މަސްވެރިކަން ކުރާ ކޮންމެ ދޯންޏަކަށް "ރެސްކިއު ޑައިވަރ"އެއް ތަމްރީންކުރާނަން: ރައީސް

މަސްވެރިކަން ކުރާ ކޮންމެ އޮޑިޔަކުން މަދުވެގެން އެއްފަޅުވެރިޔަކު، "ރެސްކިއު ޑައިވަރ" ފެންވަރުގެ ސަނަދެއް ހާސިލުކޮށްފައިވާ ފަރާތަކަށް ހެދުމަށްޓަކައި، ޚާއްސަ ތަމްރީނު ޕްރޮގްރާމެއްގެ ފުރުސަތު ފަހިކޮށްދެވޭނެ ކަމަށް ރައީސުލްޖުމްހުރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ މަސްވެރިންގެ ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސްގެ ވާހަކަފުޅުގައި ވިދާޅުވީ އެންދަމަންށާއި މަސްވެރިކަމަށް ކަނޑުމައްޗަށް ނުކުމެ އުޅުމުގައި ވަރަށް ހިތާމަވެރި ޙާދިސާތައް ހިނގާކަމީ، ޤަބޫލުކުރަންޖެހޭ ޙަޤީޤަތެއްކަމަށެވެ. އެގޮތުން އެންދެމުމާއި އެނޫންވެސް ބޭނުންތަކުގައި ފީނަން މޫދަށް ފައިބައިގެން، އަޑިޔަށް ފީނުމުގެ ތެރޭގައި ޚާއްޞަކޮށް އެންވެރިކަމަށް ޑައިވްކުރުމުގައި ހިތާމަވެރި އެކްސިޑެންޓްތައް ހިނގާކަމަށެވެ. އަދި ބައެއްފަހަރު ފުރާނައަށް ނުރައްކާ ވާ ހާލަތުވެސް ދިމާވެފައިވާކަން ފާހަގަކުރައްވާ ރައީސް ވިދާޅުވީ މިފަދަ ހިތާމަވެރި ޙާލަތްތައް ކުރިމަތިވުމުގައި، އެއްސަބަބަކީ އެފަދަ ހާލަތްތަކަށް ބޭނުންވާ އެހީ ދިނުމުގެ ރަނގަޅު ނިޒާމެއް އޮޑިދޯނިފަހަރާއި ފަޅުވެރިންގެ ނެތުންކަމަށެވެ.

ރައީސް ވިދާޅުވީ ރާއްޖޭގެ އެންމެ އަގުހުރި އެއް ދާއިރާގައި މަސައްކަތްކުރާ މީހުންނަށް ދިމާވާ މި ފަދަ ހިތާމަވެރި މައްސަލަތަކަށް ފަރުވާއެއް ނުހޯދާ ތިބުމަކީ ގަބޫލުކުރެވޭނެކަމެއް ނޫންކަމަށެވެ.

"އަޅުގަނޑު ދެކޭ ގޮތުގައި މިފަދަ ހިތާމަވެރި ހާދިސާތައް މަދުކުރުމަށް އުޅަނދުފަހަރުގައި ޑައިވް ކުރުމުގެ ފުރިހަމަ ތަމްރީނު ލިބިފައިވާ ޑައިވަރުން ތިބުމަކީ މުހިއްމުކަމެއް. އެހެންކަމުން، މަސްވެރިކަން ކުރާ ކޮންމެ އޮޑިޔަކުން މަދުވެގެން އެއްފަޅުވެރިޔަކު، ‘ރެސްކިއު ޑައިވަރ’ ފެންވަރުގެ ސަނަދެއް ހާސިލުކޮށްފައިވާ ފަރާތަކަށް ހެދުމަށްޓަކައި، ޚާއްސަ ތަމްރީނު ޕްރޮގްރާމެއްގެ ފުރުސަތު ފަހިކޮށްދެވޭނެ." ރައީސް ވިދާޅުވިއެވެ.

