ދިވެހި މުދައްރިސުން އިތުރުކުރުމަށް ތައުލީމީ ނިޒާމަށް ބަދަލު ގެންނާނަން: ވަޒީރު
-
ސްކޫލުގައި ހޭދަކުރަންޖެހޭ ވަގުތު ގިނަވުމަކީ ޓީޗަރުންގެ ޝައުގުވެރިކަން ގެއްލޭކަމެއް
-
ދިރާސީ އައު އަހަރުގެ ކިޔެވުން ފެށިއިރު އަލަށް ދާއިރާއާ ގުޅުނީ 41 ދިވެހި ޓީޗަރުން
ޓީޗިން ދާއިރާއަށް ވަންނަ ދިވެހިންގެ އަދަދު އިތުރުކުރުމަށް ތައުލީމީ ނިޒާމަށް ބަދަލުތަކެއް ގެންނަވާނޭކަމަށް ތަޢުލީމާބެހޭ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ.
ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅުދައްކަވަމުންނެވެ.
ތަޢުލީމާބެހޭ ވަޒީރު ޑރ. އިސްމާޢިލް ޝަފީޢު ވިދާޅުވީ ތައުލީމީ ނިޒާމު މިހާރު އޮތްގޮތުން މުދައްރިސުންނަށް ލިބެންޖެހޭ ގަދަރާއި އިޙްތިރާމް ނުލިބޭކަމަށެވެ، އެގޮތުން، ސްކޫލްތަކުގެ ޕްރިންސިޕަލުން ހުންނަން ޖެހޭ ސްކޫލް ނޫން އެހެން ސްކޫލްތަކަށް ބަދަލު ކުރުމާއި 300 އެއްހާ މުދައްރިސުންނަށް އުސޫލުތަކުގެ ބޭރުން ފިޔަވަޅު އަޅާފައިވާކަމަށް ވަޒީރު ވިދާޅުވިއެވެ. މީގެ ސަބަބުން ޓީޗަރުންގެ ތެރޭގައި ބިރުވެރިކަން އުފެދި ދާއިރާގެ އަގު ވެއްޓިފައިވާކަމަށާއި އެހެންކަމުން ޓީޗަރުންނަކީ ގަދަރުވެރި ބަޔަކަށް ހަދަން ވަރަށް ގިނަ މަސައްކަތްތަކެއް ކުރަން ޖެހޭކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ދިރާސީ އައު އަހަރުގެ ކިޔެވުން ފެށިއިރު އަލަށް ދާއިރާއާ ގުޅުނީ އެންމެ 41 ދިވެހި ޓީޗަރުން ކަމަށެވެ. މިއީ ވަރަށް މަދު އަދަދެއް ކަމަށާއި މުދައްރިސުން ސްކޫލުގައި ހޭދަކުރަން ޖެހޭ ވަގުތު އިތުރުވުމަކީ ވެސް ދާއިރާއަށް ދިވެހިން ޝައުގުވެރިނުވާ ސަބަބެއް ކަމަށް ވަޒީރު ވިދާޅުވިއެވެ.
"ޓީޗަރުންނަކީ ރެއާއި ދުވާލު އެ ބޭފުޅުންގެ އާއިލާ ގުރުބާންކޮށް، ވަގުތު ގުރުބާންކޮށް އަދި އެއްވެސް ވަރެއްގެ ސައިކޮލޮޖިކަލް ވެލްބީންގަކަށް ބެލުމެއް ނެތި މުޅި ނިޒާމް އެކުލަވާލެވިފައިވަނީ. މިފަދަ ގަޑުބަޑުކޮށްފައި އޮތް ނިޒާމެއް ހަމަމަގަށް އެޅުމުގެ މަސައްކަތް މިހާރު ކުރަމުންދަނީ،" ތަޢުލީމާ ބެހޭ ވަޒީރު ޑރ. އިސްމާއިލް ޝަފީޢު ވިދާޅުވިއެވެ.
ވަޒީރު ވިދާޅުވީ އެއްވެސް އުސޫލެއް ނެތް ގޮތަށް ރާވާފައިވާ ސްކޫލްތަކުގެ އިތުރު ހަރަކާތްތައް ދަރިވަރުންގެ ހަށިހެޔޮކަމާއި ދުޅަހެޔޮކަމަށް އަސަރު ނުކުރާގޮތަށް ބަދަލުކޮށް، ޓީޗަރުންގެ ވޯކްލޯޑް ކުޑަކުރައްވާނެ ކަމަށްވެސް ވަޒީރު ވިދާޅުވިއެވެ.
މީގެ އިތުރުން ޓީޗަރުން ސޯޝަލް މީޑިއާގައި ފާޅުކުރާ އުދާސްތަކަކީ ސައްހަ އުދާސްތަކެއްކަން ފާހަގަކުރައްވައި އެފަދަ ކަންބޮޑުވުންތައް ހައްލުކުރުމަށް ސަރުކާރުން މަސައްކަތް ކުރައްވާނެ ކަމަށްވެސް ތަޢުލީމާ ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވިއެވެ.