ބްރިޖު މަޝްރޫޢު މިހާރު ކުރިއަށްދާގޮތުން ސްޕީޑް އިތުރަށް އަވަސްވާނެ: ޑރ. މުއްޠަލިބު

ތިލަމާލެ ބްރިޖްގެ މަސައްކަތް މިހާރު ކުރިއަށްދާގޮތައް ބަލާއިރު މި މަޝްރޫއު އިތުރަށް އަވަސްކުރެވޭނެކަމަށް ޤަބޫލުކުރެވޭކަމަށް ޢިމާރާތްކުރުމާއި ބިނާރާއި ބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވެއްޖެއެވެ. ވަޒީރު މިހެން ވިދާޅުވީ، ތިލަމާލެ ބްރިޖްގެ މަސައްކަތް ބައްލަވާލެއްވުމަށްފަހު ނޫސްވެރިންނަށް މައުލޫމާތުދެއްވަމުންނެވެ.

ތިލަމާލެ ބްރިޖްގެ މަސައްކަތް ކުރިއަށްދާގޮތް ބައްލަވާލެއްވުމަށްޓަކައި ޢިމާރާތްކުރުމާއި ބިނާރާއި ބެހޭ ވަޒީރު ޑރ.ޢަބްދުﷲ މުއްޠަލިބާއި، އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ވަނީ ސައިޓަށް ޒިޔާރަތްކުރައްވާފައެވެ.

ވިލިމާލެ ސައިޓްގައި ހުންނަވާ ނޫސްވެރިންނަށް މައުލޫމާތުދެއްވަމުން ޢިމާރާތްކުރުމާއި ބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވީ، މި މަޝްރޫޢުއަށް މިހާރު ބޮޑު ކުރިއެރުމެއް ލިބިފައިވާކަމަށެވެ. މި މަސައްކަތް މިހާރު ކުރިއަށްދާ ސްޕީޑަށް ބަލާއިރު އަދި އިތުރަށް ސްޕީޑް އަވަސް ކުރެވޭނެކަމަށް މިހާރު ގަބޫލުކުރައްވާކަން ފާހަގަކުރައްވާ ވަޒީރު ވަނީ ކޮންޓްރެކްޓަރާއި އެއްކޮށް ވަރަށް ގާތުން މަސައްކަތް ކުރަމުންދާކަމަށް ވިދާޅުވެފައެވެ. އިންޑިއާ ސަރުކާރާއި ސަފީރުގެ އެއްބާރުލުން ވަރަށް ބޮޑަށް ލިބެމުންދާކަންވެސް ވަޒީރު ފާހަގަކުރެއްވިއެވެ.

"އަޅުގަނޑުމެން މިހާރު މިތިބީ ބްރިޖްގެ ސެގްމެންޓްތައް ލޯންޗްކޮށްފައި އެކަތި އަނެކަކާއި ގުޅުވާފައި ހުރި ތަނެއްގެ މަތީގައި. އަޅުގަނޑުމެން މިތިބި ތަނަކީ ވިލިނގިއްޔަށް ފައިބާ ސަރަހައްދު. ދެން ގުޅީފަޅާއި ހިސާބަށް މިދަނީ. އެއްވަގުތެއްގައި ތިން ސްޕޭންއެއްގައި ލޯންޗްކުރަމުން ގެންދާނެ. އެގޮތުން މިހާރު މި ލޯންޗްކޮށްފައި އިން އެއް ސަރަހައްދުގައި މިތިބީ. އިރާދަކުރެއްވިއްޔާމުން މިދާ ސްޕީޑްގައި ދާކަމުގައި ވަންޏާމު އަޅުގަނޑުމެންނަށް ގަބޫލުކުރެވެނީ މަސައްކަތް އިތުރަށްވެސް ސްޕީޑްއަޕް ކުރެވި މަސައްކަތް އަވަސްކުރުމުގެ ފުރުސަތު ވަރަށް ބޮޑޭ." ޢިމާރާތްކުރުމާއި ބިނާރާ ބެހޭ ވަޒީރު ވިދާޅުވިއެވެ.

