އިގްތިސާދީ ތަރައްގީގައި ބީސީސީގެ ދައުރު ބޮޑުވާނެ: ސަޢީދު
-
މިނިވަން ވިޔަފާރީގެ އެއްބަސްވުންތަކާއެކު އިތުރު ފުރުސަތުތައް ހުޅުވިގެންދާނެކަން ފާހަގަކުރެއްވި
ބިޒްނަސް ސެންޓަރ ކޯޕަރޭޝަން، ބީސީސީއަކީ ރާއްޖޭގެ އިޤްތިޞާދީ ތަރައްޤީގައި މުހިއްމު ދައުރެއް އަދާކުރާނެ ކުންފުންޏެއްކަމަށް އިގްތިސާދީ ތަރައްގީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ސަޢީދު މިހެން ވިދާޅުވީ ބީސީސީގެ 7 ވަނަ އަހަރީ ދުވަހާ ގުޅުވައިގެން ބޭއްވި ސްޓާފް ގާލާ ނައިޓް ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
އިގްތިސާދީ ތަރައްގީ އާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވީ ބީސީސީގެ އޯތެންޓިކް މޯލްޑިވްސް މެދުވެރިކޮށް ދިވެހި އުފެއްދުންތައް ކުރިއެރުވުމަކީ މަގުސަދެއް ކަމަށާއި އެހެންކަމުން ކުންފުނީގެ ހިންގުން ހަރުދަނާކޮށް ދެކޮޅު ޖެހޭ ވިޔަފާރިއެއް ގޮތުގައި ކުރިއަށްގެންދިއުމަށް މަސައްކަތްކުރަންޖެހޭ ކަމަށެވެ. އެގޮތުން އެކި ކާރުހާނާތައް ގާއިމުކުރުމަކީވެސް ކުރެވިދާނެ ކަމެއް ކަމަށާއި ލޮނު އުފައްދާ ކާރުހާނާއެއް ހެދުމަށް ފީޒިބިލިޓީ ސްޓަޑީ އެއް ހަދައި އިތުރު ސްޓަޑީއެއް ހެދުމުގެ މަސައްކަތްވެސް ކުރައްވަމުންގެންދަވާކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ރާއްޖޭގައި ގަރމަންޓްސް ކާރުހާނާއެއް އުފެއްދުމަށްވެސް ސަރުކާރުން ބޭނުންވާކަމަށާއި އެފަދަ ތަކެތި އުފެއްދުމަށް މާކެޓެއްވެސް ބޭނުންވާނެ ކަމަށެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅު ހުންނެވީ ވިޔަފާރިތައް ޕްރައިވެޓައިޒްކުރުމާއި ޕަބްލިކް ޕްރައިވެޓް ޕާޓްނާޝިޕްތައް އުފެއްދުމަށްކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ ޗައިނާއާއެކު ހެދިފައިވާ މިނިވަން ވިޔަފާރި އެއްބަސްވުމަށް މިއަހަރު އަމަލުކުރަން ފެށުމުން ބޮޑު މާކެޓް އެކްސެސްއެއް ލިބޭނެ ކަމަށެވެ. އަދި ކޮލިޓީއާ ސްޓޭންޑަޑް އިންފްރާސްޓްރަކްޗަރއެއް ގާއިމްކޮށް އިމްޕޯޓް ކުރާ ތަކެތީގެ ކޮލިޓީ އިތުރަށް ހަރުދަނާ ކުރުމަށް މަސައްކަތް ކުރަމުންދާކަމަށްވެސް ވަޒީރު ވިދާޅުވިއެވެ.
"މިއާއެކު އަޅުގަނޑުމެން މަސައްކަތް މިކުރަނީ ރައީސްގެ ލަފާފުޅާއެކު ތުރުކީއާއެކު ފްރީޓްރޭޑް އެރޭންޖްމަންޓް ނިންމަން. އިރާދަކުރެއްވިއްޔާ މިއަހަރު ތެރޭގައި އެކަންވެސް ނިމިގެން އިމްޕްލިމެންޓް ވެގެންދާނެ. މިހާރު ޔޫކޭއާއެކު ކުރިއަށްދާ ފްރީޓްރޭޑް އެރޭންޖްމަންޓްގެ ވާހަކަވެސް އަޅުގަނޑު ކުރިން ދެންނެވިން. އެމަސައްކަތް ވެސް އިރާދަކުރެއްވިއްޔާ ބާރަށް ކުރިއަށްދާނެ،" އިގްތިސާދީ ތަރައްގީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވިއެވެ.
ވަޒީރު ވިދާޅުވީ އިންޑިއާއާއެކުވެސް މިނިވަން ވިޔަފާރި އެއްބަސްވުމެއް ހެދުމުގެ މަސައްކަތްވެސް ކުރިއަށްދާނެ ކަމަށެވެ. މީގެ އިތުރުން ކްރިއޭޓާ އިކޮނޮމީ ހަބެއް ގާއިމްކުރުމަށް ރައީސުލްޖުމްހޫރިއްޔާ ނިންމެވީ ވެރިކަމުގެ ކުރީކޮޅު ބޭނުންތެރި މަސައްކަތްތަކެއް ކުރެއްވުމަށް ކަމަށާއި އޭގެ ދަށުން ޕޭމަންޓް ނިޒާމްތައް ރާއްޖެއަށް ތައާރަފު ކުރެވޭނެކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ސަރުކާރުގެ އަމާޒަކީ މި ހުރިހާ މަސައްކަތެއްގެވެސް ކުރީ ސަފަށް ބީސީސީ ނެރުންކަމަށާއި އެ ވިސްނުމުގައި ބީސީސީގެެ މުވައްޒަން މަސައްކަތްކުރުމަށް ވަޒީރު އިލްތިމާސްކުރެއްވިއެވެ.