޖެއަށް ކަނޑައަޅާފައިވަނީ 52.8 މިލިއަން ޑޮލަރެވެ. މީގެ ތެރެއިން 50 އިންސައްތައަކީ ހިލޭ އެހީއެވެ.

މި މަޝްރޫއު ކުރިއަށްގެންދަނީ މައިގަނޑު 3 ބަޔަކަށް ބަހާލައިގެންނެވެ. އެއީ އިންޑިއާ ކަނޑުގެ ހުޅަނގު-ދެކުނު ސަރަހައްދުގެ ގައުމުތަކުގެ މަސްވެރިކަމުގެ ސިނާޢަތް ބާރުވެރި ކުރުމަށްޓަކައި ދިރާސާ އާއި ސައިންސް ބޭނުންކުރާ މިންވަރު އިތުރުކުރުމާއި މަސްވެރިކަން ހިންގުމާއި ބެލެހެއްޓުމަށް ސަރަޙައްދީ ކެޕޭސިޓީ ހަރުދަނާކުރުމުގެ ކެޓެލިސްޓެއްގެ ގޮތުގައި ރާއްޖެއަށް އެހީތެރިވުމާއި ރާއްޖެއާއި ހުޅަނގު ދެކުނު އިންޑިޔާ ކަނޑުގެ ސަރަޙައްދުގެ މަސްވެރިކަމަށް ވިޔަފާރި ރަނގަޅުކުރުމަށް ވާދަވެރިކަމާއި އަމިއްލަ ފަރާތްތަކުގެ ބައިވެރިވުން އިތުރުކުރުމެވެ. މިގޮތުން ކުދި އަދި މެދުފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން މެޗިންގ ގްރާންޓުގެ ގޮތުގައި ފޯރުކޮށްދިނުމަށްވެސް ވަނީ ނިންމާފައެވެ.