ތިލަމާލެ ބްރިޖް މަޝްރޫއާއި ގުޅޭގޮތުން މައުލޫމާތުދެއްވަމުން އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ވިދާޅުވީ، މިއީ ރާއްޖޭގެ އިޤްތިސާދަށް ވަރަށް ބޮޑު ކުރިއެރުމެއް އަންނާނެ މަޝްރޫޢުއަކަށް ވެގެންދާނެކަމަށެވެ. އަދި މާލެ ސަރަހައްދުގައި ދިރިއުޅޭ ފަރާތްތަކަށް ވަރަށް ބޮޑު ފަސޭހައެއް ލިބިގެންދާނެ މަޝްރޫޢުއެއްކަން ސަފީރު ފާހަގަކުރެއްވިއެވެ. އެހެންކަމުން ޕްރޮޖެކްޓް އަވަހަށް ނިންމުމަށްޓަކައި ދިވެހި ސަރުކާރާއެކު ވަރަށް ގާތުން މަސައްކަތް ކުރަމުން އަންނަކަން ސަފީރުވެސް ތަކުރާރުކުރެއްވިއެވެ.

"މިއީ އިންޑިއާ ސަރުކާރުގެ ހިލޭ އެހީއާއި އިންޑިއާ ސަރުކާރުގެ ލޯނެއްގެ ދަށުން ކުރިއަށްގެންދާ ޕްރޮޖެކްޓެއް. މި ޕްރޮޖެކްޓް ނިންމަން ކަނޑައަޅާފައި އޮތް ތާރީޚަށް ނިންމުމަށްޓަކައި ދިވެހި ސަރުކާރާއި ވަރަށް ގާތުން މިދަނީ މަސައްކަތް ކުރަމުން. ޖޮއިންޓް ޕްރޮޖެކްޓް މޮނިޓަރިން ކޮމިޓީއާއިއެކުވެސް ދާދިފަހުން ވަނީ ބައްދަލުވުމެއް ބާއްވާފައި. އެ ބައްދަލުވުން ކޯޗެއަރ ކުރައްވަނީ އަޅުގަނޑާއި އަދި ކޮންސްޓްރަކްޝަން މިނިސްޓަރ. އަދި ސައިޓަށް ޒިޔާރަތްކޮށް އޮން ސައިޓް އިންސްޕެކްޝަންއެއް ކުރިއަށްގެންގޮސް މިކަމުގައި ހޯދޭ ކާމިޔާބީތައް ބެލުމަށް ނިންމުނު. ޕްރޮޖެކްޓް މިހާރު ރަނގަޅު ކުރިއެރުންތަކެއް ދަނީ ހޯދަމުން." ސަފީރު ވިދާޅުވިއެވެ.

ތިލަމާލެ ބްރިޖްގެ ޓައިމްލައިންގައިވާ ގޮތުން މާލެއިން ގުޅިފަޅަށް މަސައްކަތްތައް ނިންމުމަށް ތައާވަލުކޮށްފައިވަނީ 31 މާރޗް 2026އަށެވެ. ގުޅިފަޅުން ތިލަފުއްޓަށް ގުޅާލާ ބްރިޖްގެ މަސައްކަތް ނިންމުމަށް ތައާވަލުކޮށްފައިވަނީ 30 ސެޕްޓެމްބަރު 2026އަށެވެ. މިއާއެކު މުޅި މަޝްރޫޢު ނިމޭނެކަމަށްވެސް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026އަށް ކަމަށް ޢިމާރާތްކުރުމާއި ބިނާރާބެހޭ ވުޒާރާއިން ވިދާޅުވެއެވެ.

ބްރިޖް އެޅުމަށްޓަކައި 1220 ޕްރީ-ކާސްޓް ސެގްމަންޓް ތައްޔާރުކުރާއިރު މިހާރު މީގެތެރެއިން 390 ސެގްމެންޓް ވަނީ ނިމިފައެވެ. އަދި މީގެތެރެއިން 20 ސެގްމަންޓް މިހާރު ވަނީ ލޯންޗްކޮށްފައެވެ. 4 ސަރަޙައްދެއް ގުޅުވާލާ ޖުމްލަ 6.7 ކިލޯމީޓަރުގެ މިބްރިޖު ތަރައްޤީކުރުމަށް 7 ބިލިއަނަށްވުރެ ގިނަ ދިވެހި ރުފިޔާ ހޭދަކުރެއެވެ.