ކޮކޯ ޕާމް މޯލްޑިވްސް ދުނިކޮޅު ރިސޯޓަށް 25 އަހަރު ފުރުން ކުލަގަދަކޮށް ފާހަގަކޮށްފި

ކޮކޯ ކަލެކްޝަންގެ ދަށުން ހިންގާ ކޮކޯ ޕާމް މޯލްޑިވްސް ދުނިކޮޅު ރިސޯޓަށް 25 އަހަރު ފުރުން ފާހަގަކުރުމަށް ހާއްސަ ހަރަކާތްތަކެއް ބާއްވައިފިއެވެ.

ރާއްޖޭގެ އޮޕަރޭޓްކުރާ އެންމެ މަތީ ފެންވަރުގެ ރިސޯޓްތަކުގެ ތެރެއިން ކޮކޯ ޕާމް މޯލްޑިވްސް ދުނިކޮޅުއަކީ 1998 ވަނަ އަހަރުގެ ޑިސެމްބަރުމަހުގެ 7 ވަނަ ދުވަހު ހުޅުވުނު ރިސެޓެކެވެ. މި ރިސޯޓްގެ ބާނީންނަކީ، ޗެއާރމަން އަދި މެނޭޖިންގ ޑިރެކްޓަރ ޝަބީރު އަހުމަދުގެ އިތުރުން، އޭނާއާ އެއްބަނޑު އެއްބަފާ ތިން ބޭފުޅުންކަމަށްވާ ހުސައިން ހިލްމީ، މުހައްމަދު ނަޒީރު، އަދި ހަސަން ޒަރީރުޢެވެ.

ކޮކޯ ކަލެކްޝަންގެ ދަށުން ހިންގާ ކޮކޯޕާމް މޯލްޑިވްސް ދުނިކޮޅަށް 25 އަހަރު ފުރުމާއި ގުޅިގެން ރިސޯޓްގައި ވަނީ ހާއްސަ ހަރަކާތްތަކެއް ބުރާސްފަތިދުވަހު ބާއްވާފައެވެ.

ބ.އަތޮޅުގައި ހިންގާ ކޮކޯ ޕާމް މޯލްޑިވްސް ދުނިކޮޅު ރިސޯޓަށް 25 އަހަރު ފުރުމާއި ގުޅިގެން ބޭއްވި ހަރަކާތްތައް ފެށިގެންދިޔައީ ހަވީރު ސައިފޮދަކުންނެވެ. އެ ހަރަކާތުގައި ބ.އަތޮޅުގެ އެކި ރަށްރަށުގެ ކައުންސިލް މެމްބަރުންނާއި ސްކޫލް ކުދިންނާއި ކޮކޯ ޕާމްގައި މީގެކުރިން މަސައްކަތް ކުރި ބައެއް ފަރާތްތައްވެސް ބައިވެރިވިއެވެ.

މި ހަރަކާތުގެ ތެރެއިން ކޮކޯ ޕާމް މޯލްޑިވްސް ދުނިކޮޅުގެ 25 އަހަރުގެ ތާރީހު ދައްކުވައިދޭ ހާއްސަ ފޮޓޯ ގެލެރީއެއް ހުޅުވުން ކުރިއަށްދިޔައެވެ. ފޮޓޯ ގެލަރީގައި އެ ރިސޯޓްގެ މަސައްކަތް ފެށިގެންދިޔަ ގޮތުން ފެށިގެން، މިއަދު އެ ރިސޯޓުން ފެންނަމުންދާ ތަރައްގީއާއި ކުރިއެރުންތައް ވަރަށް ރީތިކޮށް ދައްކުވައިދެއެވެ.

ފޮޓޯ މައުރަޒުގެ އިތުރުން، ރިސޯޓްގައި ވަނީ ހާއްސަ ޓައިމް ކެޕްސޫލެއްވެސް ވަޅުލާފައެވެ. ރިހި ރުނބާގެ ނަން ދެވިފައިވާ މި ކެޕްސުލްގައި ރިސޯޓްގެ ވެރިންނާއި މުވައްޒަފުން އަދި މެހެމާނުން ފާޅުކުރި ޝުއޫރުތަކާއި ވާހަކަތައް ހިމެނޭ ލިޔުންތައް ހިމެނެއެވެ. ރިސޯޓްގެ ގޮނޑުދޮށުގައި ވަޅުލި ޓައިމް ކެޕްސުލް ނެގުމަށް ހަމަޖެހިފައިވަނީ މިގެ 25 އަހަރު ފަހުންކަމަށް ރިސޯޓުން ބުނެއެވެ.