މިފަދަ ކޮންމެ ކަމަކުން ނިކަމެތި ވަނީ ހަމައެކަނި ހާދިސާއާ ކުރިމަތިލާ މީހާ ނޫންކަމަށާއި، އޭނާގެ އަނބިދަރީނާއި މުޅި އާއިލާ އުމުރު ދުވަހަށްވެސް އެ ގެއްލުމާއި ކުރިމަތިލާންޖެހޭ ޙާލަތު ކުރިމަތިވާކަމަށް ރައީސް ވިދާޅުވިއެވެ. އެހެންކަމުން ސަރުކާރުން ބޭނުންވަނީ މި ހިތާމަވެރި ޙާލަތުން މަސްވެރީންނަށް އަރައިގަނެވޭނެ ގޮތްތަކެއް ރާވައި ތަންފީޒުކުރުން ކަމަށް ރައީސް ވިދާޅުވިއެވެ.

ޕީއެސްއެމްގެ "ހަފްތާ 14" ޕްރޮގްރާމްގައި މިމަސައްކަތުގެ ތަފްސީލް ޙިއްސާކުރައްވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާގެ ނައިބު އަޙުމަދު ޝާފިއު ވިދާޅުވީ، މަސްވެރިކަން ކުރާގޮތަށް އައި ބަދަލާއެކު، އެން ދަމާ ގޮތަށް ވަރަށް ބޮޑު ބަދަލެއް އައިސްފައިވާކަމަށެވެ. މިހާރު އެންދެމުމުގެ މަސައްކަތަށް ސާޅީހަކަށް މީޓަރު އަޑިއަށްވެސް ޑައިވްކުރާކަމަށެވެ. އަދި މިކަމުގައި ގަވާއިދުގައި އޮންނަ އުސޫލުތައް ރަނގަޅަށް ނޭނގުމުގެ ސަބަބުން، ހާދިސާތައް ހިނގަން މެދުވެރިވާކަމަށެވެ.

ޑައިވް އިކުއިޕްމަންޓް ގެންގުޅެން ނޭނގުމާއި، އަދި ފަސްޓް އެއިޑް(ކުއްލި ފަރުވާ) ދޭން އިނގޭ މީހުންނާއި ވަސީލަތްތައްވެސް ބައެއް ދޯނިތަކުގައި ނުހުންނަކަން ޝާފިޢު ފާހަގަކުރެއްވިއެވެ. އެހެންކަމުން ސަރުކާރުން ފަހިކުރާ ފުރުޞަތުގައި، އެން ދަމައިގެން މަސައްކަތްކުރާ ކޮންމެ ދޯންޏެއްގައި އެކަމަށް ތަމްރީން ލިބިފައިވާ މީހަކު ހުރިކަން ކަށަވަރުކުރައްވާނެކަމަށާއި، މިތަމްރީންތައް ހެދުމަށް ސީދާ ސަރުކާރުން ޕްރޮގްރާމްތައް ހިންގަވާނެ ކަމަށް ޝާފިއު ވިދާޅުވިއެވެ.

"އުސޫލުތައް އިނގޭ މަދުވެގެން 1 ޑައިވަރު އަދި ރެސްކިއު ޑައިވަރެއްވެސް ތަމްރީންކުރާނަން. ޑައިވްކުރާ ދޯނިތައް ސެޓިފައި ކުރާނަން. އޮކްސިޖަން ބޭނުންކުރާނެގޮތާއި، ފަސްޓްއެއިޑާއި ސީޕީއާރް ދިނުމަށް ތަމްރީންކުރާނަން." ޝާފިއު ވިދާޅުވިއެވެ.

ޝާފިއު ވިދާޅުވީ މަސްވެރިންގެ ޚިޔާލު ހޯދުމަށް ބޭއްވި "މަސްވެރިންގެ ގުންޒަރު"ގައިވެސް، މިކަން މަސްވެރިން ފާހަގަކުރެއްވިކަމަށެވެ.

މީގެއިތުރުންވެސް، މަސްވެރިކަމުގެ ދާއިރާއިން ބޭނުންވާ ތަޢުލީމާއި، ތަމްރީންތައް ސަރުކާރުން ފަހިކޮށްދެއްވާނެ ކަމަށް ޝާފިއުވަނީ ވިދާޅުވެފައެވެ. މިމަސައްކަތްތައް ރަނގަޅަށް ފަށައިގަނެވޭނީ، މަސްވެރިންގެ ދަފްތަރު އެކުލަވާލުމުގެ މަސައްކަތާއެކު ކަމަށްވެސް އޭނާ ވިދާޅުވިއެވެ.