ދީމާއަށް މަރުޙަބާކިޔުމަށް ހާއްސަ ހަރަކާތްތަކެއް މާދަމާ

ދިވެހިރާއްޖެއިން ފުރަތަމަ ފަހަރަށް އޮލިމްޕިކްސްއަށް ކޮލިފައިވި އެތުލީޓު، ފާތިމަތު ދީމާ އަލީއަށް މަރުޙަބާ ކިޔުމުގެ ގޮތުން މާދަމާ ހާއްސަ ހަރަކާތެއް ބޭއްވުމަށް ކުޅިވަރާއި ހަށިހެޔޮކަމާބެހޭ ވުޒާރާއިން ނިންމަވައިފިއެވެ.

ދީމާ އޮލިމްޕިކްސްއަށް ކޮލިފައިވީ ނޭޕާލުގައި ކުރިއަށްދިޔަ ދެކުނު އޭޝިއާ ސަރަހައްދުގެ ކޮލިފިކޭޝަންގެ ސިންގަލްސް ބައިން ޗެމްޕިއަންކަން ހޯދައިގެންނެވެ.

ކުޅިވަރާއި ހަށިހެޔޮކަމާބެހޭ ވުޒާރާގެ ޑެޕިއުޓީ މިނިސްޓަރ އައިޝަތު ނާޒިމާ ވިދާޅުވީ ދީމާގެ ކާމިޔާބީ ފާހަގަކޮށް އޭނާއަށް މަރުޙަބާ ކިޔުމުގެ ގޮތުން މާދަމާ މެންދުރުފަހު 2:00 ގައި ސޯޝަލް ސެންޓަރުގައި ހާއްސަ ހަރަކާތެއް ބޭއްވުމަށް ހަމަޖެހިފައިވާ ކަމަށެވެ. އެހެންކަމުން އެ ގަޑިއަށް ވީހާވެސް ގިނަ ބަޔަކު ރަތް ކުލައިގެ ހެދުމުގައި ދީމާއަށް މަރުޙަބާ ކިޔުމުގައި ބައިވެރިވުމަށް އޭނާ އެދިވަޑައިގެންނެވިއެވެ.

"އަޅުގަނޑު ކުޅިވަރުގެ މުޅި އާއިލާއަށްވެސް އަދި ދީމާއަށް ސަޕޯޓް ކުރާ ހުރިހާ ބޭފުޅުންނަށް ވެސް ރަތްކުލަ ތުރުކުރައްވައިގެން 2:00 ޖަހާއިރު ދީމާއަށް ސަޕޯޓް ކުރުމަށް އަޅުގަނޑުމެންނާއެކު ސޯޝަލް ސެންޓަރަށް ވަޑައިގަތުމަކީ އަޅުގަނޑުމެން ވަރަށް އުފާވާނެ ކަމެއް،" ނާޒިމާ ވިދާޅުވިއެވެ.

ރާއްޖޭގެ ތާރީހުގައި އޮލިމްޕިކްސްއަށް ކޮލިފައިވި ފުރަތަމަ ދިވެހި އެތުލީޓުގެ ޝަރަފު ހޯދުމާއި ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒުވެސް ވަނީ ދީމާއަށް މަރުހަބާ ވިދާޅުވެފައެވެ.

ދީމާއަށް ހޯދި ކާމިޔާބީއަށް މަރުހަބާ ވިދާޅުވެ ކުރެއްވި ޕޯސްޓުގައި ރައީސުލްޖުމުހޫރިއްޔާ ވިދާޅުވީ ކުޅިވަރުގެ ދާއިރާއިން ދީނާ ރާއްޖެއަށް ހޯދައިދިނީ ތާރީހީ ކާމިޔާބެއްކަމަށެވެ. އަދި ދީމާގެ ހިއްވަރާއި މޮޅުކުޅުމުގެ ސަބަބުން ހޯދި ކާމިޔާބީއާއެކު ޤައުމު މިއަދު ފަހުރުވެރިވާކަމަށާއި، ޕެރިސްގައި ބާއްވާ އޮލިމްޕިކްސްގައިވެސް ދީމާއަށް ފުރިހަމަ ކާމިޔާބީއަށް އެދިވަޑައިގަންނަވާކަމަށް ރައީސުލްޖުމްހޫރިއްޔާ ވިދާޅުވިއެވެ.

މީގެ ކުރިން ރާއްޖޭގެ ކުޅުންތެރިން އޮލިމްޕިކްސްގައި ވާދަކުރަނީ ކޮލިފައިނުވާ ގައުމުތަކުގެ ތެރެއިން ލިބޭ އިންވިޓޭޝަނަލް (ޓްރައިޕާޓައިޓް) ގެ ފުރުސަތުގައެވެ. އެ ގޮތުން 1988 ވަނަ އަހަރުން ފެށިގެން، އެތުލެޓިކްސް އާއި ފެތުން އަދި ބެޑްމިންޓަނުން ރާއްޖެއަށް ލިބޭ އިންވިޓޭޝަނަލް ފުރުސަތުތަކުގައި، އެތުލީޓުން ވަނީ ވާދަކޮށްފައެވެ. ނަމަވެސް ދީމާ ވެގެންދާނީ މިއަހަރު ފްރާންސްގެ ޕެރިހުގައި ބާއްވާ އޮލިމްޕިކްސްގައި ކޮލިފައިވެގެން ރާއްޖެ ތަމްސީލް ކުރާނެ ފުރަތަމަ އެތުލީޓަށެވެ.