ކޮކޯ ޕާމް މޯލްޑިވްސް ދުނިކޮޅު ރިސޯޓަށް 25 އަހަރު ފުރުން ފާހަގަކުރުމަށް ބޭއްވި ހަރަކާތްތަކުގެ ތެރެއިން ހާއްސަ ރޭގަނޑުގެ ފަރިއްކޮޅެއްވެސް ކުރިއަށްދިޔައެވެ. މި ރަސްމިއްޔާތު ޝަރަފުވެރިކޮށްދެއްވީ ޑެޕިއުޓީ ޓޫރިޒަމް މިނިސްޓަރ މުހައްމަދު ޔާމީން އަހުމަދެވެ. މީގެއިތުރުން ރިސޯޓް ހިންގަމުންދާ ކޮކޯ ކަލެކްޝަންގެ ބައެއް ޑައިރެކްޓަރުންނާއި ބ.އަތޮޅު ކައުންސިލްގެ މެމްބަރުންނާއި ބައެއް ރަށްރަށުގެ ކައުންސިލަރުންވެސް ބައިވެރިވިއެވެ.

މިހަފްލާގައި ކޮކޯ ކަލެކްޝަންގެ ޗެއަރމަން އަދި މެނޭޖިންގ ޑައިރެކްޓަރ ޝަބީރު ވަނީ ކޮކޯ ޕާމް މޯލްޑިވްސް ދުނިކޮޅު ހުޅުވުމަށް ކުރި މަސައްކަތްތަކާއި، މިއަދު ރިސޯޓަށް ލިބިފައިވާ ކުރިއެރުންތައް ހާސިލުކުރުމަށް ކުރި ބުރަ މަސައްކަތަށް އަލިއަޅުއްވާލެއްވިއެވެ.

ޝަބީރުގެ ވާހަކަފުޅުގައި ފާހަގަކުރެއްވި ގޮތުގައި ރިސޯޓް ތަރައްގީކުރުމުގައި އެންމެ ބޮޑަށް ވިސްނުން ބެހެއްޓެވީ ތިމާވެށި ރައްކާތެރިކުރުމާއެކު ގުދުރަތީ ސިފަތައް ނުގެއްލޭގޮތަށް، ރިސޯޓް ތަރައްގީކުރުމަށެވެ. އަދި މިއަދާއި ހަމައަށް އައިރުވެސް އެކަން އެގޮތުގައި ދެމެހެއްޓުނުކަން ޝަބީރު ފާހަގަކުރެއްވިއެެވެ.

ޝަބީރުގެ ވާހަކަފުޅުގައި ރިސޯޓުގެ ތަރައްގީއަށް ކުރި މަސައްކަތުގައި ޑައިރެކްޓަރުންނާއި މުވައްޒަފުންގެ ބުރަ މަސައްކަތްވެސް ފާހަގަކުރެއްވިއެވެ.

މި ހަފްލާގައި ކޮކޯ ޕާމް މޯލްޑިވްސް ދުނިކޮޅު ރިސޯޓްގައި އަލަށް ތައާރަފްކުރި ބައެއް އެވޯޑްތައް ވަނީ ހައްގުވެރި ފަރާތްތަަކަށް ދީފައެވެ. އެވޯޑްތައް ހަވާލުކޮށްދެއްވީ ޓޫރިޒަމް މިނިސްޓްރީގެ ނައިބު މުހައްމަދު ޔާމީންއާއި ބ.އަތޮޅުގެ ބައެއް ކައުންސިލްތަކުގެ ރައީސުންނެވެ.

މި ހަފްލާގައި ރާއްޖޭގެ ސަގާފީ ހަރަކާތްތައް ދައްކުވައިދޭ އެކި ހުށަހެޅުންތައްވެސް ވަނީ ފެނިގެން ގޮސްފައެވެ.