ބައިނަލްއަޤްވާމީ ކޯޓުގެ ޙުކުމަށް އިސްރާއީލުން ބޯލަނބަން ޖެހޭނެ: ރައީސް

ޔަހޫދީ ޒަޔަނިސްޓް ދައުލަތުން ފަލަސްތީނުގެ ޣައްޒާއަށް ދެމުން އަންނަ ޙަމަލާތައް ވަގުތުން ހުއްޓާލުމަށް ބައިނަލްއަޤްވާމީ ކޯޓުން މިއަދު ކުރި ހުކުމަށް އެ ދައުލަތުން ބޯލަނބަން ޖެހޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ބައިނަލްއަޤްވާމީ ކޯޓުގެ ނިންމުމަށް ތާޢީދު ކުރައްވައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ ޔަހޫދީ ދައުލަތުން ރަފަޙްގައި ހިންގަމުންދާ ލާއިންސާނީ އަމަލުތައް ވަގުތުން ހުއްޓާލުމަށް ކުރި ޙުކުމާއެއްގޮތަށް ބޯލަނބަން ޖެހޭނެ ކަމަށެވެ. އަދި ރަފަޙް ބޯޑަރު ހުޅުވައި އިންސާނީ އެހީ ފޯރުކޮށްދިނުމުގެ ފުރުސަތު ވެސް ފަހިކޮށްދޭން ޖޭހެނެ ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ ބައިނަލްއަޤްވާމީ ކޯޓުގެ މި ނިންމެވުމަކީ ހަމަޖެހުން ޤާއިމުކުރުމަށް އެޅުނު މުހިންމު ފިޔަވަޅަކަށްވި ނަމަވެސް ރާއްޖޭން ގަބޫލުކުރަނީ ފަލަސްތީނަކީ މިނިވަން މުސަތަގިއްލު ޤައުމެއްގެ ގޮތުގައި ކަނޑައެޅިގެން ދިއުން ކަމަށެވެ. އަދި ފުރިހަމަ ގޮތުގައި ހަމަޖެހުން ޤާއިމުވެގެންދާނީ 1967 ގެ ކުރިން ބޯޑަރު އޮތްގޮތަށް އިރުމަތީ ޤުދުސް ފަލަސްތީނުގެ ވެރިރަށުގެ ގޮތުގައި ގާއިމުވެގެން ކަމަށް ވެސް ރައީސުލްޖުމްހޫރިއްޔާ ކުރެއްވި ޕޯސްޓުގައި ވިދާޅުވިއެވެ.

ދެކުނު އެފްރިކާއިން ޒަޔަނިސްޓު އިސްރާއީލާ ދެކޮޅަށް އައިސީޖޭއަށް މައްސަލަ ހުށަހަޅާފައި ވަނީ, ފަލަސްޠީނުގެ މުސްލިމުން ނެތިކޮށްލުމަށް ޔަހޫދީ ފައުޖުން ލާއިންސާނީ ގަތުލުއާންމުތައް ހިންގަމުންދާކަމަށް ބުނެއެވެ. އަދި, އެ ޢުދުވާނުގެ ސަބަބުން ފަލަސްޠީނުގެ މުސްލިމުންގެ ކުރިމަގާއި ފުރާނައަށް ހުރަސް އެޅިފައިވާކަމަށް ދެކުނު އެފްރިކާއިން ވަކާލާތުކުރެއެވެ.

ދެކުނު އެފްރިކާގެ ޤާނޫނީ ވަކީލުން ވިދާޅުވީ ޔަހޫދީ ފައުޖުން ރަފަޙުގައި ހިންގަމުންދާ ލާއިންސާނީ ޢުދުވާނާ ގުޅިގެން ފަލަސްޠީނުގެ މުސްލިމުންގެ ފުރާނަ ގެއްލި, ދަރިކޮޅެއް ނެތެމުންދާ ކަމުގައެވެ. އަދި, ހުސްވި ހަފުތާގައި ދެކުނު އެފްރިކާއިން ވަނީ, ރަފަޙުގައި ހިންގަމުންދާ ޢުދުވާން ހުއްޓުވުމަށް އަމުރެއް ނެރެދިނުމަށް އެދި އައިސީޖޭއަށް އިތުރު މައްސަލައެއް ވައްދާފައެވެ.

ރަފަޙުގައި ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓާލައި, ޣައްޒާއިން ފޭބުމަށް ޔަހޫދީ ފައުޖަށް އައިސީޖޭގެ 15 ފަނޑިޔާރުންގެ ބެންޗުން އަމުރުކޮށްފައިވާއިރު, މިއީ ޣައްޒާ ޢުދުވާނާ ގުޅިގެން އެ ކޯޓުން އަމުރެއް ނެރެފައިވާ ތިންވަނަ ފަހަރެވެ. އައިސީޖޭން ޔަހޫދީންނާ ދެކޮޅަށް އަމުރު ނެރެފައި ވަނީ އެ ކޯޓުގެ ބެންޗުގައި ހިމެނޭ 15 ފަނޑިޔާރުންގެ ތެރެއިން 13 ފަނޑިޔާރުންގެ ތާޢީދާ އެކުގައެވެ. ދެކޮޅު ހައްދަވާފައި ވަނީ ދެ ފަނޑިޔާރުންނެވެ.