މަޖިލިސް މެންބަރުން ހުވާކުރުން މާދަމާ

ވިހިވަނަ ރައްޔިތުންގެ މަޖިލީހުގެ މެންބަރުން ހުވާކުރުމުގެ ރަސްމީއްޔާތު މާދަމާ ބާއްވާނެއެވެ.

ރައްޔިތުންގެ މަޖިލީހަށް އަލަށް އިންތިޚާބުވި މެންބަރުން ހުވާ ކުރުމުގެ ރަސްމިއްޔާތު ހެނދުނު 9:00 ގައި ފެށުމަށް ވަނީ ތަޢާވަލުކޮށްފައެވެ. މި ރަސްމިއްޔާތަށްފަހު މަޖިލީހުގެ ރައީސާއި ނައިބު ރައީސް އިންތިޚާބުކުރާ ޖަލްސާ 10:15 އަށް ތައާވަލުކޮށްފައިވާކަމަށް ރައްޔިތުންގެ މަޖިލީހުގެ އިދާރާއިން ވިދާޅުވެއެވެ.

މިޖަލްސާގެ ރިޔާސަތު ބަލަހައްޓަވަނީ މަޖިލީހުގެ ޤަވާއިދާއި އެއްގޮތްވާގޮތުގެ މަތީން، ދ. މީދޫ ދާއިރާގެ މެންބަރު އަހުމަދު ސިޔާމް މުޙައްމަދު ކަމަށެވެ.

މަޖިލީހުގެ ޤަވާއިދުގައިވާ ގޮތުން މަޖިލީހުގެ ރައީސާއި ނައިބު ރައީސް އިންތިޚާބު ކުރެވެންދެން ޖަލްސާގެ ރިޔާސަތު ބަލަހައްޓަވަން ޖެހޭނީ ޖަލްސާއަށް ޙާޒިރުވެވަޑައިގެން ތިއްބަވާ މެންބަރުންގެ ތެރެއިން މަޖިލީހުގެ މެންބަރުކަމުގައި މެދުނުކެނޑި އެންމެ ގިނަ ދުވަސްވީ މެންބަރެވެ. ސިޔާމް މިހާތަނަށް ވަނީ މަޖިލީހުގެ 4 ދައުރު ފުރިހަމަކޮށްފައެވެ. އަދި ފަސްވަނަ ދައުރަކަށް ވަނީ އިންތިޚާބުވެވަޑައިގެންފައެވެ.

މަޖިލީހުގެ ރައީސް އިންތިޚާބުކުރާނީ އެންމެ ފުރަތަމަ ބާއްވާ ޖަލްސާގައި މެންބަރުންގެ މެދުގައި ނަގާ ސިއްރު ވޯޓަކުންނެވެ. އެ ވޯޓު ނެގުމަށްފަހު ވޯޓު ގުނުމަށް ފަސް މެންބަރުންގެ ވަގުތީ ކޮމިޓީއެއް އެކުލަވާލާނެއެވެ. މި ފަސް މެންބަރުން ކަނޑައެޅުމުގައި މަޖިލީހުގައި ހިމެނޭ ހުރިހާ ސިޔާސީ ޕާޓީތަކެއް ހިމެނުމަށް މަޖިލީހުގެ ގަވާއިދު ބާރު އަޅައެވެ.

މާދަމާ މަސައްކަތް ފަށާ 20 ވަނަ މަޖިލީހަކީ މިހާތަނަށް އެންމެ ގިނަ މެންބަރުން ދާއިރާތައް ތަމްސީލު ކުރާ މަޖިލީހެވެ. އެގޮތުން 93 މެންބަރުން
ހިމެނިވަޑައިގަންނަވައެވެ.

މި މަޖިލީހުގެ ސުޕަރ މެޖޯރިޓީ ނަގާފައިވަނީ ވެރިކަންކުރާ މައި ޕާޓީ، ޕީއެންސީންނެވެ. އެ ޕާޓީއަށް ނިސްބަތްވެވަޑައިގަންނަވާ 75 މެންބަރުން މަޖިލީހުގައި ތިއްބަވާނެއެވެ. އެ ޕާޓީގެ ރައީސްގެ ހައިސިއްޔަތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަޖިލީހުގެ ރައީސަކަށް ފޮނަދޫ ދާއިރާގެ އިންތިޚާބީ މެންބަރު އަބްދުރަޙީމް އަބްދުﷲގެ ނަންފުޅާއި، މަޖިލީހުގެ ނައިބަކަށް ދިއްގަރު ދާއިރާގެ އިންތިޚާބީ މެންބަރު އަޙްމަދު ނާޒިމްގެ ނަންފުޅު ހުށަހަޅުއްވާފައެވެ. މި ދެނަންވެސް ޕީއެންސީގެ ޕީޖީގައި ހިމެނޭ އިންތިޚާބީ މެންބަރުންގެ އިއްތިފާގުން ވަނީ ފާސްކޮށްފައެވެ.

މަޖިލީހުގެ ރައީސް އިންތިޚާބުވުމާއެކު ޖަލްސާތަކުގައި ރިޔާސަތު ބަލަހައްޓަވާނީ ރައީސެވެ. އަދި ރައީސަށް ރިޔާސަތު ނުބެލެހެއްޓެވޭ ހާލަތްތަކުގައި ރިޔާސަތު ބަލަހައްޓަވާނީ ނައިބު ރައީސެވެ.

ވިހިވަނަ މަޖިލީހުގެ މެންބަރުން ހުވާ ކުރުމުގެ އެންމެ ފަހުގެ ތައްޔާރީތައް ރައްޔިތުންގެ މަޖިލީހުގެ އިދާރާއިން އަންނަނީ ވަމުންނެވެ. އެގޮތުން، އަލަށް އިންތިޚާބުވި މެންބަރުން މަޖިލީހުގެ ވޯޓިން ސިސްޓަމަށް އަހުލުވެރިކުރުވުމަށް ހާއްސަ ސެޝަނެއް ވަނީ ބާއްވާފައެވެ. އަދި މަޖިލީހުގެ އެކި ސެކްޝަންތަކުގެ އިސްވެރިން ވަނީ އެ ސެކްޝަންތަކުން މެންބަރުންނަށް ފޯރުކޮށްދޭ ޚިދުމަތްތަކާ ގުޅޭ މަޢުލޫމާތު ވެސް ހިއްސާ ކުރައްވާފައެވެ.

މިފަހަރު މަޖިލީހުގައި މައިނޯރިޓީ ޕާޓީ ތަމްސީލު ކުރާނީ އިދިކޮޅު އެމްޑީޕީންނެވެ. އެ ޕާޓީގެ 12 މެންބަރުން ހިމެނިވަޑައިގަންނަވާނެއެވެ.